រាជធានីភ្នំពេញ ៖«បងជាតារាដ៏ល្បីល្បាញ ជាមាតាដ៏អស្ចារ្យសម្រាប់ កូនៗ បងជាមនុស្សម៉ឺងម៉ាត់ និងរឹងមាំ មិនចេះពុតត្បុត មិនចេះអែបអប មិនចេះដ្រាម៉ា ដូច្នេះសង្ឃឹមថាបងនឹងទទួលបានយុត្តិធម៌ ទោះវាពិបាកព្រោះបងតែម្នាក់ឯង គ្មានខ្នង តែខ្ញុំជឿជាក់លើសច្ចធម៌ និងបាបកម្ម»។ នេះជាពាក្យសម្ដីរបស់ «Shalom SP» ជាអ្នកគាំទ្រម្នាក់ ក្នុងចំណោមអ្នកគាំទ្រជាច្រើនរបស់អ្នកនាងម៉េង កែវពេជ្ជតា ខណៈជម្លោះរវាងអ្នកនាងម៉េង កែវពេជ្ជតា និងភាគីពាក់ព័ន្ធនៅមិនទាន់រលត់ និងធូរស្រាលនៅឡើយទេ ។
រឿងមួយមិនទាន់ចប់ ស្រាប់តែកើតរឿងថ្មីមួយទៀត ក្នុងពេលដែលភរិយាក្រោយរបស់អតីតស្វាមី បានចោទទៅលើអ្នកនាង ម៉េង កែវពេជ្ជតា ថា បានទទួលលុយ៣០ម៉ឺនដល្លារ បន្ទាប់ពីលែងលះ ។ ជាមួយនឹការលើកឡើងនោះ អ្នកនាងម៉េង កែវពេជ្ជតា បានឆ្លើយតប ជាមួយនឹងការទម្លាយរូបភាពធ្លាប់នៅផ្ទះជួលយ៉ាងលំបាក ក្រោយលែងលះស្វាមី ។
កាលពីថ្ងៃទី២១ មិថុនា ២០២០ អ្នកនាង ម៉េង កែវពេជ្ជតា បានបង្ហោះសារឆ្លើយតបថា « បើខ្ញុំបានលុយ៣០ម៉ឺនពីការលែងលះមែន ចាំបាច់អីខ្ញុំត្រូវក្រនៅផ្ទះជួលយ៉ាងលំបាករហេមរហាមអស់ពីរបីឆ្នាំ ? ក្រៅពីការកេងប្រវ័ញ្ចទ្រព្យ ទឹកចិត្តហើយ ខ្ញុំនៅត្រួវពួកគេលាបពណ៌អស់១០ឆ្នាំតាមរយៈសំឡេងឈ្លោះគ្នាដែលគេរៀបចំឲ្យតែឮសំឡេងខ្ញុំជាងគេ និងចោទថាខ្ញុំជេរប្តី ជេរម្តាយក្មេក ចោទខ្ញុំថាត្រូវប្តីលែងដោយសារខ្ញុំមានប្រុស …។
ដែលផ្ទុយទៅវិញខ្ញុំជាអ្នកលែងគេមុនក៏ព្រោះតែប្តីមានស្រីខាងក្រៅផង យកស្រីបម្រើក្នុងផ្ទះផង លេងល្បែងជំពាក់គេផង និងប្រើអំពើហិង្សាមកលើខ្ញុំដែលធ្វើឲ្យខ្ញុំមិនអាចទ្រាំបានទើបលែងគាត់។ ស្រាប់តែនាងប្រធានសមាគមសិល្បៈចន ច័ន្ទលក្ខិណា មិនដឹងកើតទុក្ខមិនសុខចិត្តរឿងអីក៏ចេញមករើសដាក់ខ្លួនបង្ហោះសារត្អូញត្អែរ ហើយនាំឲ្យបក្សពួកជេរបញ្ចោរខ្ញុំព្រោងព្រាត បន្ទាប់មកនាងនេះក៏បានទៅលូនក្រាបលោកជំទាវពុំ ឲ្យមកសំពងខ្ញុំ និងដោយទាំងមីងហង្ស បូរី ព្រមទាំងបក្សពួកគាត់ផងដែរចូលមកជួយជេរជួយថែមល្បោយយ៉ាងឆ្ងាញ់មាត់។
បន្ទាប់មកមនុស្សម្នាក់រហស្សនាម«រាជបុត្រអាសូរ្យកាយ»ដែលគ្រប់គ្នាស្គាល់ថាពូកែជេរបញ្ចោររដ្ឋាភិបាលកម្ពុជា ជេរថ្នាក់ដឹកនាំ និងធ្លាប់បានកាត់តសម្តីខ្ញុំកាលយុទ្ធនាការបោះឆ្នោត២០១៨ ធ្វើឲ្យគេជេរខ្ញុំទាំងយល់ច្រឡំនោះ គឺត្រូវមីងបូរី និងនាងប្រធានសមាគមសិល្បៈត្រូវរ៉ូវគ្នាល្អូកល្អិន ហើយឲ្យបុគ្គលជំនាញជេរនេះមកប្រឌិតរឿងអង្គុយឡាយជេរបញ្ចោរខ្ញុំយ៉ាងសាហាវអស់ជាច្រើនថ្ងៃតាមចិត្តវានឹកឃើញ ។
ស្រាប់តែចុងក្រោយនេះ ពួកគេនាំគ្នាដាក់ពាក្យប្តឹងខ្ញុំទៅវិញ ? សូមបងប្អូនជួយពិចារណាទៅមើលថា តើចំណុចណាដែលខ្ញុំត្រូវគេប្តឹង ? តើនេះជាការបិទសិទ្ធិមិនឲ្យខ្ញុំនិយាយការណ៍ពិតដែលមួង ឃីម ធ្វើបាបផ្លូវកាយ ផ្លូវចិត្ត និងបានកេងប្រវ័ញ្ចទ្រព្យសម្បត្តិខ្ញុំ ? ចំណែកអ្នកផ្សេងដែលមិនពាក់ព័ន្ធដូចជា អ្នកមីងពុំ យាយបូរី និងនាងប្រធានសមាគមសិល្បៈ ដែលពួកគេព្រួតគ្នាប្តឹងខ្ញុំច្រើនយ៉ាងនេះគឺជាការគំរាម និងចង់កាច់បំបាក់ខ្ញុំ ត្រកូលសិល្បៈខ្ញុំមែនទេ ? ។ នេះជាការចង់ប្រាប់ថា បើខ្ញុំនៅតែនិយាយទៀត គេនឹងប្តឹងប្ដល់អញ្ចឹង តើមែនទេ ? ។
បើគ្រាន់តែខ្ញុំនិយាយដើម្បីយកភាពស្អាតស្អំឲ្យខ្លួនឯង និង កូនៗខ្ញុំសោះ ក៏ត្រូវគេប្តឹងដែរ ? ចុះដែលពួកគេជេរខ្ញុំដាច់សាច់រាប់មិនអស់នោះ មិនខុសទេ ឬយ៉ាងម៉េច ? អយុត្តិធម៌ពេកហើយ? ទាំងនេះជារូបថតអីវ៉ាន់ដែលខ្ញុំទទួលបាន ក្រោយលែងលះ គឺមានតែខោអាវ ទូ កញ្ចាស់ៗ និងត្រូវរលួយអស់មួយកំណាត់ទូពេលផ្ទះលិចទឹក ហើយនិងស្ថានភាពផ្ទះដែលខ្ញុំជួលនៅ» ។
ក្រោយបង្ហោះសារនេះមានអ្នកគាំទ្រជាច្រើនសម្ដែងក្ដីអាណិតអ្នកនាងម៉េង កែវពេជ្ជតា ជាក់ស្ដែងឈ្មោះ «ចេស្តា ឈីម» បានសរសេរថា «អនិច្ចា អស់លោកអ្នកវង្វេងងប់ងល់ មោទនភាពនឹងអំណាចអើយ គ្រាន់តែស្ត្រីមេម៉ាយម្នាក់ ចាំបាច់អីព្រួតគ្នាធ្វើបាបគាត់ដល់ថ្នាក់ហ្នឹង តើពួកអ្នកខំសម្តែងធ្វើបុណ្យដើម្បីអ្វី? បើចិត្តពួកអ្នកទាំងឫស្យា ឈ្នានីស គ្នាបែបនេះនោះ ? រឹងមាំឡើង បងស្រី» ។
ចំណែកឈ្មោះ«So Phanarith»សរសេរថាបងអើយឃើញរូបភាពនេះក្នុងនាមប្អូនជាហ្វែនម្នាក់មានអារម្មណ៍ថាក្តុកក្តួលចិត្តណាស់ តើបងលំបាកយ៉ាងណា ? ទោះបងលំបាកយ៉ាងណាក៏បងនៅលាក់ពួនសម្ងំ មិនសុំពឹងឲ្យនរណាជួយឡើយ ដើរតួនាទីឪពុកផងម្តាយផងគ្រប់សព្វអស់ហើយ ទម្រាំបងជោគជ័យមកដល់ពេលនេះ តែហេតុអីអ្នកដែលមិនដែលជួយអី មិនដឹងរឿងពិតច្បាស់លាស់ ព្យាយាមធ្វើបាបបងម្តងហើយម្តងទៀត អីក៏សាហាវចិត្តខ្មៅម្ល៉េះ បងជាស្ត្រីរឹងមាំណាស់ ប្អូនសង្ឃឹមថាយុត្តិធម៌មានសម្រាប់បង និង កូនៗ»។
អ្នកគាំទ្រឈ្មោះ«talla Da»សរសេរថា«បងស្រីតស៊ូណា ទោះបីអ្នកទាំងនោះមូលបង្កាច់បងយ៉ាងណាក៏ទេវតាមានភ្នែកដែរ ខ្ញុំធំឡើងក៏ស្គាល់ឈ្មោះបងបាត់ទៅហើយ បងស្រីទីពីររបស់ខ្ញុំធ្លាប់ជាមិត្តរៀនជាមួយបងតាំងពីឆ្នាំកៅជាង គ្រួសារខ្ញុំស្រលាញ់ចូលចិត្តបងណាស់ ទោះពេលនេះមានគេនិយាយមិនល្អមិនឲ្យតម្លៃបងក៏ហ្វេនបងម្នាក់នេះនៅតែស្រលាញ់ និងមើលឃើញពីភាព អយុត្តិធម៌ចំពោះបងមករហូត»។
ចំណែកឈ្មោះ«Long Kisoeung»បងស្រី ត្រូវខិតខំតស៊ូបន្តដំណើរជីវិតទៅមុខទៀត ។ បើបងឈរបានក្នុងកាលៈទេសៈដ៏ស្មុគស្មាញ និងគ្រោតគ្រាតនេះបាន នោះបងនឹងឈ្មោះថាជាបុគ្គលដែលជោគជ័យបំផុត ។ ពេលបងដួល គេនឹងពន្លិចបងស្រីឲ្យដល់បាតដាលតែម្តង ។ ខ្ញុំជាអ្នកដែលគាំទ្រ និងគោពបង តាំងពីតូច សំឡេងបងធ្វើឲ្យបង ប្អូន អ្នកស្តាប់ មានការពេញចិត្តគ្រប់ទីកន្កែង ។
ខ្ញុំជាអ្នកធ្វើការនៅមូលដ្ឋាន ខ្ញុំតែងតែឮសំឡេងចម្រៀងបង បង្ហើរតាមឧគ្ឃោសនស័ព្ទរាល់ព្រឹក ដោយមិនចេះសាបសូន្យ។ ខ្ញុំសង្ឃឹមថា ទាំងម្ចាស់ និងសំឡេង គឺនៅតែស្ថិតក្នុងក្រអៅបេះដូងរបស់ទស្សនិកជនដែលគាំទ្របងស្រី ជារៀងរហូត ។ អំពើល្អមិនសាបសូន្យ» ៕ (កែសម្រួលដោយ ៖ បុប្ផា)
ចែករំលែកព័តមាននេះ