ខេត្តព្រះសីហនុ ៖ ក្រុមការងារទ្រទ្រង់ វិស័យអប់រំ នៅខេត្តព្រះសីហនុ មានសមាសភាពមកពីក្រសួងអប់រំ យុវជន និងកីឡា និងក្រសួងបរិស្ថាន មានគម្រោងជួយសាលាសាធារណៈ អោយក្លាយជាសាលាគំរូ និងសាលាមេត្រីភាពបរិស្ថាន ដើម្បីលើកកំពស់គុណភាពអប់រំនិងពង្រឹងធនធានមនុស្ស ស្របពេលខេត្តនេះ ត្រូវបានរាជរដ្ឋាភិបាលបាន ចាត់ទុកថាជាប៉ូលសេដ្ឋកិច្ចសំខាន់ និងជាតំបន់សេដ្ឋកិច្ចពិសេសគំរូពហុបំណងរបស់កម្ពុជា។
នៅរសៀលថ្ងៃទី ២៥ ខែមិថុនា ឆ្នាំ២០២០នេះ ដើម្បីឆ្លើយតបនឹងបំណង់ប្រាថ្នាដ៏មុតស្រួចនេះ តំណាងថ្នាក់ដឹកនាំទាំងអស់ និងរដ្ឋបាលខេត្តព្រះសីហនុ ដោយកិច្ចប្រជុំនេះបានផ្តោតសំខាន់លើចំណុចពីរយ៉ាង គឺទី១ ការជ្រើសរើសសាលាគំរូ និងទី២ ការកសាងសាលាមេត្រីបរិស្ថាន នៅខេត្តព្រះសីហនុ។
ក្នុងឱកាសនេះដែរ សូចនាករណ៍ និងលក្ខណៈវិនិច្ឆ័យជាច្រើន ក៏ត្រូវបានលើកបង្ហាញដល់មន្ត្រីដែលមានភារកិច្ចក្នុងការងារនេះ ឱ្យបានយល់និងជជែកពិភាក្សាគ្នា ដើម្បីឈានទៅដំណើរការផែនការនេះ ក្នុងពេលឆាប់ៗនេះ ស្របតាមចក្ខុវិស័យ និងផែនការជាក់លាក់មួយ។
លោក ម៉ាង ស៊ីណេត អភិបាលរងខេត្តព្រះសីហនុ គូសបញ្ជាក់ថា «បច្ចុប្បន្ន ខេត្តព្រះសីហនុ កំពុងទទួលបាននូវការអភិវឌ្ឍយ៉ាងខ្លាំងក្លា និងប្រកបដោយសក្តានុពល។ ក្រោមចក្ខុវិស័យ ដ៏វែងឆ្ងាយ ខេត្តជាប់មាត់សមុទ្រមួយនេះកំពុង ស្តារនូវប្រពន្ធ័ហេដ្ឋារចនាសម្ព័ន្ធនានា មានផ្លូវថ្នល់ ប្រឡាយទឹក អាងចម្រោះទឹកស្អុយ ដើម្បីការពារកុំអោយទឹកកខ្វក់ហូរចូលសមុទ្រ ការរៀបចំបណ្តាញទឹកស្អាត បណ្តាញអគ្គីសនី។ ការគ្រប់គ្រងសំណល់រឹងរាវ ការកែលម្អសោភ័ណ្ឌភាពតាមដងផ្លូវ តំបន់ឆ្នេរ និងវិស័យមួយចំនួនទៀតផងដែរ ដើម្បីធ្វើអោយខេត្តនេះ កាន់តែមានការទាក់ទាញការវិនិយោគពហុវិស័យ»។
ទន្ទឹមនេះ ការកសាងធនធានមនុស្ស ក៏ជាផ្នែកមួយសំខាន់ ដែលយើងត្រូវគិតគូជាចំបងផងដែរ ធ្វើយ៉ាងណា អោយយុវជននៅខេត្តព្រះសីហនុ ទទួលបានការបណ្តុះបណ្តាលជំនាញវិជ្ជាជីវៈនិងមានលទ្ធភាពទទួលបានឱកាសការងារច្រើននៅក្នុងខេត្ត។
លោក ម៉ាង ស៊ីណេត បានជម្រុញលើកទឹកចិត្ត ដល់មន្ត្រីអប់រំទាំងអស់ ត្រូវចូលរួមអោយបានសកម្ម ក្នុងបុព្វហេតុលើកកំពស់គុណភាពអប់រំនៅក្នុងខេត្តនេះ។
លោកស្រី ឃុន រចនា អនុរដ្ឋលេខាធិការ ក្រសួងអប់រំយុវជននិងកីឡា បានថ្លែងថា «រដ្ឋមន្ត្រីក្រសួង និងអភិបាលខេត្តនេះ តែងតែបានយកចិត្តទុកដាក់ និងគាំទ្រយ៉ាងពេញលេញ ក្នុងការកសាងធនធានមនុស្ស នៅក្នុងខេត្តនេះ» ។
លោកស្រីបានបន្ថែមថា នៅថ្ងៃអនាគត ក្រសួងអប់រំ គ្រោងបង្កើតអោយមាន សាលាវិទ្យាល័យទូទៅជំនាន់ថ្មី និងសាលាវិទ្យាល័យចំនេះទូទៅបច្ចេកទេស និងប្រែក្លាយថ្នាក់ឧត្តមសិក្សា ដើម្បីអោយមានក្នុងការសិក្សាមុខជំនាញផ្សេងៗ ឆ្លើយតបតាមតម្រូវការ នៃការអភិវឌ្ឃសេដ្ឋកិច្ចសង្គម។
ជាមួយគ្នានេះដែរ លោកសុខ គាង អនុរដ្ឋលេខាធិការក្រសួងបរិស្ថាន និងជាប្រធានក្រុមការងារ ពង្រឹងវិស័យអប់រំ នៃក្រុមការងាររាជរដ្ឋាភិបាល បានបង្ហាញសុឆន្ទៈមុះមុត ក្នុងបេសកកម្មធ្វើអោយប្រសើរឡើង នៃគុណភាពអប់រំនៅខេត្តព្រះសីហនុ ដើម្បីជាការពង្រឹងការសិក្សា របស់សិស្សទាំងចំណេះទូទៅ និងថ្នាក់ជំនាញវិជ្ជាជីវៈសំដៅធ្វើយ៉ាងណាអោយយុវជននៅខេត្តនេះ កាន់តែមានឱកាសទទួលបានការងារល្អ។
លោក សុខ គាង រំពឹងថាតាមរយៈការបង្កើតអោយមានការជ្រើសរើសសាលាគំរូ និងសាលាមេត្រីបរិស្ថាននៅខេត្តព្រះសីហនុ នាពេលនេះនឹងជួយធ្វើអោយយុវជននៅទីនេះកាន់តែមានលទ្ធភាព មានថាមពលស្របពេលដែលខេត្តព្រះសីហនុ កំពុងឈានឆ្ពោះទៅមុខជា ខេត្តប៉ូលសេដ្ឋកិច្ចដ៏សំខាន់របស់កម្ពុជា៕
ចែករំលែកព័តមាននេះ