រាជធានីភ្នំពេញ ៖ ប្រតិភូក្រសួងការបរទេសនិងសហប្រតិបត្តិការអន្តរជាតិ ដឹកនាំដោយលោកឧបនាយករដ្ឋមន្ត្រីហោ ណាំហុង កាលពីព្រឹកថ្ងៃទី១៨ ខែមីនា ឆ្នាំ២០១១ បានអញ្ជើញទៅស្ថានទូតជប៉ុនប្រចាំកម្ពុជា ដើម្បីចូលរួមមរណទុក្ខ និងគោរពដល់វិញ្ញាណក្ខន្ធពលរដ្ឋជប៉ុនដែលរងគ្រោះដោយការរញ្ជួយដី និងរលកយក្សស៊ូណាមី ។ ក្រៅពីប្រតិភូក្រសួងការបរទេសនិងសហប្រតិបត្តិការអន្តរជាតិ គេក៏បានឃើញវត្តមានសិស្ស និស្សិតតាមបណ្តាវិទ្យាល័យនិងសាកលវិទ្យាល័យនានា ក៏បានចូលរួមក្នុងពិធីគោរពវិញ្ញាណក្ខន្ធនោះដែរ ដែលបង្ហាញឱ្យឃើញនូវសមានចិត្តគោរពស្រឡាញ់និងចូលរួមមរណទុក្ខ រំលែកទុក្ខ របស់ប្រជាពលរដ្ឋកម្ពុជាចំពោះប្រជាពលរដ្ឋជប៉ុន ជាបងប្អូន ។
ស្ថានទូតជប៉ុន បានចេញសេចក្តីប្រកាសព័ត៌មានមួយកាលពីថ្ងៃទី១៦ ខែមីនា ឆ្នាំ២០១១ ដោយបញ្ជាក់ថា គ្រោះរញ្ជួយដីនិងរលកយក្សស៊ូណាមីនាថ្ងៃទី១១ ខែមីនា ឆ្នាំ២០១១ បានបណ្តាលឱ្យមានការខូចខាតយ៉ាងដំណំនៅប្រទេសជប៉ុន ។ ដើម្បីជាការឆ្លើយតបទៅនឹងស្ថានភាពនេះ ស្ថានទូតជប៉ុនបានអនុញ្ញាតឱ្យសាធារណជនចូលរួមសរសេរក្នុងសៀវភៅរំលែកទុក្ខនៅស្ថានទូតជប៉ុន ដែលមានអាសយដ្ឋានលេខ១៩៤ មហាវិថីព្រះនរោត្តម ពីថ្ងៃទី១៧ ដល់ថ្ងៃទី២៣ ខែមីនា ឆ្នាំ២០១១ ។ ទន្ទឹមនោះ ស្ថានទូតជប៉ុនបានថ្លែងអំណរគុណយ៉ាងជ្រាលជ្រៅចំពោះប្រជាជនកម្ពុជា ដែលបានចូលរួមមរណទុក្ខ និងសន្តានចិត្តក្នុងការផ្តល់នូវការបរិច្ចាគថវិកានិងផ្កាសម្រាប់ជនរងគ្រោះដោយគ្រោះមហន្តរាយនេះ ។
ចំនួននៃការខូចខាត ការស្លាប់និងការរងទុក្ខគឺមិនអាចកាត់ថ្លៃបាន ។ ប៉ុន្តែទោះបីយ៉ាងណាក៏ដោយ ទឹកចិត្តដ៏កក់ក្តៅនិងសប្បុរសធម៌របស់ប្រជាជនកម្ពុជា ក៏ដូចជាប្រជាជាតិផ្សេងទៀតជាច្រើន ជាកម្លាំងជំរុញទឹកចិត្តប្រជាជនជប៉ុនឱ្យកសាងឡើងវិញនូវតំបន់ដែលទទួលរងការបំផ្លិចបំផ្លាញ ៕
ចែករំលែកព័តមាននេះ