មនុស្សជាច្រើនមានគំនិតចង់បើកដំណើរការអាជីវកម្មផ្ទាល់ខ្លួន ប៉ុន្តែសម្រេចថាមិនធ្វើដូច្នេះព្រោះតែមិនមានធនធានគ្រប់គ្រាន់ ។ យ៉ាងណាក្តី មានអាជីវករជាច្រើនដែលអាចចាប់ផ្តើមអាជីវកម្មផ្ទាល់ខ្លួនបានដោយមិនចាំបាច់ចំណាយថវិកាបន្តិចឡើយ ។
ចំណុចសំខាន់ គឺផ្នត់គំនិតរបស់មនុស្ស ។ ប្រសិនបើអ្នកគិតថាអ្នកមិនអាចចាប់ផ្តើមអាជីវកម្មមួយដោយខ្លួនឯងបានទេនោះ លុយប៉ុន្មានក៏មិនអាចជួយឲ្យអ្នកជោគជ័យបានដែរ ។ខាងក្រោម គឺជាគន្លឹះសំខាន់ៗដែលជួយឲ្យអ្នកជោគជ័យក្នុងអាជីវកម្មដោយមិនចាំបាច់ត្រូវចំណាយលុយ ៖
១. កុំធ្វើវាតែម្នាក់ឯង
មិនថាអ្នកមានជំនាញ និងជំនឿចិត្តខ្ពស់ប៉ុនណាទេ អាជីវកម្មរបស់អ្នកមិនអាចរីកលូតលាស់បានលឿនឡើយប្រសិនបើអ្នកព្យាយាមធ្វើអ្វីគ្រប់យ៉ាងដោយខ្លួនឯង ។ អ្នកគួរតែចេះប្រើបទពិសោធន៍ ទំនាក់ទំនង និងមតិយោបល់របស់អ្នកដទៃដើម្បីសម្រេចការងារផ្សេងៗ ។
អ្នកអាចរកមនុស្សដែលមានបទពិសោធន៍ច្បាស់ក្នុងផ្នែកដែលទាក់ទិន និងសុំមតិយោបល់របស់ពួកគេលើគម្រោងការរបស់អ្នក ឬឲ្យពួកគេជួយណែនាំមនុស្សដែលអាចនឹងចាប់អារម្មណ៍ក្នុងការជួយអ្នកជាដើម ។
២. បង្កើតតម្រូវការជាមុនសិន
អ្នកមិនត្រូវសន្មត់ថា អ្នកនឹងមានអតិថិជនភ្លាមៗឲ្យតែអ្នកមានផលិតផលសម្រាប់លក់ទេ ។ ផ្ទុយមកវិញ មុនពេលចំណាយលុយលើផលិតផលអ្វីមួយ អ្នកត្រូវតែស្រាវជ្រាវឲ្យបានដិតដល់ជាមុនសិនថាតើមានតម្រូវការសម្រាប់អ្វីដែលអ្នកចង់លក់ទេ ។ អ្នកក៏អាចទទួលការកក់ជាមុនសិនបានដែរដើម្បីប្រមូលធនធានសម្រាប់ផលិតកម្ម ឬការកម្ម៉ង់ ។
៣. ចាប់ផ្តើមបន្តិចម្តងៗ
អ្វីៗគ្រប់យ៉ាងមិនអាចកើតមានឡើងក្នុងរយៈពេលមួយថ្ងៃបានទេ ។ ទោះជាអ្នកចាប់ផ្តើមអាជីវកម្មមួយក្នុងថ្ងៃនេះក៏មិនប្រាកដថាអ្នកនឹងជោគជ័យភ្លាមៗនៅថ្ងៃស្អែកទេ ។ អ្នកត្រូវលះបង់ពេលវេលា និងកម្លាំងជាច្រើនដើម្បីជួយធ្វើឲ្យអាជីវកម្មដើរទៅមុខបាន ។
ជាហេតុដូច្នេះ អ្នកមិនត្រូវលះបង់អ្វីៗគ្រប់យ៉ាងភ្លាមៗដើម្បីវិនិយោគលើអាជីវកម្មថ្មីរបស់អ្នកទេ ។ ផ្ទុយមកវិញ អ្នកគួរតែធ្វើវាបន្តិចម្តងៗរហូតអ្នកជឿជាក់ថាអ្នកអាចរកបានប្រាក់ចំណូលគ្រប់គ្រាន់សម្រាប់ការរស់នៅប្រចាំថ្ងៃពីអាជីវកម្មថ្មីនោះ ៕
ចែករំលែកព័តមាននេះ