រាជធានីភ្នំពេញ ៖ ស្ត្រីម្នាក់បានបាត់បង់ជីវិតភ្លាមៗនៅនឹងកន្លែង ចំណែកកូនស្រីប្រុស២នាក់ទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍រវាងរថយន្តក្រឡុកស៊ីម៉ង់ត៍មួយគ្រឿង បើកកៀរនិងកិនម៉ូតូជាប់ក្រោមរថយន្ត។
គ្រោះថ្នាក់ចរាចរណ៍ខាងលើនេះបានកើតឡើងកាលពីម៉ោង៩និង៣០នាទីព្រឹកថ្ងៃទី២១ ខែមិថុនា ឆ្នាំ ២០២០ នៅលើផ្លូវឧកញ៉ា ម៉ុង ឬទ្ធី កែងផ្លូវបេតុង ភូមិបាយ៉ាប សង្កាត់ភ្នំពេញថ្មីខណ្ឌសែនសុខ។
រថយន្តមួយគ្រឿងខាងលើម៉ាកHOWO ពណ៌ស ពាក់ស្លាកលេខ ភ្នំពេញ ៥A-២៧៨៩ ជារថយន្តក្រឡុកស៊ីម៉ង់តិ៍របស់ក្រុមហ៊ុន ចៀន ស៊ីនយាន បើកបរដោយឈ្មោះ ជ័យ ជឿន ភេទប្រុស អាយុ៣០ឆ្នាំ ស្នាក់នៅក្រុមហ៊ុន ស្ថិតនៅសង្កាត់ឃ្មួញ ខណ្ឌសែនសុខ ត្រូវបាននគរបាលឃាត់ខ្លួន ។
រីឯជនរងគ្រោះទាំង៣នាក់ខាងលើ រួមមាន ១-ឈ្មោះ វង់ សារ៉ន ភេទស្រី អាយុ៤៦ឆ្នាំ ត្រូវជាម្តាយ បានបាត់បង់ជីវិត ២-ឈ្មោះ វង សុណា ភេទស្រី អាយុ១៨ឆ្នាំ មុខរបរកម្មការនីរោងចក្រ ត្រូវជាកូន និងជាអ្នកបើកបរម៉ូតូ បានរងរបួសបាក់ដៃឆ្វេង និង៣-ឈ្មោះណន ប៉ាហុង ភេទប្រុស អាយុ៦ឆ្នាំ ត្រូវជាកូន បានរងរបួសស្រាល ។ ជនរងគ្រោះទាំង៣នាក់ស្នាក់នៅភូមិត្រពាំងវែង សង្កាត់គោករការ ខណ្ឌព្រែកព្នៅ ។ ជនរងគ្រោះទាំង៣នាក់ជិះម៉ូតូមួយគ្រឿងម៉ាកនិច ពណ៌ស ពាក់ស្លាកលេខ ភ្នំពេញ ១IF-៦៧៦៨ ។
តាមសាក្សីបានអោយដឹងថា មុនពេលកើតហេតុ គេឃើញជនរងគ្រោះទាំង៣នាក់ម្តាយនិងកូនបានជិះម៉ូតូមួយគ្រឿងធ្វើដំណើរតាមបណ្តោយផ្លូវម៉ុងឬទ្ធី ក្នុងទិសដៅពីកើតទៅលិច ដោយកូនស្រីអាយុ១៨ឆ្នាំ ជាអ្នកបើកបរម៉ូតូ លុះមកដល់ចំណុចកើតហេតុខាងលើ ស្រាប់តែមានរថយន្តក្រឡុកស៊ីម៉ង់ត៍មួយគ្រឿងធ្វើដំណើរក្នុងទិសដៅស្របគ្នាបានបើកបត់ចូលតាមផ្លូវបេតុងមកកៀរ និងកិនម៉ូតូតែម្តង ។
តាមប្រភពដដែលបានអោយដឹងបន្តថា នៅក្នុងគ្រោះថ្នាក់ចរាចរណ៍ខាងលើ ម៉ូតូត្រូវរថយន្តកិនជាប់ពីក្រោមរថយន្តអូសជាច្រើនម៉ែត្រ ចំណែកស្ត្រីរងគ្រោះត្រូវរថយន្តកិនចំដងខ្លួន និងជើង បណ្តាលអោយបាត់បង់ជីវិតភ្លាមៗនៅនឹងកន្លែងកើតហេតុ រីឯកូនស្រីនិងប្រុសបានរងរបួសធ្ងន់និងស្រាល ។ បន្ទាប់ពីកើតហេតុ អ្នកបើកបររថយន្តត្រូវបាននគរបាលឃាត់ខ្លួន ។
តាមប្រភពពីកូនស្រីដែលរងរបួសបានអោយដឹងថា មុនពេលកើតហេតុ នាងបានដឹកម្តាយចេញពីមន្ទីពេទ្យ ក្នុងគោលបំណងត្រឡប់ទៅផ្ទះ ហើយក៏បានជួបគ្រោះអកុសលតែម្តង ។
ក្រោយពេលកើតហេតុ រថយន្ត និងម៉ូតូត្រូវបាននគរបាលចុះមកវាស់វែងបញ្ជូនទៅកាន់ការិយាល័យ ចរាចរណ៍ផ្លូវគោក ដើម្បីចាត់ការតាមច្បាប់ ។ ចំណែកសពស្ត្រីរងគ្រោះត្រូវបានក្រុមគ្រួសារទទួលយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ