ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា បុរសអាយុ២៥ឆ្នាំម្នាក់បានបើកម៉ូតូឆ្លងផ្លូវដោយដឹកបុរសម្នាក់ទៀត ហើយខ្វះការប្រុងប្រយ័ត្ន ក៏ស្រាប់តែត្រូវរថយន្តបើកបរក្នុងល្បឿនលឿនមកបុក បណ្តាលឱ្យបាត់បង់ជីវិតភ្លាមៗនៅហ្នឹងកន្លែងចំនួន២នាក់។ រីឯ អ្នកបើករថយន្តគេចខ្លួនបាត់បន្យល់ទុករថយន្តនៅកន្លែងកើតហេតុ បង្កការកកស្ទះចរាចរណ៍មួយសន្ទុះ។
សេចក្តីរាយការណ៍បន្តថា ហេតុការគ្រោះថ្នាក់ចរាចរណ៍ខាងលើនេះបានកើតឡើងនៅម៉ោង៩យប់ ថ្ងៃទី២៣ ខែមិថុនា ឆ្នាំ២០២០ នៅចំណុចលើផ្លូវជាតិលេខ៦ ចន្លោះគីឡូម៉ែត្រ ២៥១-២៥២ ស្ថិតនៅក្នុងភូមិពោធិសិរី ឃុំកំពង់ក្តី ស្រុកជីក្រែង ខេត្តសៀមរាប។
សេចក្តីរាយការណ៍បន្តថា ជនរងគ្រោះទាំង២នាក់ខាងលើ ១- ឈ្មោះ មុយ តែវ ភេទប្រុស អាយុ២៥ឆ្នាំ រស់នៅភូមិល្វា ឃុំស្ពានត្នោត ស្រុកជីក្រែង ខេត្តសៀមរាប ជាអ្នកបើកបរម៉ាកហុងដាឌ្រីមសេ១០០ ពាក់ផ្លាកលេខភ្នំពេញ 1J-2545 ពណ៌ខ្មៅ បាត់បង់ជីវិតនៅនឹងកន្លែងកើតហេតុ។ និង២- ឈ្មោះ តឿ ភេទប្រុស អាយុ២៦ឆ្នាំ ទីលំនៅស្រុកបារាយណ៍ ខេត្តកំពង់ធំ ជាអ្នករួមដំណើរ បានបាត់បង់ជីវិតពេលបញ្ជូនទៅពេទ្យ ។
បើតាមលោកអធិការនគរបាលស្រុកជីក្រែង បានប្រាប់នៅព្រឹកថ្ងៃទី២៣ ខែមិថុនានេះថា នៅស្រុកជីក្រែង មានករណីគ្រោះថ្នាក់ចរាចរណ៍រវាងរថយន្ត និងម៉ូតូត្រង់ចំណុចទល់មុខផ្ទះឈ្មោះ អ៊ាន ចិន្តា ស្ថិតនៅក្នុងភូមិពោធិសិរី ឃុំកំពង់ក្តី ស្រុកជីក្រែង ខេត្តសៀមរាប លើផ្លូវជាតិលេខ៦ ចន្លោះគីឡូម៉ែត្រ ២៥១-២៥២ ។
លោកបានបន្តថា ក្នុងករណីគ្រោះថ្នាក់ចរាចរណ៍ខាងលើនោះ គឺមុនពេលកើតហេតុ មានម៉ូតូមួយគ្រឿងម៉ាកហុងដាឌ្រីមសេ១០០ ដែលបើកបរបុរសម្នាក់អាយុ២៥ឆ្នាំ ហើយបានឌុបបុរសម្នាក់ទៀតដែលអង្គុយពីក្រោយដោយធ្វើដំណើរតាមផ្លូវក្នុងទិសដៅពីត្បូងទៅលិច លុះមកដល់ចំណុចកើតហេតុ ម៉ូតូជនរងគ្រោះបានបើកឆ្លងកាត់ផ្លូវដោយខ្វះការប្រុងប្រយ័ត្ន ក៏ស្រាប់តែមានរថយន្តមិនស្គាល់អត្តសញ្ញាណមួយគ្រឿងបានបើកពីកើតទៅលិច ក្នុងល្បឿនលឿនបានបើកបុកម៉ូតូជនរងគ្រោះយ៉ាងពេញទំហឹងតែម្តង បណ្តាលឱ្យជនរងគ្រោះជាអ្នកបើកបានបាត់បង់ជីវិតភ្លាមៗនៅនឹងកន្លែងកើតហេតុ ចំណែកបុរសម្នាក់ទៀតដែលជិះពីក្រោយរងរបួសធ្ងន់ធ្ងរ ក្រោយមកត្រូវបានបញ្ជូនទៅសង្គ្រោះបន្ទាន់មន្ទីរពេទ្យ ប៉ុន្តែជាអកុសលជនរងគ្រោះបានដាច់ខ្យល់ ខណៈពេលបញ្ជូនទៅពេទ្យបាត់ទៅហើយ ។ ចំណែកខូចខាតម៉ូតូជនរងគ្រោះខូចខាតយ៉ាងដំណំ រីឯម្ចាស់រថយន្តបង្កមិនស្គាល់អត្តសញ្ញាណនោះទេ ព្រោះក្រោយពេលកើតហេតុបានគេចខ្លួនទៅទិសខាងលិចបាត់ស្រមោល ។
ក្រោយពេលកើតហេតុ មន្ត្រីជំនាញបានចុះពិនិត្យ និងវាស់វែង រួចប្រគល់សពជនរងគ្រោះជូនក្រុមគ្រួសារធ្វើបុណ្យតាមប្រពៃណី។ ហើយបច្ចុប្បន្ននេះ វត្ថុតាងទាំងរថយន្តបង្ក និងម៉ូតូជនរងគ្រោះ ត្រូវបានកម្លាំងជំនាញដឹកយកមករក្សាទុកនៅអធិការដ្ឋាននគរបាលស្រុកជីក្រែង ដើម្បីរង់ចាំដោះស្រាយតាមផ្លូវច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ