ខេត្តប៉ៃលិន ៖ កម្ពុជានិងប្រទេសថៃកំពុងជំរុញសមត្ថភាពដឹកជញ្ជូនតាមព្រំដែនច្រកអន្តរជាតិព្រំ-បានផាកកាដ ឱ្យសកម្មឡើងវិញ តាមរយៈការកសាងស្ពានថ្មជំនួសស្ពានដែកសព្វថ្ងៃ។
ក្រសួងមហាផ្ទៃកម្ពុជាបានកំពុងពិនិត្យរៀបចំកិច្ចព្រមព្រៀងជាថ្មីរវាងកម្ពុជានិងប្រទេសថៃ ក្នុងការអភិវឌ្ឍន៍ច្រកអន្តរជាតិមួយនេះ ដែលស្ថិតនៅក្នុងខេត្តប៉ៃលិនរបស់កម្ពុជានិងខេត្តចន្ទបូរីរបស់ថៃ។
លោក សក់ សេដ្ឋា រដ្ឋលេខាធិការប្រចាំក្រសួងមហាផ្ទៃ បានដឹកនាំកិច្ចប្រជុំមួយ កាលពីថ្ងៃទី២៥ មិថុនា ឆ្នាំ២០២០ ដើម្បីពិនិត្យលើការកែសម្រួលកិច្ចព្រមព្រៀងរវាងកម្ពុជានិងថៃស្តីពីច្រកអន្តរជាតិនេះ។ លោកបានបញ្ជាក់ថា ភាគីថៃបានយល់ព្រមផ្ដល់ជំនួយខាងហិរញ្ញវត្ថុ និងការសាងសង់ស្ពានថ្មឆ្លងកាត់ព្រំដែននេះ ជំនួសឲ្យស្ពានដែលកំពុងមានបច្ចុប្បន្ន។
លោករដ្ឋលេខាធិការបានឲ្យដឹងថា រាជរដ្ឋាភិបាលកម្ពុជា និងថៃ បានឯកភាពគ្នារៀបចំសាងសង់ស្ពានថ្មី នៅច្រកព្រំដែនអន្តរជាតិព្រំ-បានផាកកាដ ដើម្បីពង្រឹងសមត្ថភាពដឹកជញ្ជូនទំនិញចេញ-ចូល និងការឆ្លងកាត់ព្រំដែនរបស់ប្រទេសទាំងពីរ។
សូមជម្រាបថា ដោយសារបញ្ហាជំងឺកូវីដ១៩ច្រកព្រំដែនផ្លូវគោករវាងកម្ពុជានិងបានបិទជាច្រើនខែមកហើយ។ កម្ពុជាបានស្នើសុំប្រទេសថៃបើកច្រកព្រំដែនប៉ោយប៉ែតឡើងវិញ កាលពីប៉ុន្មានថ្ងៃមុននេះ ដើម្បីឲ្យមានសកម្មភាពចេញចូលធ្វើពាណិជ្ជរវាងប្រជាជនប្រទេសទាំងពីរឡើងវិញ ប៉ុន្តែប្រទេសថៃថាការបើកច្រកព្រំដែនទំនងមិនអាចធ្វើបាននៅក្នុងពេលឆាប់ៗនេះទេ៕
ចែករំលែកព័តមាននេះ