កសិករឈ្មោះ អ៊ុន លក្ខិណា រស់នៅភូមិជ្រែង ឃុំស្វាយលួង ស្រុកណ្តៀង ខេត្តពោធិ៍សាត់ គាត់បានធ្វើការដាំដុះដំណាំបន្លែបាន៤ដង ក្នុង១ឆ្នាំ ហើយទទួលចំណូលប្រហែល៣០លានរៀល ឬស្មើ៧៥០០ដុល្លារក្នុងមួយឆ្នាំ លើផ្ទៃដីដាំដុះប្រហែល ៣០អា ។ អ្នកស្រីដាំត្រប់ ត្រសក់ស្ពៃ និងខាត់ណាផ្កា ។
ក្រសួងកសិកម្មបានលើកឡើង ករណីអ្នកស្រី អ៊ុន លក្ខិណា មកផ្សាយ ទំនងសម្រាប់ធ្វើជាគំរូ ដល់កសិករផ្សេងទៀតឲ្យដាំដុះបន្លែ ដើម្បីផ្គត់ផ្គង់ទីផ្សារក្នុងស្រុក ពីព្រោះបច្ចុប្បន្ននេះ ក្នុងចំណោមតម្រូវការបន្លែពី២០០តោន ទៅ៤០០តោនក្នុងមួយថ្ងៃ ពលរដ្ឋកម្ពុជាទទួលទានបន្លែនាំចូលមិនតិចជាង៥០% នោះទេ ហើយបន្លែនាំចូលទៀតសោត ត្រូវបានអាជ្ញាធររកឃើញថា មានផ្ទុកសាធារតុគីមីខ្ពស់ទៀតផង ។
បន្លែដែលអ្នកស្រីអ៊ុន លក្ខិណា ដាំដុះបានមិនពិបាកលក់នោះទេ ។ កសិកររូបនេះ បានយកបន្លែងរបស់គាត់ទៅបោះដុំនៅផ្សារ និងលក់ដោយខ្លួនឯងផង ។ ដូចជា ត្រសក់ក្នុង១ថ្ងៃ គាត់អាចប្រមូលពី១០០ទៅ១៣០គីឡូក្រាម ក្នុងមួយគីឡូតម្លៃ ២០០០រៀល បើគាត់បោះដុំឲ្យគេ ។
ក្រសួងកសិកម្ម រុក្ខាប្រមាញ់ និងនេសាទ ពិសេសរដ្ឋាភិបាលតែម្តង បានកំពុងជំរុញឲ្យមានការដាំបន្លែក្នុងស្រុក ដើម្បីផ្គត់ផ្គង់ទីផ្សារនៅនឹងកន្លែង និងជាការលើកកម្ពស់ជីវភាពប្រជាកសិករនៅគ្រាលំបាកខាងសេដ្ឋកិច្ច ដោយសារជំងឺកូវីដ១៩ផង ។
កន្លងកសិករជាច្រើនត្អូញត្អែរថា ការដាំបន្លែក្នុងស្រុកលក់មិនចំណេញ ការដាំដុះចំណាយដើមទុនខ្ពស់លើជី លើទឹក ចំណែកបន្លែនាំចូលគេលក់ថោកជាង ដែលធ្វើឲ្យពលរដ្ឋជាច្រើនបាក់ទឹកចិត្តក្នុងការដាំដុះ ៕
ចែករំលែកព័តមាននេះ