ខេត្តត្បូងឃ្មុំ ៖ ប្រជាពលរដ្ឋរស់នៅភូមិសែនជ័យ ឃុំរំចេកស្រុកមេមត់ បាននាំគ្នារអ៊ូរទាំពីភ្លើងអគ្គិសនីរបស់ក្រុមហ៊ុនឯកជន ពិបាកប្រើរអាក់រអួល ព្រមទាំងបណ្ដាលឱ្យខូចខាតឧបករណ៍ប្រើប្រាស់ ក្នុងនោះរួមមាន ៖ ម៉ូទ័រ…
ខេត្តត្បូងឃ្មុំ ៖ ប្រជាពលរដ្ឋរស់នៅភូមិសែនជ័យ ឃុំរំចេកស្រុកមេមត់ បាននាំគ្នារអ៊ូរទាំពីភ្លើងអគ្គិសនីរបស់ក្រុមហ៊ុនឯកជន ពិបាកប្រើរអាក់រអួល ព្រមទាំងបណ្ដាលឱ្យខូចខាតឧបករណ៍ប្រើប្រាស់ ក្នុងនោះរួមមាន ៖ ម៉ូទ័រ កង្ហារ និងរបស់ប្រើប្រាស់បន្ទាប់បន្សំមួយចំនួនទៀត ជួនកាលដាច់ក្នុង១យប់ រហូតដល់១០ដងក៏មានដែរ គឺដូចភ្លើងស្តុបឆេះខូចអស់ឧបករណ៍ដែលប្រើចរន្ត។
បើតាមអ្នកម្នាក់ឈ្មោះលី អ៊ីសាក់ ភេទប្រុស អាយុ៣៣ឆ្នាំ រស់នៅភូមិ-ឃុំខាងលើប្រាប់ឲ្យ ដឹងថា ភ្លើងអគ្គិសនីគគីរ ដែលបានតភ្ជាប់ឱ្យប្រជាពលរដ្ឋរស់នៅក្នុងភូមិសែនជ័យ ប្រើ ប្រាស់ជាង៣០០គ្រួសារ ក្នុងពេលដំបូងៗ មិនមានបញ្ហាណាមួយកើតឡើងនោះទេ។ ម្នាក់ៗបាននាំគ្នាសរសើរដល់អាជ្ញាធរពាក់ព័ន្ធ ដែលបានយកចិត្តទុកដាក់ឲ្យប្រជាពលរដ្ឋរស់នៅតំបន់ដាច់ស្រយាលមានអគ្គិសនីប្រើប្រាស់នឹងគេ លុះមកដល់ពេលនេះស្រាប់តែអន់ចង់អស់សាច់។
អ្នកភូមិរូបនេះក៏បានរៀបរាប់បន្តទៀតថា ចាប់តាំងពីប្រើប្រាស់ភ្លើងអគ្គិសនីឯកជននេះរហូតមកដល់សព្វថ្ងៃមានរយៈពេលប្រមាណ៤ឆ្នាំមកហើយ តែមួយរយៈពេលចុងក្រោយនេះនៅក្នុងឆ្នាំ២០២០ ភ្លើងបានចាប់ផ្ដើមចុះខ្សោយ រអាក់រអួលធ្វើឱ្យឧបករណ៍ប្រើប្រាស់រួមមាន ៖ កង្ហារ ម៉ូទ័របូមទឹក… ដោយក្នុងមួយផ្ទះកង្ហារខូច៣ ទៅ៤គ្រឿង តាមរយៈការយកនាឡិកាមកស្ទង់ភ្លើងរដ្ឋមកមិនដល់២២០វ៉ុល នោះទេ។
ដោយមើលឃើញកត្តាបែបនេះប្រជាពលរដ្ឋនៅក្នុងភូមិបានស្នើសុំទៅអាជ្ញាធរមូលដ្ឋាន ដើម្បីឱ្យជួយដោះស្រាយ តែរហូតមកដល់ពេលនេះ នៅមិនទាន់មានដំណោះស្រាយណាមួយ ពោលគឺចង់ឲ្យភ្លើងអគ្គិសនីបានប្រើប្រាស់មានថាមពលដូចដើម មិនមានរអាក់រអួល។ ចំពោះតម្លៃភ្លើងវិញកាលពីដំបូងមួយគីឡូតម្លៃជាង ១.០០០រៀល លុះមកដល់សព្វថ្ងៃចុះនៅមួយគីឡូតម្លៃ៧០០រៀល។ ភ្លើងអគ្គិសនី ធ្វើទុក្ខមានរយៈពេល៤ទៅ៥ខែហើយ ។ ពួកគាត់មានចម្ងល់ភ្លើងអគ្គិសនី ដែលដាច់រអាក់រអួល ព្រមទាំងលោតកាបីនភ្លើង ល្ងាចឡើងនាំគ្នាទៅបើកកុងតាក់ ទើបលើមានប្រើប្រាស់វិញ។
សម្រាប់ជាសំណូមពររបស់ប្រជាពលរដ្ឋនៅក្នុងភូមិចង់បាន គឺធ្វើយ៉ាងណាឲ្យក្រុមហ៊ុនអគ្គិសនី និងអាជ្ញាធរពាក់ព័ន្ធជួយសម្រួលអោយថាមពលអគ្គិសនីគ្រប់ចំនួនប្រើប្រាស់បានធម្មតា នោះម្នាក់ៗសប្បាយចិត្តហើយ។
តំណាងក្រុមហ៊ុនអគ្គិសនីគគីរ ប្រាប់ឲ្យដឹងនៅព្រឹកថ្ងៃទី២៦ មិថុនា២០២០ថា ក្រុមហ៊ុនបានដាក់ឧបករណ៍ត្រង់ហ្វូម៉ូណូកម្លាំង៥០ សម្រាប់ឲ្យប្រជាពលរដ្ឋនៅភូមិសែនជ័យ ឃុំរំចេក ស្រុកមេមត់ ប្រើប្រាស់ក្នុងគ្រាដំបូងមិនមានបញ្ហាណាមួយចោទឡើងនោះទេ។ តែដោយសារតម្រូវការតាមគ្រួសារនីមួយៗ បានប្រើប្រាស់ឧបករណ៍អគ្គិសនីជាច្រើនលើសពីកម្លាំងអគ្គិសនី ដែលចែកចាយ ទើបជាហេតុបណ្ដាលឲ្យភ្លើងចុះខ្សោយ ហើយណាមួយតំបន់ខាងលើនៅចុងទីគេ ។
តំណាងក្រុមហ៊ុនអគ្គិសនីគគីរ ប្រាប់បន្តឲ្យដឹងទៀតថា ដោយមានសំណូមពរពីអតិថិជនប្រើប្រាស់អគ្គិសនី ក្រុមហ៊ុនរបស់គាត់ក៏បានស្នើសុំទៅអគ្គិសនីកម្ពុជា ហើយក៏មានមន្ត្រីបានចុះមកពិនិត្យចំនួន៣ដង នៅមិនទាន់មានការឆ្លើយតបពេលវេលាណាមួយ ដើម្បីយកឧបករណ៍ថ្មីមកបំពាក់។ ហើយឯកសារដែលបានដាក់ជូនទៅក៏ច្រើនលើកច្រើនសារទៀត ផង។ ដើម្បីបញ្ចៀសកុំឱ្យប្រជាពលរដ្ឋរអ៊ូរទាំពីការប្រើប្រាស់ភ្លើងអគ្គិសនីក្រុមហ៊ុនគ្រោងដាក់ត្រង់ហ្វូថ្មី កំលាំង (១០០ទ្រី)នោះ នឹងលែងជាបញ្ហាចោទទៀតហើយ៕
ចែករំលែកព័តមាននេះ