រាជធានីភ្នំពេញ ៖ រាជរដ្ឋាភិបាលកម្ពុជាមានទិសដៅប្រែក្លាយតំបន់ការពារធម្មជាតិទៅជាតំបន់ទេសចរណ៍ធម្មជាតិ បង្កើនសក្តានុពលទេសចរណ៍ និងធ្វើយ៉ាងណាឱ្យសហគមន៍មានចំណូលបន្ថែម ដើម្បីបង្កើតជម្រើសថ្មីសម្រាប់ការប្រកបមុខរបរចិញ្ចឹមជីវិតរបស់ប្រជាពលរដ្ឋក្នុងសហគមន៍ ។ នេះបើយោងតាមការលើកឡើងពីមន្ត្រីជាន់ខ្ពស់មួយរូបរបស់ក្រសួងបរិស្ថាន។ យោងតាមប្រសាសន៍ លោក…
រាជធានីភ្នំពេញ ៖ រាជរដ្ឋាភិបាលកម្ពុជាមានទិសដៅប្រែក្លាយតំបន់ការពារធម្មជាតិទៅជាតំបន់ទេសចរណ៍ធម្មជាតិ បង្កើនសក្តានុពលទេសចរណ៍ និងធ្វើយ៉ាងណាឱ្យសហគមន៍មានចំណូលបន្ថែម ដើម្បីបង្កើតជម្រើសថ្មីសម្រាប់ការប្រកបមុខរបរចិញ្ចឹមជីវិតរបស់ប្រជាពលរដ្ឋក្នុងសហគមន៍ ។ នេះបើយោងតាមការលើកឡើងពីមន្ត្រីជាន់ខ្ពស់មួយរូបរបស់ក្រសួងបរិស្ថាន។
យោងតាមប្រសាសន៍ លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានមានប្រសាសន៍នៅ ថ្ងៃទី ២៣ ខែមិថុនា នេះថា «ដើម្បីកាត់ផ្តាច់ពីការពឹងពាក់អាស្រ័យ លើអនុផលព្រៃឈើ ដែលជាទម្លាប់មានពីយូរលង់ណាស់មកហើយ របស់ប្រជាពលរដ្ឋនៅតាមសហគមន៍មូលដ្ឋាន រាជរដ្ឋាភិបាលមានទិសដៅដោយបង្កើតមុខរបរថ្មី បម្រើឱ្យវិស័យអេកូទេសចរណ៍ ព្រមទាំងការបណ្តុះបណ្តាលសហគមន៍ឱ្យចេះគ្រប់គ្រង និងការចិញ្ចឹមសត្វផ្គត់ផ្គង់ទីផ្សារ ការដាំដំណាំរួមផ្សំផ្សេងទៀត មានបន្លែបង្ការសម្រាប់ប្រើប្រាស់ប្រចាំថ្ងៃខ្លួនឯងផង និងសម្រាប់បម្រើសេវាកម្ម ដល់ភ្ញៀវទេសចរដែលទៅទស្សនាកម្សាន្តនៅក្នុងតំបន់ សហគមន៍របស់ពលរដ្ឋផងដែរ»។
លោកបានបន្ថែមថា ប្រទេសកម្ពុជាត្រូវបានគេទទួលស្គាល់ថា មានធនធានធម្មជាតិ និងជីវៈចម្រុះដ៏សំបូរបែប ហើយព្រៃឈើដើរតួនាទីយ៉ាងសំខាន់ក្នុងការធានាការ ផ្គត់ផ្គង់ទឹកនិងថាមពល កាត់បន្ថយផលប៉ះពាល់ពីគ្រោះមហន្តរាយធម្មជាតិ និងរួមចំណែកដល់ការកាត់បន្ថយការប្រែប្រួលអាកាសធាតុ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានលើកឡើងថា «ថ្មីៗនេះខ្ញុំសង្កេតឃើញថា មានបងប្អូនក្នុងស្រុកយើងចេញដើរខ្លះៗហើយ ជាពិសេសដំណើរកំសាន្តទៅក្នុងតំបន់អេកូទេសចរណ៍។ វាពិតជាមានប្រយោជន៍ខ្លាំងណាស់ ដែលរាជរដ្ឋាភិបាលនឹងប្រែក្លាយតំបន់ទាំងនោះ ទៅជាតំបន់ទេសចរណ៍ ព្រោះវានឹងបង្កើតឱ្យមានការស្រឡាញ់បរិស្ថាន ព្រៃប្រឹក្សា តំបន់ទឹកធ្លាក់នានា និងជំរកសត្វព្រៃធម្មជាតិ កាន់តែច្រើនពីប្រជាជនទូទៅ និងអាចឱ្យពួកគេបានរៀនពីជីវិតធម្មជាតិទៀតផង»។
ក្រុមគ្រួសារខ្លះ គាត់បាននាំកូនចៅ ធ្វើដំណើរកំសាន្ត ដោយមធ្យោបាយផ្សេងៗគ្នា ទៅលេងក្នុងព្រៃ អ្នកខ្លះទៅបោះជុំរំឬតង់ដើម្បីការស្នាក់នៅរយៈពេលខ្លី នេះបង្ហាញថាពួកគាត់បណ្តុះគំនិតកូនចៅ ជំនាន់ក្រោយឱ្យស្រឡាញ់ព្រៃឈើ សត្វ និងអ្វីៗដែលជាធម្មជាតិ ហើយនៅពេលពួកគេស្រឡាញ់ហើយពួកគេ នឹងមានគំនិតជួយថែរក្សាបន្ត និងមិនបំផ្លាញវាទេ។
សម្រាប់អត្ថប្រយោជន៍របស់សហគមន៍វិញ លោកស្រីបានបន្តថា ប្រជាពលរដ្ឋដែលរស់នៅក្នុងតំបន់អេកូទេសចរណ៍នោះ ពួកគាត់នឹងមានការងារធ្វើ ហើយអាចរកប្រាក់ចំណូលបាន នៅពេលមានភ្ញៀវទេសចរច្រើន។ មួយវិញទៀត ក៏នឹងអាចបណ្តុះគំនិត ឱ្យប្រជាជនក្នុងតំបន់ការពារធម្មជាតិ ងាកមកស្រឡាញ់បរិស្ថានវិញ ហើយគាត់នឹងយល់ដឹងថាវាជារបបដែលចិញ្ជឹមជីវិតពួកគាត់បានយូរអង្វែង ផងដែរ។
លោកស្រីបានបន្ថែមថា ដូចនេះប្រជាជន ដែលគាត់ធ្លាប់បរបាញ់សត្វខុសច្បាប់ និងកាប់ព្រៃឈើ ដែលជាទំលាប់នោះ គាត់នឹងអាចឈប់ប្រព្រឹត្ត នៅពេលពួកគេយល់ដឹង អំពីការទទួលផលពីតំបន់អេកូទេសចរណ៍នោះ ហើយវាកាន់តែធ្វើឱ្យប្រជាជនក្នុងតំបន់នោះចេះថែរក្សាផងដែរ នូវសម្បិត្តបឹងបួរជាដើម ៕
ចែករំលែកព័តមាននេះ