រាជធានីភ្នំពេញ ៖ បើទោះបីជាជំងឺកូវីដ១៩ កំពុងធ្វើឲ្យពិភពលោកជ្រួលច្របល់ក្តី តែយ៉ាងណាមិញវាមិនបានធ្វើឲ្យប៉ះពាល់ដល់ការផ្តល់អាហារូបករណ៍របស់ជប៉ុនសម្រាប់និស្សិតប្រទេសឡើយ ។ ជាក់ស្តែងស្ថានទូតជប៉ុនប្រចាំព្រះរាជណាចក្រកម្ពុជា បានសហការជាមួយក្រសួងអប់រំ យុវជន និងកីឡា…
រាជធានីភ្នំពេញ ៖ បើទោះបីជាជំងឺកូវីដ១៩ កំពុងធ្វើឲ្យពិភពលោកជ្រួលច្របល់ក្តី តែយ៉ាងណាមិញវាមិនបានធ្វើឲ្យប៉ះពាល់ដល់ការផ្តល់អាហារូបករណ៍របស់ជប៉ុនសម្រាប់និស្សិតប្រទេសឡើយ ។
ជាក់ស្តែងស្ថានទូតជប៉ុនប្រចាំព្រះរាជណាចក្រកម្ពុជា បានសហការជាមួយក្រសួងអប់រំ យុវជន និងកីឡា នឹងធ្វើការជ្រើសរើសសិស្ស និស្សិតកម្ពុជានៃបេក្ខភាព អាហារូបករណ៍រដ្ឋាភិបាលជប៉ុន MEXTសម្រាប់ឆ្នាំ២០២១។
យោងតាមសេចក្តីប្រកាសចេញថ្ងៃទី ២២ ខែមិថុនា ឆ្នាំ២០២០ របស់ស្ថានទូតជប៉ុនប្រចាំនៅកម្ពុជា នេះបានឱ្យដឹងថា អាហារូបករណ៍រដ្ឋាភិបាលជប៉ុន គឺជាអាហារូបករណ៍ ធំជាងគេសម្រាប់សិស្សនិស្សិត ទៅសិក្សានៅប្រទេសជប៉ុន ដែលផ្តល់ដោយក្រសួងអប់រំជប៉ុន(MEXT)។
ស្ថានទូត បាននិយាយថា «បច្ចុប្បន្ន ក្រសួងអប់រំជប៉ុន ផ្តល់អាហារូបករណ៍ដល់សិស្សនិស្សិតកម្ពុជាចំនួន៤ប្រភេទ ដែលមានដូចជា ថ្នាក់ក្រោយឧត្តមសិក្សា ថ្នាក់ឧត្តមសិក្សា ថ្នាក់មធ្យមសិក្សាបច្ចេកទេស និងថ្នាក់បណ្តុះបណ្តាលវិជ្ជាជីវៈ»។
ការជ្រើសរើសនៅឆ្នាំនេះ នឹងត្រូវធ្វើឡើងដោយការត្រួតពិនិត្យឯកសារ ប្រឡងវិញ្ញាសាសរសេរ និងសម្ភាសន៍ នៅស្ថានទូតជប៉ុន ហើយការសម្រេចចុងក្រោយនឹងត្រូវធ្វើឡើងដោយការត្រួតពិនិត្យឯកសារដោយក្រសួងអប់រំជប៉ុន។
ស្ថានទូតបានបន្ថែមថា «យើងខ្ញុំសង្ឃឹមយ៉ាងមុតមាំថា សិស្សនិស្សិតជាច្រើន នឹងដាក់ពាក្យសុំអាហារូបករណ៍MEXT ហើយពួកគាត់ជាច្រើន នឹងត្រូវបានជ្រើសរើសដោយក្រសួងអប់រំជប៉ុន»។
គួរបញ្ជាក់ផងដែរថា ចាប់តាំងពីឆ្នាំ១៩៩២ សិស្សនិស្សិតកម្ពុជាជាង៦០០នាក់ បានទទួលអាហារូបករណ៍ MEXTទៅសិក្សានៅប្រទេសជប៉ុន។ សិស្សនិស្សិតទាំងនោះបានបញ្ចប់ការសិក្សារបស់ពួកគេនៅប្រទេសជប៉ុនដោយជោគជ័យ ហើយបច្ចុប្បន្នកំពុងចូលរួមចំណែកដល់សង្គមកម្ពុជា ក្នុងនាមជាអ្នកដឹកនាំនៅក្នុងវិស័យផ្សេងៗ៕
ចែករំលែកព័តមាននេះ