ទន្ទឹមនឹងការរកឃើញករណីវិជ្ជមាន ៩ករណីថ្មី មន្ត្រីសុខាភិបាលបានលើកឡើងថា ជំងឺកូវីដ១៩ មិនដែលភ្លេចមនុស្សឡើយ វារង់ចាំតែឱកាសឆ្លងមកមនុស្សនៅគ្រប់វិនាទី ។ លោកស្រីឳ វណ្ណឌិន អ្នកនាំពាក្យ…
ទន្ទឹមនឹងការរកឃើញករណីវិជ្ជមាន ៩ករណីថ្មី មន្ត្រីសុខាភិបាលបានលើកឡើងថា ជំងឺកូវីដ១៩ មិនដែលភ្លេចមនុស្សឡើយ វារង់ចាំតែឱកាសឆ្លងមកមនុស្សនៅគ្រប់វិនាទី ។
លោកស្រីឳ វណ្ណឌិន អ្នកនាំពាក្យ និងជារដ្ឋលេខាធិការក្រសួងសុខាភិបាន លើកឡើងថា «វីរុសដ៏(កូវីដ១៩)កាចសាហាវនេះ មិនដែលភ្លេចយើងទេ រង់ចាំតែមានឱកាស មានការធ្វេសប្រហែស និងឲ្យតែមានពេលចន្លោះតែមួយភ្លែតៗ ដែលយើងមិនបានការពារខ្លួន វីរុសដ៏កាចសាហាវនេះនឹងអាចឆ្លងមកចូលខ្លួនយើង ហើយណាបងប្អូន»។
កម្ពុជាបានរកករណីវិជ្ជមានចំនួន៩នាក់ថ្មី នៅព្រឹកថ្ងៃទី២៧ ខែមិថុនានេះ ដែលធ្វើឲ្យករណីកូវីដ១៩ នៅកម្ពុជាកើនដល់១៣៩នាក់ ក្នុងនោះអ្នកកំពុងសម្រាកព្យាលនៅក្នុងមន្ទីរពេទ្យ១០នាក់ ហើយអ្នកជាសះស្បើយចំនួន១២៩នាក់ ។
អ្នកទើបរកឃើញ៩នាក់ថ្មី មានជនខ្មែរចំនួន៨នាក់ ជនជាតិឥណ្ឌូនេស៊ី ១នាក់ ។ ពួកគេទាំង៩នាក់ទើបធ្វើដំណើរពីប្រទេសឥណ្ឌូនេស៊ី ចូលមកប្រទេសកម្ពុជាកាលពីថ្ងៃទី២៥ មិថុនា ។
លោកស្រីឳ វណ្ណឌិន បានមានប្រសាសន៍ថា ដើម្បីចៀសផុតពីជំងឺកូវីដ១៩ មានតែការអនុវត្តដោយប្រុងប្រយ័ត្នវិធានការដែលក្រសួងសុខាភិបាលបានដាក់ចេញជាបន្តបន្ទាប់មកនោះ។
កន្លងមកក្រសួងសុខាភិបាលណែនាំពលរដ្ឋអនុវត្តវិធានការអនាម័យជាប់ជាប្រចាំ ឧស្សាហ៍លាងដៃ និងសាប៊ូ ឬអាកុល ត្រូវពាក់ម៉ាស់ រក្សាគម្លាត ហាមការជួបជុំមនុស្សច្រើន និងមិនត្រូវចេញពីផ្ទះបើមិនចាំបាច់ ។
ក្រសួងសុខាភិបានបញ្ជាក់ថា «ជំងឺកូវីដ-១៩ នៅតែបន្តគម្រាមកំហែងយើងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យនៅឃ្លាតឆ្ងាយពីគ្នា មិនចេញក្រៅផ្ទះ បើមិននចាំបាច់ ព្រោះប្រទេសជិតខាងយើង និងពិភពលោកកំពុងបន្តរាតត្បាតជំងឺកូវីដ១៩ ដ៏ខ្លាំងក្លានៅឡើយ»។
កម្ពុជាបានរកឃើញករណីជំងឺកូវីដ១៩ ដំបូងនៅថ្ងៃទី ២៧ មករា ២០២០ ។ នាយកដ្ឋានប្រយុទ្ធជំងឺឆ្លងក្រសួងសុខាភិបាលបញ្ជាក់ថា រហូតមកដល់ពេលនេះ កម្ពុជាបានធ្វើតេស្តចំនួន៣៤ ៣១៦ ស្មើនឹង២ ០៦៧ ក្នុង១លាននាក់ ៕
ចែករំលែកព័តមាននេះ