រាជធានីភ្នំពេញ ៖ អាជ្ញាធរជាតិប្រយុទ្ធប្រឆាំងគ្រឿងញៀនបានធ្វើការដុតបំផ្លាញគ្រឿងញៀនជិត៥០០
គីឡូក្រាម ក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀននាព្រឹកថ្ងៃទី២៦ ខែមិថុនា ឆ្នាំ២០២ ០នេះ ។ ពិធីនេះធ្វើឡើងនៅសាលសន្និបាត និងពិព័រណ៍កោះពេជ្រ ក្រោមវត្តមានឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ព្រមទាំងមានការអញ្ជើញចូលរួមពីតំណាងក្រសួង ស្ថាប័ន និងថ្នាក់ដឹកនាំមកពីបណ្តារាជធានី-ខេត្តមួយចំនួនផងដែរ ។
អាជ្ញាធរជាតិប្រយុទ្ធប្រឆាំងគ្រឿងញៀនតែងតែរៀបចំការដុតបំផ្លាញគ្រឿងញៀន ដែលរឹបអូសបានពីឧ ក្រិដ្ឋជនជួញដូរគ្រឿងញៀន ក្នុងទិវាអន្តរជាតិប្រយុទ្ធប្រឆាំងគ្រឿងញៀននាពេលនេះ ។
យោងតាមរបាយការណ៍តុលាការរាជធានីភ្នំពេញដែលអានដោយលោក កែវ សុធា ព្រះរាជអាជ្ញានៃអយ្យការរាជធានីភ្នំពេញ ស្តីពីការដកហូត និងរឹបអូសគ្រឿងញៀនដុតបំផ្លាញចោល ក្នុងទិវាអន្តរជាតិប្រយុទ្ធប្រឆាំងគ្រឿងញៀន បានឲ្យដឹងថា ៖ ករណីពាក់ព័ន្ធនិងសំណុំរឿងគ្រឿងញៀន ក្នុងរយៈពេលមួយឆ្នាំ គិតពីថ្ងៃទី ២៦ ខែ មិថុនា ឆ្នាំ ២០១៩ ដល់ថ្ងៃទី ២៦ ខែ មិថុនា ឆ្នាំ ២០២០ មានដូចតទៅ ៖ ១-ករណីជួញដូរដោយខុសច្បាប់នូវសារធាតុញៀនចំនួន១២៤៥សំណុំរឿង ២-ករណីរក្សា ទុកដោយខុសច្បាប់នូវសារធាតុញៀនចំនួន ១៥១៩ សំណុំរឿង ៣-ករណីចាត់ចែង និង ផ្តល់ទីតាំងឲ្យប្រើប្រាស់ដោយខុសច្បាប់នូវសារធាតុញៀនចំនួន ២៥៩ សំណុំរឿង ។
៤-ករណីផលិតដោយខុសច្បាប់នូវសារធាតុញៀនចំនួន២សំណុំរឿង ៥-ករណីដឹកជញ្ជូនដោយខុសច្បាប់នូវសារធាតុញៀនចំនួន២០សំណុំរឿង ៦-ករណីប្រើប្រាស់ដោយខុសច្បាប់នូវសារធាតុញៀនចំនួន ២៦៣៥ សំណុំរឿង ដូច្នេះពាក់ព័ន្ធនឹងករណីសំណុំរឿងគ្រឿងញៀនខុសច្បាប់ ដែលសមត្ថកិច្ចសហការបង្ក្រាបបានក្នុង រយៈពេលមួយឆ្នាំ កន្លងទៅមានចំនួនសរុប ៥៦៨០ សំណុំរឿង ក្នុងនោះដកហូត និងរឹបអូសសារធាតុញៀន គ្រឿងញៀនពាក់ព័ន្ធរួមទាំងសារធាតុគីមីផ្សំគ្រឿងញៀនតាមអំណាចសាលក្រមដែលតម្រូវឱ្យដុតបំផ្លាញចោលនាពេលនេះមានចំនួន ៤៥៧,៤៦ គីឡូក្រាម ។
របាយការណ៍អាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា ៖ ក្នុងរយៈពេលប្រាំខែដើមឆ្នាំ២០២០នេះ ប្រឆាំងគ្រឿងញៀនខុសច្បាប់ លើកទី ៥ របស់រាជរដ្ឋាភិបាល (ពីថ្ងៃទី០១ ខែមករា ដល់ ថ្ងៃទី៣១ ខែឧសភា ឆ្នាំ២០២០) បង្ក្រាបបាន ៤.៥១០ ករណី ឃាត់ខ្លួនជនសង្ស័យ ៨.៩២៧នាក់ រឹបអូសគ្រឿងញៀន បានជាង ២០៩គីឡូក្រាម , វិធានការអប់រំផ្សព្វផ្សាយ ដោយបានគ្របដណ្តប់ទៅលើអ្នកមកទទួលយ័ក សារអប់រំចំនួនជាង ២លាន ១សែននាក់ , វិធានការព្យាបាល និងស្តារនីតិសម្បទាអ្នកញៀនគ្រឿងញៀន នឹងគ្រប់គ្រងបានអ្នកប្រើប្រាស់ និងអ្នកញៀនគ្រឿងញៀនចំនួនប្រមាណ ១ម៉ឺននាក់។
វិធានការរដ្ឋបាលអនុវត្តបានចំនួន ៦០៥លើក លើ០៩គោលដៅ និងបានធ្វើតេស្តរកសារធាតុញៀន លើមុខសញ្ញា មានតប្រយប្រើប្រាស់គ្រឿងញៀនមួយចំនួនធំ។ បានចូលរួមសហការសម្របសម្រួលអនុវត្តក្នុងភាពជាដៃគូ នៃកិច្ចសហប្រតិបត្តិការត្រីតពិនិត្យគ្រឿងញៀន តាមរយៈជំនួបពិភាក្សាការងារ ចូលរួមកិច្ចប្រជុំ វគ្គបណ្តុះបណ្តាលសិក្ខាសាលាទាំងក្នុងក្របខ័ណ្ឌ អនុតំបន់ តំបន់ និងអន្តរជាតិ ទាំងដោយផ្ទាល់ និងតាមប្រព័ន្ធអុិនធើរណែត ៕ (កែសម្រួលដោយ ៖ ធីតា)
ចែករំលែកព័តមាននេះ