ខេត្តបាត់ដំបង ៖ ស្ត្រីម្នាក់ដែលគេអះអាងថា មានផ្ទៃពោះ៣ខែផងត្រូវប្រជាពលរដ្ឋចាប់ក្របួច.កផ្អើលពេញផ្សារ រួចប្រគល់ឱ្យសមត្ថកិច្ចវាយខ្នោះដៃភ្លាមៗ ក្រោយពីស្ត្រីរូបនេះធ្វើសកម្មភាពលួចយកទូរស័ព្ទមួយគ្រឿងពីក្នុងកាបូបស្ត្រីម្នាក់ កាលពីវេលាម៉ោង០៧និង៤០នាទីព្រឹកថ្ងៃទី២៥ មិថុនា នៅម្ដុំស្ដង់លក់បន្លែ ស្ថិតនៅក្នុងផ្សារបឹងឈូក ក្នុងសង្កាត់ស្វាយប៉ោ ក្រុងបាត់ដំបង ខណ:ដែលជនរងគ្រោះកំពុងដើរទិញបន្លែ។
ជនសង្ស័យរូបនេះឈ្មោះ អ៊ូច សុខលីន ភេទស្រី អាយុ២៨ឆ្នាំ ស្នាក់នៅផ្ទះជួល ក្នុងភូមិសូភី២ សង្កាត់រតន: ក្រុងបាត់ដំបង ។ សមត្ថកិច្ចបានប្រាប់ថា ស្ត្រីរូបនេះ ត្រូវម្ចាស់ទូរស័ព្ទនិងប្រជាពលរដ្ឋចាប់ក្របួច.កជាប់ភ្លាមៗ ជាមួយនឹងវត្ថុតាង(ទូរស័ព្ទ)នៅក្នុងដៃ។ ហើយបន្ទាប់មកក៏បានប្រគល់ស្ត្រីដៃដល់នេះឱ្យទៅមន្ត្រីនគរបាលការិយាល័យព្រហ្មទណ្ឌកំរិតធ្ងន់ចាត់វិធានការតែម្ដង។
បើតាមប្រភពនៅកន្លែងកើតហេតុបានឱ្យដឹងថា ស្ត្រីដៃដល់បានដើរតាមពីក្រោយជនរងគ្រោះ ហើយឆក់ឱកាសនោះ ជនសង្ស័យបានប្រថុយលូកយកទូរស័ព្ឌនៅក្នុងកាបូបជនរងគ្រោះយ៉ាងរហ័សដៃបំផុត រួចញាត់ទុកទៅក្នុងកាបូបរបស់ខ្លួន។ ប៉ុន្តែចៃដន្យពេលនោះ ម្ចាស់ទូរស័ព្ទក៏បានដឹង ហើយក្របួច.កស្ត្រីដៃរហ័សនេះជាប់ភ្លាមៗដែរ។ បើតាមប្រភពដដែលបានបញ្ជាក់ថា ជាមួយនឹងការចាប់ជាប់ក្ដៅៗបែបនេះ ម្ចាស់ទូរស័ព្ទនិងមហាជនក៏បានឆែករកឃើញទូរស័ព្ទនៅក្នុងបាតកាបូបស្ត្រីដៃដល់ និង បានទូរស័ព្ទហៅសមត្ថកិច្ចឱ្យអន្តរាគមន៏ភ្លាមៗដែរ។
នៅកន្លែងកើតហេតុ គេឃើញមនុស្សជាច្រើនបានចោមរោមមើល ស្ត្រីដៃដល់យ៉ាងណែនតាន់តាប់ ស្របពេលសមត្ថកិច្ចបានចាប់ដៃស្ត្រីរូបនេះវាយខ្នេះ។ បើតាមព័ត៌មានថា ស្ត្រីរូបនេះ(ជនសង្ស័យ)មានផ្ទៃពោះខែ និង មានកូនម្នាក់ទៀតអាយុ៣ឆ្នាំ តែគេមិនបានប្រាប់អត្តសញ្ញាណប្ដីរបស់ស្ត្រីដៃឆើតម្នាក់នេះទេ។ មន្ត្រី ការិយាល័យព្រហ្មទណ្ឌកំរិតធ្ងន់ បានប្រាប់ថា ក្រោយឃាត់ខ្លួន មន្ត្រីជំនាញបានបញ្ជូនស្ត្រីរូបនេះទៅកាន់ស្នងការខេត្ត ដើម្បីសួរនាំ។
សមត្ថកិច្ចបានបញ្ជាក់ថា ពេលនេះមន្ត្រីជំនាញកំពុងសួរនាំជនសង្ស័យ ហើយបើតាមគោលការ លោកស្នងការខេត្តបានបញ្ជាឱ្យមន្ត្រីជំនាញកសាងសំណុំរឿងបញ្ជូនស្ត្រីពរពោះ៣ខែនេះ ទៅតុលាការចាត់ការតាមនីតិវិធីច្បាប់ហើយ ៕
ចែករំលែកព័តមាននេះ