ប្រទេសថៃ ៖ ក្រុងលុបប៊ូរីថៃ ដែលមានពពួកស្វាជាច្រើនពាន់ក្បាលដែលមានសេរីភាព ពេលនេះ មិនបានទាក់ទាញទេសចរណ៍ដូចពេលមុនទៀតឡើយ តាំងពីមានការឆ្លងរាលដាលនៃវីរុសCOVID-19 មក ប៉ុន្តែផ្ទុយទៅវិញ បែរជាបង្កការរំខានដល់ប្រជាជន…
ប្រទេសថៃ ៖ ក្រុងលុបប៊ូរីថៃ ដែលមានពពួកស្វាជាច្រើនពាន់ក្បាលដែលមានសេរីភាព ពេលនេះ មិនបានទាក់ទាញទេសចរណ៍ដូចពេលមុនទៀតឡើយ តាំងពីមានការឆ្លងរាលដាលនៃវីរុសCOVID-19 មក ប៉ុន្តែផ្ទុយទៅវិញ បែរជាបង្កការរំខានដល់ប្រជាជន ដោយអុកឡុកត្រាច់ចរដើររកចំណី ដែលក្លាយទៅជាមិនអាចគ្រប់គ្រងបាន នាំឲ្យអាជ្ញាធរមានប្រតិកម្ម។
ពពួកស្វាក្រៅពីត្រាច់ចរអុកឡកតាមដងវិថី និងតាមហាង ព្រមទាំងផ្ទះទាំងឡាយ ដើម្បីរកចំណី ពួកវាថែមទាំងបានដើរអាចម៍តាមដងវិធី នាំឲ្យជះក្លិនស្អុយ ជាពិសេសពេលមានភ្លៀងធ្លាក់។
ក្រុងលុបប៊ូរី គឺជាអតីតរាជធានីខ្មែរ ស្ថិតនៅចម្ងាយប្រមាណជា១៥០គីឡូម៉ែត្រ ខាងជើងក្រុងបាងកក។ ក្នុងទីក្រុងនោះពាណិជ្ជករមួយចំនួនបានតាំងរូបខ្លា ឬរូបក្រពើ ដើម្បីបន្លាចពួកស្វាកុំឲ្យមកអុកឡុក។
រយៈពេល៣ឆ្នាំចុងក្រោយនេះ ចំនួនសត្វស្វានៅទីក្រុងនោះ មានការកើនឡើងទ្វេដងដល់ទៅប្រមាណជា៦.០០០ក្បាល រស់នៅជាមួយប្រជាជនក្រុងនេះដែលមាន២៧.០០០នាក់។ ចេញពីព្រៃធម្មជាតិដំបូងមករស់នៅជុំវិញវត្តមួយកណ្ដាលក្រុង ចំនួនស្វាមានកាន់តែច្រើន រាតត្បាតតាមដងវិថីក្បែរៗវត្ត រួចតែងលើកគ្នាមកក្បែរអគារ និងហាងនានា បង្វំឲ្យអាជីវករខ្លះបិទទ្វារហាង។
ពពួកហ្វូងស្វា ដែលជាអ្នកធ្លាប់ជួយទាក់ទាញភ្ញៀវទេសចរណ៍នៅក្រុងលុបប៊ូរី តាំងពីយូរមកហើយ ហើយក៏ទទួលការអនុគ្រោះពីសំណាក់ប្រជាជន ព្រោះពួកវាបានជួយទាក់ទាញភ្ញៀវទេសចរណ៍នាំឲ្យប្រជាជនរកចំណូលបានមិនតិចឡើយ។
បណ្ដាអ្នកទេសចរបរទេសតាមទម្លាប់ពេលមកលេងទីនោះ តែងឲ្យចំណីពួកស្វាស៊ី ដើម្បីបានថតរូប និងលេងកម្សាន្តជាមួយពួកវា។ ប៉ុន្តែចាប់តាំងពីថៃ បិទព្រំដែនមក បណ្តាលឱ្យដាច់អ្នកទេសចរដើរកម្សាន្ត និងឱ្យចំណីវា ទើបធ្វើឱ្យពពួកស្វាទាំងនេះក្លាយជាអត់ឃ្លាន ត្រាច់ចរដើររកចំណី។ បណ្ដារូបភាពនៃការរាតត្បាតរបស់ពួកវាត្រូវបានបង្ហាញតាមបណ្ដាសារព័ត៌មាន និងបណ្ដាញសង្គមនានា៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ