ប្រេស៊ីល ៖ តាមប្រភពព័ត៌មាន CNN បានឱ្យដឹងថា ក្រសួងសុខាភិបាលប្រេស៊ីលបានរាយការណ៍ថា មានករណីឆ្លងជំងឺកូវីដ១៩ ថ្មីចំនួន ៣៩,៤៣៦ករណី ក្នុងរយៈពេល២៤ម៉ោងកន្លងមកនេះ ដែលជាចំនួនកើនឡើងខ្ពស់បំផុតទី២ ចាប់តាំងពីមានការរាតត្បាតនៃជំងឺនេះ។
ក្រសួងបាននិយាយកាលពីថ្ងៃអង្គារ៍ថា ចំនួនអ្នកឆ្លងសរុបដែលបានបញ្ជាក់នៅក្នុងប្រទេសឥឡូវនេះមានចំនួន ១,១៤៥,៩០៦នាក់។
ជាមួយគ្នានេះដែរ ក្រសួងក៏បានបន្ថែមទៀតផងដែរថា មានអ្នកបាត់បង់ជីវិតចំនួន ១,៣៧៤នាក់ ត្រូវបានគេរាយការណ៍ចាប់តាំងពីថ្ងៃម្សិលមិញ ដែលបាននាំយកចំនួនអ្នកដែលបានបាត់បង់ជីវិតជាផ្លូវការសរុប នៅប្រេស៊ីលដល់ ៥២,៦៤៥នាក់។ ចំនួនអ្នកបាត់បង់ជីវិតកាលពីថ្ងៃអង្គារ៍ គឺជាចំនួនខ្ពស់បំផុតប្រចាំថ្ងៃ លំដាប់ទី២ តាំងពីមុនៗមក។
ប្រទេសប្រេស៊ីលមានចំនួនអ្នកឆ្លងជំងឺកូវីដ១៩ ច្រើនជាងគេបំផុតនៅអាមេរិកឡាទីន និងខ្ពស់ជាងគេលំដាប់ទី២ នៅលើពិភពលោក បន្ទាប់ពីសហរដ្ឋអាមេរិក។ ករណីកើនឡើងប្រចាំថ្ងៃធំបំផុតរបស់ប្រទេសត្រូវបានគេរាយការណ៍ថា មានចំនួន ៥៤,៧៧១នាក់ នៅថ្ងៃទី១៩ ខែមិថុនា។ ចំនួនអ្នកបាត់បង់ជីវិតប្រចាំថ្ងៃធំបំផុតរបស់ខ្លួន ត្រូវបានគេរាយការណ៍ថា មានចំនួន ១,៤៧៣ នាក់នៅថ្ងៃទី៤ ខែមិថុនា៕ ដកស្រង់ចេញពីវេបសាយ ៖ cnn (កែសម្រួលដោយ ៖ បុប្ផា)
ចែករំលែកព័តមាននេះ