រាជធានីភ្នំពេញ ៖ ក្នុងអំឡុងពេលប្រទេសកម្ពុជានិងពិភពលោកទាំងមូលកំពុងពើបប្រទះបញ្ហាវិបត្តិជំងឺកូវីដ១៩ បានធ្វើឲ្យប៉ះពាល់សេដ្ឋកិច្ចប្រទេសជាច្រើនលើពិភពលោក និងវិស័យទេសចរណ៍និងឧស្សាហកម្មនៅកម្ពុជាក៏កំពុងផលប៉ះពាល់ផងដែរ ជាពិសេសសម្រាប់វិស័យដឹកជញ្ជូនតាមអាកាសគឺខេត្តសៀមរាបរងគ្រោះធ្ងន់ធ្ងរជាងគេ គឺមានន័យថាលែងមានជើងហោះហើរអន្តរជាតិតែម្តង ខណៈការហោះហើរមួយចំនួននៅព្រលានយន្តហោះខេត្តសៀមរាបគឺសម្រាប់តែការហោះហើរក្នុងស្រុក(domestic flight) តែប៉ុណ្ណោះ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានមានប្រសាសន៍នៅព្រឹកថ្ងៃទី ២២ មិថុនា ឆ្នាំ២០២០ នេះថា ព្រលានយន្តហោះទាំង៣ របស់ប្រទេសកម្ពុជា មានតែព្រលានយន្តហោះចំនួនពីរទេ ដែលអាចមានអ្នកដំណើរ ឬជើងហោះហើរក្រៅស្រុកខ្លះ ។
ថ្លែងនៅក្នុងឱកាសអញ្ជើញចុះពិនិត្យការស្ថាបនាអាកាសយានដ្ឋានអន្តរជាតិភ្នំពេញថ្មីនៅខេត្តកណ្តាល នៅព្រឹកថ្ងៃទី ២២ ខែមិថុនានេះ សម្តេច ហ៊ុន សែន បានមានប្រសាសន៍ថា «ព្រលានយន្តហោះដែលមានអ្នកដំណើរក្រៅស្រុកចេញចូល គឺព្រលានយន្តហោះក្នុងរាជធានីភ្នំពេញ និងព្រលានយន្តកេងកង ក្នុងខេត្តព្រះសីហនុ រីឯព្រលានយន្តហោះ ក្នុងខេត្តសៀមរាបវិញគ្មានតែម្តង»។
សម្តេច ហ៊ុន សែន បានបន្តថា ព្រលាននៅខេត្តសៀមរាប នៅសល់តែការហោះហើរផ្ទៃក្នុង ឬក្នុងស្រុកទេ ដោយយន្តហោះជាអន្តរជាតិគឺអត់មានទេ ។
បើទោះបីប្រទេសកំពុងមានវិបត្តិកូវីដ១៩ ហើយសេដ្ឋកិច្ចជាតិត្រូវបានព្យាករណ៍ថានឹងស្ថិតកម្រិត – ១,៩ ភាគរយក្នុងឆ្នាំ ២០២០ នេះក្តី សម្តេច ហ៊ុន សែន បានបញ្ជាក់យ៉ាងច្បាស់ថា «យើងមានការសាងសង់ព្រមគ្នានៅព្រលានយន្តហោះទាំងបី ក្នុងប្រទេសកម្ពុជា។ ហើយការសាសង់ព្រលានយន្តហោះថ្មី គឺសម្រេចបានប្រមាណ ៣០% ហើយ។ ព្រលានយន្តហោះអន្តរជាតិថ្មីនេះ គឺវិនិយោគក្នុងទឹកប្រាក់ប្រមាណ ១,៥០០លានដុល្លារ ដែលគ្រោងនឹងបញ្ចប់ការសាងសង់អោយបានរួចរាល់នៅឆ្នាំ២០២៣ ខាងមុខនេះ។
សម្តេច ហ៊ុន សែន បន្ថែមថា អាកាសយានដ្ធានថ្មីនេះជាប្រភេទ 4F ដែលអាចអោយយន្តហោះធំៗដូចជា Airbus A380-800 និង Boeing 747-800 ចុះចតបាន។ សង្ឃឹមថាកម្ពុជានឹងកាន់តែទាក់ទាញបានភ្ញៀវទេសចរ និងអ្នកវិនិយោគគិនកាន់តែច្រើនឡើងក្រោយពីព្រលានយន្តហោះអន្តរជាតិភ្នំពេញថ្មីនេះកសាងរួច។
លោក ស៊ីន ចាន់សិរីវត្ថា អ្នកនាំពាក្យលេខាធិការដ្ឋានអាកាសចរណ៍ស៊ីវិល បាននិយាយថា បើគិតត្រឹមខែ ឧសភា ឆ្នាំ២០១៩ ធៀបនឹងខែឧសភា ឆ្នាំ២០២០ នេះក្នុងអាកាសយានដ្ឋានសៀមរាប អ្នកដំណើរក្នុងផ្លូវអាកាស ស្មើនឹងដក១០០ភាគរយ។ ជើងហោះហើរចេញចូល អន្តរជាតិ ស្មើរនឹងដក១០០ភាគរយ និងសមត្ថភាពផ្ទុកស្មើនឹងសូន្យតែម្តង ៕
ចែករំលែកព័តមាននេះ