ខេត្តសៀមរាប ៖ ពិធីសម្ពោធដាក់ឲ្យដំណើរការជាផ្លូវការការិយាល័យច្រកចេញចូលតែមួយ និងការិយាល័យប្រជាពលរដ្ឋនៃរដ្ឋបាលស្រុកបន្ទាយស្រីខេត្តសៀមរាប នាថ្ងៃទី២៥ ខែមិថុនា ឆ្នាំ២០២០នេះ ក្រោមវត្តមានលោក ទៀ សីហា…
ខេត្តសៀមរាប ៖ ពិធីសម្ពោធដាក់ឲ្យដំណើរការជាផ្លូវការការិយាល័យច្រកចេញចូលតែមួយ និងការិយាល័យប្រជាពលរដ្ឋនៃរដ្ឋបាលស្រុកបន្ទាយស្រីខេត្តសៀមរាប នាថ្ងៃទី២៥ ខែមិថុនា ឆ្នាំ២០២០នេះ ក្រោមវត្តមានលោក ទៀ សីហា អភិបាល នៃគណៈអភិបាលខេត្តសៀមរាប ដោយមានការចូលរួមពីលោកប្រធានក្រុមប្រឹក្សាស្រុក និងលោកអភិបាលស្រុកបន្ទាយស្រី ព្រមទាំងបងប្អូនប្រជាពលរដ្ឋយ៉ាងច្រើនផងដែរ។
ក្នុងឱកាសនោះដែរ លោក ទៀ សីហា អភិបាលខេត្តសៀមរាប បានលើកឡើងថា ការរៀបចំបង្កើតការិយាល័យច្រកចេញចូលតែមួយ និងការិយាល័យប្រជាពលរដ្ឋនៅថ្នាក់ក្រុងស្រុកខណ្ឌ គឺដើម្បីប្រមូលផ្ដុំការផ្ដល់សេវារដ្ឋបាលមួយចំនួន នៅកន្លែងតែមួយជូនប្រជាពលរដ្ឋប្រកបដោយគុណភាព ប្រសិទ្ធភាព តម្លាភាព គណនេយ្យភាព និងបរិយាប័ន្ន។ លោកបានលើកឡើងទៀតថា នេះគឺជាសមិទ្ធផលថ្មីមួយទៀត ក្នុងការចូលរួម សម្រេចឲ្យបានចក្ខុវិស័យរបស់រាជរដ្ឋាភិបាលក្នុងកម្មវិធីកំណែទម្រង់វិមជ្ឈការ និងវិសហមជ្ឈការ តាមរយៈការលើកកម្ពស់ប្រសិទ្ធភាព និងគុណភាព នៃការផ្ដល់សេវារដ្ឋបាលកាន់តែល្អប្រសើរឡើង ជូនប្រជាពលរដ្ឋប្រកបដោយគុណភាពប្រសិទ្ធភាព តម្លាភាព គណនេយ្យភាព និង បរិយាប័ន្ន។
ការបង្កើតឲ្យមានការិយាល័យច្រកចេញចូលតែមួយ គឺដើម្បីកាត់បន្ថយនូវភាពស្មុគស្មាញ និង ភាពសាំញ៉ាំនៃបែបបទ និងនីតិវិធីរដ្ឋបាល សម្រួលជូនប្រជាពលរដ្ឋក្នុងការស្នើសុំសេវានានា ពីរដ្ឋបាលសាធារណៈ កាត់បន្ថយជាអតិបរមានូវការិយាល័យធិបតេយ្យ និង អំពើពុករលួយទៀតផង។ ជាមួយគ្នានេះការិយាល័យប្រជាពលរដ្ឋ គឺជាអង្គភាពអព្យាក្រឹត្យ មានតួនាទីទទួលសម្របសម្រួលដោះ ស្រាយពាក្យបណ្ដឹងឬការតវ៉ារបស់ប្រជាពលរដ្ឋពាក់ព័ន្ធនឹងការសម្រេចរបស់រដ្ឋបាលមូលដ្ឋាន ឬភាពមិនប្រក្រតីណាមួយក្នុងការផ្តល់សេវារបស់មន្ត្រីនៅរដ្ឋបាលមូលដ្ឋាន។
លោកបន្តថា ការរៀបចំបង្កើតការិយាល័យច្រកចេញចូលតែមួយ និងការិយាល័យប្រជាពលរដ្ឋនៅថ្នាក់ក្រុង ស្រុក ខណ្ឌ គឺដើម្បីប្រមូលផ្ដុំការផ្ដល់សេវារដ្ឋបាលមួយចំនួននៅកន្លែងតែមួយតាមរយៈនៃការធ្វើប្រតិភូ កម្មមុខងារផ្ដល់សេវារដ្ឋបាលប្រមាណជាង២០០ប្រភេទសេវា ពីក្រសួង-ស្ថាប័ន ចំនួន១០។ ក្នុងនោះខេត្តសៀមរាប បានដំណើរការការិយាល័យទាំង២នេះ បាននៅក្រុងសៀមរាប ស្រុកពួក ,ក្រឡាញ់, ជីក្រែង,ស្រុកសូទ្រនិគម និងស្រុកប្រាសាទបាគង លើ១២ក្រុង-ស្រុក ក្នុងខេត្តសៀមរាប។ ក្នុងថ្ងៃនេះត្រូវបានបើកសម្ពោធដាក់ឲ្យដំណើរការនៅការិយាល័យច្រកចេញចូលតែមួយ និងការិយា ល័យប្រជាពលរដ្ឋនៅស្រុកបន្ទាយស្រីមួយថែមទៀត។
ម្យ៉ាងទៀតស្រុកដែលមិនទាន់បានដាក់ ឲ្យដំណើរការ គឺត្រូវប្រើនូវយន្តការ ហើយនៅពេលខាងមុខស្រុកមួយចំនួនទៀត នឹងគ្រោងបើក ឲ្យដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋផងដែរ។ ក្នុងឆ្នាំ២០១៩កន្លងទៅនេះ រដ្ឋបាលខេត្តសៀមរាបបានទទួលសេវាសរុប បានចំនួន១៦ ១៦២សេវា ក្នុងនេះទំហំទឹកប្រាក់ចំណូលសេវា មានប្រមាណជាង ៥ ៤៤៦លានរៀល លើវិស័យចំនួន១៣ ហើយរដ្ឋបាលក្រុង-ស្រុក ដែលបានផ្តល់សេវាតាមរយៈការិយាល័យច្រកចេញចូលតែមួយ បានចំនួន ១០៤ ១៣៧សេវា ដែលមានទឹកប្រាក់ប្រមាណ ១ ១១១លានរៀល។
លោកបានបញ្ជាក់ថា ការិយាល័យច្រកចេញចូលតែមួយ និងការិយាល័យប្រជាពលរដ្ឋដែលបង្កើតឡើងនៅតាមក្រុងស្រុក បានកំពុងប្រតិបត្តិការផ្តល់សេវារដ្ឋបាល និងសម្រុះសម្រួលដោះស្រាយបណ្តឹងជូនប្រជាពលរដ្ឋ ស្របតាមគោលការណ៍ បែបបទ និងនីតិវិធីដែលបានកំណត់ និង បានបង្កភាពងាយស្រួលជូន ប្រជាពលរដ្ឋមកស្នើសុំ និងផ្តល់សេវារដ្ឋបាលបានទាន់ពេលវេលា ព្រមទាំងបានប្រមូលចំណូល ចូលថវិកាជាតិនូវកម្រៃពីការផ្តល់សេវារដ្ឋបាលទាំងនេះប្រកបដោយតម្លាភាព ប្រសិទ្ធភាព និង រួមចំណែកទប់ស្កាត់នូវអំពើពុករលួយផងដែរ។
តាមរយៈការិយាល័យច្រកចេញចូលតែមួយ នៅថ្នាក់ស្រុក ជាការជំរុញដ៏ចាំបាច់ក្នុងការបង្ខិតសេវាសាធារណៈឲ្យរឹតតែនៅកៀកប្រជាពលរដ្ឋ និង បង្កភាពងាយស្រួលក្នុងការផ្តល់សេវាជូនប្រជាពលរដ្ឋឲ្យបានឆាប់រហ័ស ប្រកបដោយប្រសិទ្ធភាព គុណភាព តម្លាភាព និងឆ្លើយតបទាន់ពេលវេលា៕ ដោយ ៖ ច័ន្ទ រស្មី
ចែករំលែកព័តមាននេះ