រាជធានីភ្នំពេញ ៖ កុមារី ង៉ា សុជាតិ អាយុ៣ឆ្នាំ ដែលមានជំងឺបេះដូងប្រហោងហើយត្រូវបានអង្គការបេះដូងគ្មានព្រំដែន ជួយយកទៅព្យាបាលនៅមន្ទីរពេទ្យឯសហរដ្ឋអាមេរិក អស់រយៈពេលជាច្រើនខែមកហើយនោះបានជាសះស្បើយ១០០ភាគរយ និងបានត្រឡប់មកដល់ប្រទេសកម្ពុជាវិញហើយ ។ កុមារីរូបនេះរួមជាមួយម្តាយព្រមទាំងក្មេងស្រីម្នាក់ទៀតឈ្មោះតេង ដាវីត អាយុ១១ឆ្នាំ ដែលធ្លាប់បានទទួលការព្យាបាលវះកាត់ជំងឺដូចគ្នានេះដែរ
រាជធានីភ្នំពេញ ៖ កុមារី ង៉ា សុជាតិ អាយុ៣ឆ្នាំ ដែលមានជំងឺបេះដូងប្រហោងហើយត្រូវបានអង្គការបេះដូងគ្មានព្រំដែនជួយយកទៅព្យាបាលនៅមន្ទីរពេទ្យឯសហរដ្ឋអាមេរិក អស់រយៈពេលជាច្រើនខែមកហើយនោះបានជាសះស្បើយ១០០ភាគរយ និងបានត្រឡប់មកដល់ប្រទេសកម្ពុជាវិញហើយ ។ កុមារីរូបនេះរួមជាមួយម្តាយព្រមទាំងក្មេងស្រីម្នាក់ទៀតឈ្មោះតេង ដាវីត អាយុ១១ឆ្នាំ ដែលធ្លាប់បានទទួលការព្យាបាលវះកាត់ជំងឺដូចគ្នានេះដែរ ត្រូវបានលោកឈុន ភីធ័រ នាយកអង្គការបេះដូងគ្មានព្រំដែនដឹកនាំទៅសហរដ្ឋអាមេរិកតាំងពីខែកុម្ភៈ ហើយបានត្រឡប់មកវិញនៅថ្ងៃទី១៩ សីហា ឆ្នាំ២០១០ ។ អញ្ជើញទៅទទួលដំណើរត្រឡប់មកវិញនៅព្រលានយន្តហោះអន្តរជាតិភ្នំពេញមានលោកនង គន្ធាវី ក្រុមប្រឹក្សាភិបាលនៃអង្គការបេះដូងគ្មានព្រំដែន និងបងប្អូនក្រុមគ្រួសារញាតិមិត្តជាច្រើនរូបទៀត ។
លោកឈុន ភីធ័រ នាយកអង្គការបេះដូងគ្មានព្រំដែនបានឱ្យដឹងថា អង្គការនេះមានស្នាក់ការនៅសហរដ្ឋអាមេរិកមួយកន្លែង ដោយឡែកនៅភ្នំពេញមានអាសយដ្ឋានផ្ទះលេខ១៥១B ផ្លូវលេខ១២BT សង្កាត់បឹងទំពុន ខណ្ឌមានជ័យ ។ អង្គការបេះដូងគ្មានព្រំដែន បានការជួយឧបត្ថម្ភពីសប្បុរសជននៅសហរដ្ឋអាមេរិកហើយកន្លងមកធ្លាប់បាននាំយកកុមារដែលមានជំងឺបេះដូងប្រហោងទៅធ្វើការវះកាត់នៅមន្ទីរពេទ្យឯសហរដ្ឋអាមេរិកចំនួន៣នាក់រួចមកហើយ ។ លើកទី១នៅដើមឆ្នាំ២០០៨ អង្គការបាននាំយកក្មេងស្រីតេង ដាវីត អាយុ១១ឆ្នាំ ទៅធ្វើការវះកាត់ជំងឺបេះដូងហើយទទួលបានជោគជ័យជាសះស្បើយ ដែលពេលនេះក្មេងស្រីរូបនេះបានទៅសហរដ្ឋអាមេរិកជាលើកទី២ ដើម្បីថ្លែងអំណរគុណក្រុមគ្រូពេទ្យ ។ លើកទី២ចុងឆ្នាំ២០០៨ អង្គការបាននាំយកកុមារី សុខ សំណាង អាយុ២ឆ្នាំ និងលើកទី៣ គឺកុមារី ង៉ា សុជាតិ ត្រូវត្រឡប់មកវិញនៅពេលនេះ ។
លោកឈុន ភីធ័រ បញ្ជាក់ថា អង្គការបេះដូងគ្មានព្រំដែន មានគោលការណ៍នាំយកក្មេងៗទីទ័លក្រ កុមារកំព្រាដែលមានបញ្ហាជំងឺបេះដូងទៅព្យាបាលជាបន្តបន្ទាប់ទៀតនៅសហរដ្ឋអាមេរិក ហើយជំហានទី៤នេះគឺត្រូវយកកុមារមកពីខេត្តព្រៃវែង ។ លោកបានថ្លែងអំណរគុណចំពោះសប្បុរសជនដែលបានជួយគាំទ្រដល់អង្គការបេះដូងគ្មានព្រំដែនហើយក៏សូមអំពាវនាវជាបន្តទៀតទាំងសប្បុរសជនក្នុងប្រទេស និងក្រៅប្រទេសសូមជួយឧបត្ថម្ភគាំទ្រដល់អង្គការនេះដើម្បីមានឱកាសជួយសង្គ្រោះក្មេងៗក្រីក្រ កំព្រានៅប្រទេសកម្ពុជា ។ លោកឈុន ភីធ័រ បញ្ជាក់ថា ការចេញទៅព្យាបាលមួយលើកៗត្រូវចំណាយអស់២៥.០០០ដុល្លារ ។ កុមារីង៉ា សុជាតិ អាយុ៣ឆ្នាំ ម្តាយឈ្មោះនុត ណារ៉ា ឪពុកឈ្មោះឃិន ធិន រស់នៅភូមិទួលពង្រ ឃុំសោម ស្រុកគិរីវង់ ខេត្តតាកែវ ជាគ្រួសារក្រីក្រមួយហើយមានសំណាងក្រោមការជួយខ្នះខ្នែងពីអង្គការបេះដូងគ្មានព្រំដែន ៕
ចែករំលែកព័តមាននេះ