ផលប៉ះពាល់ដែលបង្កឡើងព្រោះតែកូវីដ ១៩ បានផ្តល់ជាសម្ភាធដល់មនុស្សគ្រប់គ្រាន់ហើយ ដូច្នេះមនុស្សជាច្រើនប្រហែលជាមិនមានចំណាប់អារម្មណ៍ក្នុងការគិតពីបញ្ហាហិរញ្ញវត្ថុដែលខ្លួនមានទេ។ ប៉ុន្តែប្រសិនបើអ្នកមានសមត្ថភាពខ្ពស់ក្នុងការសន្សំលុយ អ្នកអាចក្រោកឈរពីស្ថានការមិនប្រាកដប្រជានេះបានលឿនជាងអ្នកដទៃ។
មិនថាអ្នកកំពុងស្ថិតក្នុងស្ថានការហិរញ្ញវត្ថុបែបណាទេ ប្រសិនបើអ្នកចង់សន្សំលុយឲ្យបានជោគជ័យ ចូរពិចារណាលើដំបូន្មានដែលមានដូចខាងក្រោមនេះ៖
១. ពិនិត្យមើលគោលដៅឡើងវិញ
ការកំណត់ចំនួនសន្សំជារៀងរាល់ខែគឺពិតជាសំខាន់ណាស់ប្រសិនបើអ្នកចង់សន្សំលុយឲ្យបានជោគជ័យ ប៉ុន្តែប្រសិនបើប្រាក់ចំណូលរបស់អ្នកមានការផ្លាស់ប្តូរ នោះអ្នកក៏ត្រូវកែសម្រួលគោលដៅសន្សំរបស់អ្នកដែរ។ ប្រសិនបើអ្នកមិនមានសមត្ថភាពក្នុងការសន្សំក្នុងចំនួនដែលធ្លាប់បានកំណត់ពីមុនមកទេ អ្នកគួរតែកាត់បន្ថយតាមស្ថានការដែលអ្នកកំពុងស្ថិតក្នុង។ ចូរចងចាំថា ទម្លាប់សន្សំលុយមានសារៈសំខាន់ជាងចំនួនដែលអ្នកសន្សំ។
២. កុំប្រើលុយសន្សំដោយមិនមានផែនការច្បាស់លាស់
ប្រសិនបើអ្នកមានប្រាក់សន្សំទុកសម្រាប់ពេលមានអាសន្ន អ្នកគួរតែប្រើវាពេលដែលអ្នកខ្វះខាត ប៉ុន្តែអ្នកត្រូវវិភាគពីចំនួនដែលអ្នកត្រូវការជាមុនសិនមុនពេលសម្រេចចិត្តប្រើវា និងកត់ត្រាទុកនូវអ្វីដែលអ្នកចំណាយលើ។
ពេលដែលស្ថានការនឹងធឹងវិញហើយ អ្នកនឹងត្រូវសន្សំលុយទុកសាជាថ្មី ហើយអ្នកត្រូវតែមានសមត្ថភាពក្នុងការគ្រប់គ្រងវាដែរ។ អ្នកគួរតែកំណត់ចំនួនលុយដែលអ្នកចង់ទុកដាច់ខាតក្នុងគណនីសន្សំដើម្បីឲ្យអ្នកស្ងប់អារម្មណ៍។
៣. កុំដកលុយសន្សំញឹកញាប់ពេក
អ្នកត្រូវតាមដានលើការដកលុយសន្សំឲ្យបានដិតដល់។ ពេលដែលអ្នកជួបការខ្វះខាតផ្នែកលុយ អ្នកត្រូវវិភាគមើលថាមូលហេតុអ្វីបានជាអ្នកមិនមានលុយគ្រប់គ្រាន់សម្រាប់ការចាយវាយ។ វាអាចមកពីអ្នកព្យាយានសន្សំលុយច្រើនពេករហូតអ្នកមិនមានថវិកាគ្រប់គ្រាន់សម្រាប់ការចាយវាយ ឬវាអាចមកពីទម្លាប់ចាយវាយខ្ជះខ្ជាយដែលអ្នកត្រូវបញ្ឈប់ឬកាត់បន្ថយជាដើម ៕
ចែករំលែកព័តមាននេះ