រាជធានីភ្នំពេញ៖ ប្រជាពលរដ្ឋកម្ពុជានៅតែប្រឈមនឹងការទទួលទានបន្លែ ត្រីសាច់ និងគ្រឿងបរិភោគ ដែលមានសារធាតុគីមី និងខូចគុណភាពរាល់ថ្ងៃ។ គ្រឿងឧបភោគបរិភោគទាំងនោះភាគច្រើននាំចូលពីប្រទេសជិតខាង ហើយការដាំដុះនៅក្នុងស្រុកខ្លះក៏មានការប្រើប្រាស់ជីគីមី ជីកសិកម្មហួសកម្រិតនិងខុសបច្ចេកទេសដែរ។ ដូច្នេះការបរិភោគអាហាររបស់ពលរដ្ឋខ្មែរនាពេលបច្ចុប្បន្នមានការប្រឈមហានិភ័យសុខភាពខ្លាំង។
រយៈពេលប៉ុន្មានថ្ងៃនេះអាជ្ញាធរកម្ពុជាបានរកឃើញបន្លែ ត្រីសាច់មានផ្ទុកសាធារតុគីមីខ្ពស់ ដែលឈ្មួញបាននាំចូលពីប្រទេសវៀតណាមនឹងប្រទេសថៃ។ថ្មីៗនេះ នៅច្រកព្រំដែនកម្ពុជាវៀតណាម ក្នុងខេត្តកណ្តាល សមត្ថកិច្ច បានរកឃើញបន្លែស្ពៃបូកគោ បន្លែពោតបារាំង បន្លែផ្កាគូឆាយ ផ្លែល្ពៅ និងក្រូចឆ្មារតូចសម្រាប់ធ្វើតែជ្រក់ មានសារធាតុគីមីខ្ពស់ រហូតដល់សមត្ថកិច្ចហាមមិនឲ្យមានការនាំបន្លែទាំងនោះចូលកម្ពុជាទៀត។ នៅព្រំដែនថៃឯណោះវិញ សាច់ជ្រូក និងមាន់ខូចគុណភាពត្រូវបានអាជ្ញាធរបានរឹមអូសសឹងរាល់ថ្ងៃ ពីឈ្មួញដែលបាននាំចូលពីប្រទេសថៃ។
លោកស្រី តុង ច័ន្ទធាង នាយកប្រតិបត្តិមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថា អង្គការសេដាក (CDAC) បានលើកឡើងថាប្រជាពលរដ្ឋកម្ពុជាមានបញ្ហាទទួលទានបន្លែមានសារធាតុគីមីនិងខូចគុណភាពជាច្រើនឆ្នាំហើយ។ លោកស្រីបានស្វាគមន៍ចំពោះចំណាត់ការបស់សមត្ថកិច្ចនៅពេលនេះ និងស្នើសុំឲ្យមន្ត្រីបន្តការងារនេះខ្លាំងក្លាថែមទៀត និងជួយផ្សព្វផ្សាយឲ្យពលរដ្ឋបានដឹងផង។
នាយកប្រតិបត្តិការអង្គការសេដា បានគូសបញ្ជាក់ថាការបង្ក្រាបរបស់សមត្ថកិច្ចនៅមានចំនួនតិចនៅឡើយ បើប្រៀបធៀបបរិមាណនាំចូល។ «បន្លែមានធាតុគីមី ឬគ្មានសាធារតុគីមីប្រជា ពលរដ្ឋមិនអាចដឹង និងមិនអាចមើលឃើញទេ។ មានតែសមត្ថកិច្ចជំនាញដែលមានឧបករណ៍ សម្ភារៈពិសោធន៍បានប៉ុណ្ណោះទើបអាចរកឃើញ» ។
លោកស្រី តុង ច័ន្ទធាង បានបញ្ជាក់ថា «ការទទួលទានបន្លែដែលមានសារធាតុមីគីច្រើនអាចធ្វើឲ្យមនុស្សពុលភ្លាមៗ ក្នុងករណីបន្លែ ផ្លែឈើ ទាំងនោះមានសារធាតុគីមីច្រើន ហើយបើមានតិចតូច វានឹងសម្ងំក្នុងខ្លួនមនុស្សដែលយូរទៅ នាំឲ្យយើងកើតជំងរ៉ាំរ៉ៃជាច្រើនមុខ» ។
មានការប៉ាន់ស្មានថាកម្ពុជាបាននាំចូលបន្លែពីប្រទេសជិតខាងពី២០០ទៅ៤០០តោនក្នុងមួយថ្ងៃ ខណៈដែលមន្ត្រីអះអាងថាការដុះដាំក្នុងស្រុកពេលនេះ អាចជំនួសការនាំចូលបានពី៤០ទៅ៥០%។
ទាំងមន្ត្រីរដ្ឋាភិបាលនិងអង្គការសង្គមស៊ីវិលបានជំរុញពលរដ្ឋធ្វើការដាំដុះបន្លែ ចិញ្ចឹមសត្វ តាមគោល ការណ៍ធម្មជាតិដោយខ្លួនឯង ដើម្បីទុកទទួលទាននិងអាចផ្គត់ផ្គង់ទីផ្សារក្នុងស្រុកដើម្បីបង្កើនជីវភាព និងការពារសសុខភាពខ្លួនឯងនិងសង្គមជាតិផង៕
ចែករំលែកព័តមាននេះ