ខេត្តស្វាយរៀង ៖ មានករណីអ្នកដេញមាសម្នាក់ ខណៈកំពុងដុតរំលាយប្លាទីន សង្ស័យភ្លាត់ស្នៀតស្រាប់តែផ្ទុះបែកចានរំលាយប្លាទីននោះ ធ្វើឱ្យខ្ទាតកម្ទេចរងើកប្លាទីន បង្កជាអណ្តាតភ្លើងឆាបឆេះតូបទិញ-លក់មាស ហើយត្រូវបានអាជីវករក្នុងផ្សារនាំគ្នាទាញទុយោទឹកបាញ់ពន្លត់ទាន់ពេល ប៉ុន្តែបណ្តាលឲ្យហូរប្លាទីនដែលដុតរំលាយនោះហូរទៅតាមទឹកបាត់អស់ចំនួនប្រមាណជា៣០តម្លឹងប្លាទីន ។
ករណីខាងលើនេះបានកើតឡើងកាលពីវេលាម៉ោង១០និង១៥នាទីព្រឹកថ្ងៃទី២៣ មិថុនា ឆ្នាំ២០២០ នៅផ្សារវាលយន្ត សង្កាត់ស្វាយរៀង ក្រុងស្វាយរៀង ខេត្តស្វាយរៀង ។
តាមសមត្ថកិច្ចបានឲ្យដឹងថា អ្នកដេញមាសម្នាក់ខាងលើឈ្មោះសុខ ហាន់ ភេទប្រុស អាយុ៤៧ឆ្នាំ ជាម្ចាស់តូបទិញ-លក់មាសនិងដូរលុយមួយកន្លែងនៅផ្សារវាលយន្តចំណុចកែងខាងជើង។
បើតាមសមត្ថកិច្ចបានឲ្យដឹងថា មានករណីអគ្គីភ័យឆាបឆេះតូបទិញលក់មាសនិងដូរលុយមួយកន្លែងនៅផ្សារវាលយន្តចំណុចកែងខាងជើង គឺដោយសារមូលហេតុអ្នកដេញមាសដុតរំលាយប្លាទីនប្រមាណជា៣០តម្លឹង ខណៈប្លាទីនរលាយហើយនោះ ស្រាប់តែផ្ទុះបែកចានរំលាយប្លាទីននោះ បណ្ដាលឱ្យខ្ទាតកម្ទេចរងើកប្លាទីនឆាបឆេះតូបឡើង បង្កឲ្យមានការភ្ញាក់ផ្អើលដល់អ្នកលក់ដូរក្នុងផ្សារដែលមានតូបក្បែរៗគ្នាមកជួយពន្លត់ បន្ទាប់មកមានប្រជាពលរដ្ឋបានសហការគ្នាជួយយកទឹកពន្លត់ និងប្រើទុយោបាញ់ទឹកស្អាតដែលនៅក្បែរនោះបាញ់ពន្លត់រហូតរលត់បានទាន់ពេលវេលាមិនបង្កឲ្យឆេះរាលដាលទៅតូបផ្សេងទៀត ក៏ប៉ុន្តែបណ្តាលឲ្យបាត់បង់ប្លាទីនអស់ប្រមាណ៣០តម្លឹងបានហូរទៅតាមទឹកអស់ពិតជាសោកស្តាយណាស់។
ក្នុងហេតុការណ៍ខាងលើនេះដែរ ក៏ឃើញវត្តមានអាជ្ញាធរក្រុងចុះទៅពិនិត្យនៅកន្លែងកើតហេតុផងដែរ ហើយក្នុងនាមរដ្ឋបាលក្រុងស្វាយរៀងក៏បានអំពាវនាវដល់បងប្អូនប្រជាពលរដ្ឋ និងអាជីវករទាំងអស់ សូមមានការប្រុងប្រយ័ត្នខ្ពស់ចំពោះចរន្តអគ្គិសនី ភ្លើង ទៀន ធូប ចង្ក្រានផ្សេងៗ និងសូមកុំដាក់តាំងទំនិញលក់លើផ្លូវ ឬចិញ្ចើមផ្លូវ ដើម្បីចៀសវាងកុំឱ្យមានការកកស្ទះតាមផ្លូវ សម្រួលដល់ការធ្វើដំណើរ និងមានសោភ័ណភាពល្អ ជាពិសេសនៅពេលកើតមានបញ្ហាជាយថាហេតុណាមួយកើតឡើង ត្រូវការផ្លូវសម្រាប់ឱ្យរថយន្តពន្លត់អគ្គីភ័យចូលជួយពន្លត់បានងាយស្រួលផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ