រាជធានីភ្នំពេញ ៖ ប្រតិបត្តិការសំភាសន៍ជំរឿនសហគ្រាសនៅព្រះរាជាណាចក្រកម្ពុជាឆ្នាំ២០១១បានចាប់ផ្តើមនាព្រឹកថ្ងៃទី១ មីនា នៅសង្កាត់ទំនប់ទឹក ខណ្ឌចំការមន និងសង្កាត់ទឹកល្អក់ ខណ្ឌទួលគោក រាជធានីភ្នំពេញ ដោយមានការចូលរួមជាកិត្តិយសពីលោកឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ រួមជាមួយលោកហ៊ីរ៉ូហ្ស៊ី កាវ៉ាមូរ៉ា ភារធារីស្តីទីស្ថានទូតជប៉ុន លោកយូគីហារូ គូប៉ាយាហ្ស៊ី តំណាងជាន់ខ្ពស់នៃអង្គការ JICA ប្រចាំកម្ពុជា និងលោកស្រីជំនាញការ JICA រួមទាំងមន្ត្រីជាន់ខ្ពស់ក្រសួងផែនការជាច្រើនរូបទៀតផងដែរ ។
លោកឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ និងជាប្រធានគណៈកម្មាធិការជាតិជំរឿនបានមានប្រសាសន៍ថា នេះជាលើកទី១ និងជាលើកដំបូងបំផុតក្នុងការចាប់ផ្តើមប្រតិបត្តិការសំភាសន៍ជំរឿនសហគ្រាសនៅព្រះរាជាណាចក្រកម្ពុជាឆ្នាំ២០១១ ដែលជាជំរឿនសហគ្រាសលើកដំបូងបំផុតមិនធ្លាប់មានពីមុនមក ។ ក្នុងនាមរាជរដ្ឋាភិបាលកម្ពុជា ការផ្តើមប្រតិបត្តិការសំភាសន៍ជំរឿនសហគ្រាសនេះ គឺដើម្បីប្រកាសជាផ្លូវការដល់សាធារណជនថា ការធ្វើសំភាសន៍ជំរឿនសហគ្រាសកំពុងតែចាប់ផ្តើមប្រតិបត្តិការ ហើយនិងក៏ដើម្បីអំពាវនាវរកកិច្ចសហប្រតិបត្តិការយ៉ាងមុតមាំពីសំណាក់សាធារណជន ពិសេសនោះពីម្ចាស់សហគ្រាស សហគ្រិន គ្រប់ប្រភេទ ព្រមទាំងអាជ្ញាធរមូលដ្ឋានគ្រប់លំដាប់ថ្នាក់ផងដែរ ។
ជំរឿនសហគ្រាសមានគោលបំណងប្រមូលព័ត៌មានសំខាន់ៗស្តីពីសហគ្រាសសម្រាប់បម្រើការតាក់តែងគោលនយោបាយ និងការកសាងផែនការទាំងថ្នាក់ជាតិ និងថ្នាក់ក្រោមជាតិ ក៏ដូចជាសម្រាប់ការស្រាវជ្រាវនៅសាកលវិទ្យាល័យ និងវិទ្យាស្ថានស្រាវជ្រាវផ្សេងៗទៀត ក្នុងការរៀបចំយុទ្ធសាស្ត្រគ្រប់គ្រង និងការស្រាវជ្រាវទីផ្សារនៅក្នុងផ្នែកឯកជន ។
លោកទេសរដ្ឋមន្ត្រី រដ្ឋមន្ត្រីក្រសួងផែនការ បានមានប្រសាសន៍បន្តថា ការធ្វើជំរឿនសហគ្រាស នេះ មានរយៈពេល១ខែគត់ គឺគិតចាប់ពីថ្ងៃទី១ មីនា ដល់ថ្ងៃទី៣១ មីនា ឆ្នាំ២០១១ ដើម្បីប្រមូលទិន្នន័យតាមរយៈប្រតិបត្តិការនៅ មូលដ្ឋានជាក់ស្តែងដែលមានមន្ត្រីសំភាសន៍ប្រមាណ៤.០០០នាក់ និងមន្ត្រីត្រួតពិនិត្យប្រមាណ៥០០នាក់ត្រូវបានចាត់តាំងឱ្យបំពេញ ភារកិច្ចក្នុងភូមិចំនួនប្រមាណជាង១៤.០០០ភូមិនៅទូទាំងរាជធានី-ខេត្ត ស្ថិតក្នុងដែនដីនៃព្រះរាជាណាចក្រកម្ពុជា ។ ជោគជ័យនៃការធ្វើជំរឿននេះនឹងនាំមកនូវការអភិវឌ្ឍ វិបុលភាព និងសុភមង្គលនៅក្នុងប្រទេសកម្ពុជាផងដែរ ៕
ចែករំលែកព័តមាននេះ