ខេត្តកំពង់ចាម ៖ អាជ្ញាធរខេត្ត បានសម្រេចយកដីទួលសុវត្ថិភាពចំប៉ី នៅភូមិថ្មី ឃុំកោះរកា ស្រុកកំពង់សៀម ដែលមានទំហំលើសពី១ហិកតា រក្សាទុកជាដីសាធារណៈរបស់រដ្ឋ ដោយមិនឲ្យធ្លាក់ទៅក្នុងដៃឈ្មួញណាម្នាក់នោះទេ…
ខេត្តកំពង់ចាម ៖ អាជ្ញាធរខេត្ត បានសម្រេចយកដីទួលសុវត្ថិភាពចំប៉ី នៅភូមិថ្មី ឃុំកោះរកា ស្រុកកំពង់សៀម ដែលមានទំហំលើសពី១ហិកតា រក្សាទុកជាដីសាធារណៈរបស់រដ្ឋ ដោយមិនឲ្យធ្លាក់ទៅក្នុងដៃឈ្មួញណាម្នាក់នោះទេ ។
រហូតមកដល់ព្រឹកថ្ងៃទី២៣ ខែមិថុនា ឆ្នាំ២០២០ ឯកឧត្តម អ៊ុន ចាន់ដា អភិបាលខេត្តរួមនឹងសហការី បានអញ្ជើញទៅពិនិត្យដោយផ្ទាល់ ហើយប្រជាពលរដ្ឋចំនួន២៤គ្រួសារបានយល់ព្រមបរិច្ចាគដីក្នុងមួយគ្រួសារ២០%ជូនអាជ្ញាធរ ដើម្បីពង្រីកទីទួលសុវត្ថិភាពសម្រាប់ឲ្យប្រជាពលរដ្ឋដែលរងគ្រោះដោយទឹកជំនន់ពីទន្លេមេគង្គ មកស្នាក់នៅទីនេះជាបណ្ដោះអាសន្ន ។
អ្នកស្រី រ៉េត សុភា អាយុ៤៦ឆ្នាំ នៅភូមិថ្មី ឃុំកោះរកា ផ្ទះរបស់គាត់នៅតាមជួរមាត់ទន្លេ ហើយពីមួយឆ្នាំទៅមួយឆ្នាំច្រាំងទន្លេបានបាក់ជាបន្តបន្ទាប់ ។ ការបាក់ខ្លាំងគឺនៅក្នុងឆ្នាំ២០១៨និងឆ្នាំ២០១៩ ហើយលំនៅឋានរបស់គាត់ត្រូវបានរុះរើមកនៅកន្លែងថ្មីដើម្បីធានាសុវត្ថិភាព។
ជាមួយនេះ អាជ្ញាធរក៏បានផ្ដល់ដីឲ្យមួយប្លង់នៅក្បែរទីទួលសុវត្ថិភាពចំប៉ី ។ ឯការបរិច្ចាគ២០% ពួកគាត់គាំទ្រចំពោះការដឹកនាំដោយភាពឈ្លាសវៃរបស់អភិបាលខេត្ត ។
ឯកឧត្តមអភិបាលខេត្ត អ៊ុន ចាន់ដា មានប្រសាសន៍ថា ដីទីទួលសុវត្ថិភាពចំប៉ី ក្នុងឃុំកោះរកា ស្រុកកំពង់សៀម កន្លងមកធ្លាប់មានបញ្ហាត្រូវបានលើកយកមកដោះស្រាយនៅសាលាខេត្តម្ដង ។ បន្ទាប់មក ក៏បានចាត់ឱ្យលោកកែវ នាឫទ្ធិ អភិបាលរងខេត្ត រួមនឹងសហការីចុះមកពិនិត្យដោយផ្ទាល់ ដើម្បីរកដំណោះស្រាយ សម្រាប់ជាគោលការណ៍របស់អាជ្ញាធរខេត្តគឺរក្សាដីទួលសុវត្ថិភាពចំប៉ី ឲ្យនៅជាសម្បត្តិសាធារណៈរបស់រដ្ឋ ដោយមិនឱ្យធ្លាក់ក្នុងដៃឈ្មួញណាម្នាក់ឡើយ ។
ឯកឧត្តមអភិបាលខេត្ត មានប្រសាសន៍ទៀតថា ចំពោះដីប្រជាពលរដ្ឋដែលអះអាងថា បានគ្រប់គ្រងនិងអាស្រ័យផលចាប់តាំងពីក្រោយឆ្នាំ១៩៧៩ នៅជុំវិញតំបន់ទីទួលសុវត្ថិភាពចំប៉ី គឺគ្រាន់តែមានសិទ្ធិអាស្រ័យផលនិងទទួលផលដំណាំតែប៉ុណ្ណោះ នៅខ្វះសិទ្ធិចាត់ចែងព្រោះមិនទាន់មានប្លង់រឹងកាន់កាប់ដី ។
ដោយឈរលើគោលការណ៍ឯកភាពគ្នា ប្រជាពលរដ្ឋទាំង២៤គ្រួសារ បានយល់ព្រមបរិច្ចាគដីក្នុងមួយគ្រួសារៗចំនួន២០% លើទំហំដីជាង៦ហិកតា ដើម្បីពង្រីកទីទួលសុវត្ថិភាពឲ្យបានធំបន្តិច សម្រាប់ជាប្រយោជន៍ដល់ប្រជាពលរដ្ឋដែលរងគ្រោះដោយទឹកជំនន់ពីទន្លេមេគង្គ ពួកគាត់នាំគ្នារួមនឹងសត្វពាហនៈមកស្នាក់នៅទីនេះជាបណ្ដោះអាសន្ន ។
ដំណោះស្រាយឈ្នះ ឈ្នះ នេះនឹងចាត់ឱ្យលោកប្រធានមន្ទីរសុរិយោដីខេត្ត រួមជាមួយនឹងភូមិបាលស្រុកកំពង់សៀម ចុះវាស់វែងដើម្បីធ្វើប្លង់រឹងជូនដល់ប្រជាពលរដ្ឋទាំង២៤គ្រួសារ ។
បងប្អូនដែលទទួលបានប្លង់ដីស្របច្បាប់ សូមកំុទាន់លក់ឲ្យឈ្មួញព្រោះថា បើលក់នៅពេលនេះបានតម្លៃថោក ដោយទុករង់ចាំបន្តិចសិនព្រោះជីវភាពរបស់យើងមិនទាន់មានការខ្វះខាតឯណា។
ជាមួយនេះ រដ្ឋបាលខេត្តបានធ្វើការសិក្សាដើម្បីចាក់ផ្លូវក្រាលកៅស៊ូមួយខ្សែក្នុងភូមិកំពង់រលីង សង្កាត់សំបួរមាស ក្រុងកំពង់ចាម កាត់តាមផ្លូវមុខទីទួលសុវត្ថិភាពចំប៉ី រហូតដល់តាមាងក្នុងស្រុកកំពង់សៀម ក្នុងពេលនោះដីនៅតំបន់នេះនឹងហក់ឡើងថ្លៃ អ្នកណាដែលបានលក់ថោក
ពិតជានឹងត្រូវស្ដាយក្រោយ ។ សូមរក្សាដីរបស់ខ្លួន និងផ្ទេរមរតកនេះជូនទៅកូនចៅនៅជំនាន់ក្រោយទៀត ។
ឯកឧត្តមអភិបាលខេត្តបញ្ជាក់ថា សូមបងប្អូនប្រជាពលរដ្ឋនាំគ្នាគាំទ្រដល់អាជ្ញាធរដែនដី ព្រោះថា ពេលដែលមានទុក្ខកង្វល់មកដល់មានតែអាជ្ញាធរនេះហើយដែលជាអ្នកចេញមុខដោះ
ស្រាយរាល់បញ្ហាផ្សេងៗ ។ ក្នុងពេលខាងមុខមានការបោះឆ្នោតឃុំ សង្កាត់ សូមជួយគាំទ្របោះឆ្នោតជូនគណបក្សប្រជាជនកម្ពុជា ដែលតែងតែចុះជួយប្រជាពលរដ្ឋនៅគ្រប់ទិសទីដោយមិនប្រកាន់និន្នាការនយោបាយ ពណ៌សម្បុរ ឬសាសនានោះទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ