ខេត្តកំពង់ឆ្នាំង ៖ សំណុំរឿងគ្រឿងញៀន និងវត្ថុតាងថ្នាំញៀនចំនួន១៨២ករណី ត្រូវបានធ្វើពិធីបើកត្រួត ពិនិត្យ មុនឈានដល់ធ្វើការដុតកំទេចចោល ។ ពិធីនេះធ្វើឡើងនៅក្នុងសាលប្រជុំសាលាដំបូងខេត្តកំពង់ឆ្នាំង កាលពីរសៀលថ្ងៃទី២៤…
ខេត្តកំពង់ឆ្នាំង ៖ សំណុំរឿងគ្រឿងញៀន និងវត្ថុតាងថ្នាំញៀនចំនួន១៨២ករណី ត្រូវបានធ្វើពិធីបើកត្រួត ពិនិត្យ មុនឈានដល់ធ្វើការដុតកំទេចចោល ។ ពិធីនេះធ្វើឡើងនៅក្នុងសាលប្រជុំសាលាដំបូងខេត្តកំពង់ឆ្នាំង កាលពីរសៀលថ្ងៃទី២៤ ខែមិថុនា ឆ្នាំ២០២០ ក្រោមអធិបតីភាពលោកជំទាវ ប៊ន សុភី អភិបាលរងខេត្តកំពង់ឆ្នាំង និងមានការចូលរួមពីលោកប្រធានសាលាដំបូងខេត្ត ព្រះរាជអាជ្ញានៃអយ្យការអមសាលាដំបូងខេត្ត មន្ត្រីនគរបាល កងរាជអាវុធហត្ត និងមន្ត្រីនៃសាលាដំបូងខេត្តកំពង់ឆ្នាំងជាច្រើនរូបទៀត ។
ព្រះរាជអាជ្ញាអមសាលាដំបូងខេត្តកំពង់ឆ្នាំង លោក អ៊ិត សុធា បានបញ្ជាក់ប្រាប់អ្នកសារព័ត៌មានឱ្យដឹងថា យោងតាមសេចក្តីសម្រេចស្តីពីការបង្កើតកម្មការពិនិត្យបើកកញ្ចប់គ្រឿងញៀនចំនួន១៨២សំណុំរឿង ដែលបាន របអូសពីជនសង្ស័យកន្លងមក ដើម្បីពិនិត្យគ្រឿងញៀនជាក់ស្តែង នឹងត្រៀមដុតកំទេចនៅថ្ងៃខាងមុខ។ ថ្ងៃនេះ យើងធ្វើការបើកកញ្ចប់សំណុំរឿង ដើម្បីធ្វើការត្រួតពិនិត្យ ទាំងសំណុំរឿង ទាំងវត្ថុតាងឱ្យបានជាក់លាក់ ដើម្បីត្រៀមធ្វើការដុតកំទេចចោលនាពេលខាងមុខនេះ ។
លោកព្រះរាជអាជ្ញាអមសាលាដំបូងខេត្តកំពង់ឆ្នាំងបានបន្តថា សំណុំរឿង និងគ្រឿងញៀនទាំងនេះ ត្រូវបានសមត្ថកិច្ចរឹបអូសពីជនសង្ស័យ គ្រាដែលបានជួញដូរចែកចាយ និងប្រើប្រាស់ ហើយត្រូវសមត្ថកិច្ចធ្វើការបង្ក្រាបក្នុងរយៈពេលកន្លងមក នៅតាមបណ្តាស្រុក ក្រុងទាំង៨ក្នុងខេត្តកំពង់ឆ្នាំង ហើយត្រូវបាន រឹបអូស និងយកមករក្សាទុកនៅកន្លែងមានសុវត្តិភាព ដែលថ្ងៃនេះ ក្រុមគណៈកម្មការបានបើកកញ្ចប់ដើម្បីត្រួតពិនិត្យមុនឈានដល់ការសម្រេចដុតកំទេចចោល ។
លោកព្រះរាជអាជ្ញាអមសាលាដំបូងខេត្តកំពង់ឆ្នាំង បានធ្វើការកោតសរសើរចំពោះ កិច្ចសហការ និងការខិតខំប្រឹងរបស់កម្លាំងស្នងការនគរបាលខេត្តកំពង់ឆ្នាំង និងកម្លាំងកងរាជអាវុធហត្ថខេត្តកំពង់ឆ្នាំង រួមទាំងប្រជាពលរដ្ឋល្អ ដែលបានចូលធ្វើការពារទប់ស្កាត់ការជួញដូរ ចែកចាយ និងប្រើប្រាស់គ្រឿងញៀន នៅក្នុងមូលដ្ឋាន និងសហគមន៍ ក៏ដូចជាការចូលរួម គោរពអនុវត្តគោលនយោបាយភូមិឃុំមានសុវត្តិភាពទាំង៩ចំណុច លុបបំបាត់ចោលការប្រើប្រាស់ ជួញដូនិងចែកចាយគ្រឿងញៀននៅក្នុងមូលដ្ឋានរបស់ខ្លួន ។
តាមការបញ្ជាក់ពីលោក ពៅ ស៊ីផាន់ ប្រធានការិយាល័យ ប្រឆាំងបទល្មើសគ្រឿងញៀនរបស់ស្នងការនគរបាលខេត្តកំពង់ឆ្នាំងបានឱ្យដឹងថា ពិធីបើកកញ្ចប់សំណុំរឿងគ្រឿងញៀនទាំង១៨២ករណីនៅមិនទាន់បញ្ចប់នៅឡើយទេកាលពីរសៀលថ្ងៃទី២៤ មិថុនា ។ ក្រុមគណៈកម្មការនឹងបន្តធ្វើនៅព្រឹកថ្ងៃទី២៥ ខែមិថុនា នេះបន្តទៀត រហូតដល់អស់ ទើបបិទបញ្ចប់ ។ ចំពោះសំណុំរឿងដែលមានការប្តឹងទាស់ទៅសាលាឧទ្ឋរ គឺត្រូវរក្សាទុកបន្តទៀត ។ ដោយឡែកចំពោះសំណុំរឿងដែលត្រូវបានប្រកាសសាលក្រមជាស្ថាពរ ទើបគណៈកម្មការរៀបចំធ្វើការដុតកំទេចចោល ៕ (កែសម្រួលដោយ ៖ ធីតា)
ចែករំលែកព័តមាននេះ