រាជធានីភ្នំពេញ ៖ ខណៈដែលប្រមុខទឹកនាំរាជរដ្ឋាភិបាលកម្ពុជាកំពុងរៀបចំគោលនយោបាយពាក់ព័ន្ធមួយចំនួនដើម្បីនាំកម្ពុជាចូលទៅយុគសម័យថ្មីនៃរដ្ឋាភិបាលនិងសេដ្ឋកិច្ចឌីជីថលនោះ ក្រសួងប្រៃសណីយ៍និងទូរគមនាគមន៍បានចេញសេចក្តីអំពាវនាវឲ្យយុវជន យុវនារី ទាំងអស់ដែលជាទំពាំងស្នងឬស្សី ដែលជាធនធានសំខាន់សម្រាប់ការចូលរួមអភិវឌ្ឍប្រទេសជាតិ ឲ្យពង្រឹងនូវសមត្ថភាពសិក្សានិងផ្តោតការសិក្សាលើវិស័យវិទ្យាសាស្ត្រនិងបច្ចេកវិទ្យាដើម្បីប្រើប្រាស់ចំណេះដឹងរបស់ខ្លួន ដើម្បីចូលរួមចំណែកដឹកនាំនាវាកម្ពុជាឆ្ពោះទៅ សម្រេចបាននូវចក្ខុវិស័រយៈពេលវែង និងដើម្បីប្រែក្លាយកម្ពុជាឱ្យទៅជាប្រទេសអភិវឌ្ឃន៍នាពេលអនាគត។
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានចេញសេចក្តីប្រកាសកាលពីថ្ងៃទី១៩ ខែមិថុនា នេះថា ប្រទេសកម្ពុជាបាននឹងកំពុងអភិវឌ្ឍលើគ្រប់វិស័យ ហើយរាជរដ្ឋាភិបាលក៏បានកំពុងរៀបចំ គោលនយោបាយពាក់ព័ន្ធមួយចំនួន ដើម្បីនាំកម្ពុជាចូលក្នុងយុគសម័យថ្មី នៃរដ្ឋាភិបាល និងសេដ្ឋកិច្ចឌីជីថល។
លោក ជា វ៉ាន់ដេត បានឱ្យដឹងថា «ដើម្បីត្រៀមខ្លួនឱ្យបានល្អ ឆ្លើយតបទៅនឹងការអភិវឌ្ឍន៍ថ្មីនេះ ក្នុងនាមក្រសួង ដែលជាសេនាធិការរបស់រាជរដ្ឋាភិបាលទទួលបន្ទុកអភិវឌ្ឍនវិស័យទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ខ្ញុំសូមធ្វើការអំពាវនាវដល់យុវជន យុវនារី ដែលជានិស្សិត កំពុងសិក្សានៅវិទ្យាល័យ ឬសាកលវិទ្យាល័យ សូមខិតខំប្រឹងប្រែងរៀនសូត្រ បង្កើនចំណេះដឹង ជាពិសេស លើជំនាញដែលពាក់ព័ន្ធ និងវិទ្យាសាស្ត្រ និងបច្ចេកវិទ្យា ដូចជា ជំនាញទូរគមនាគមន៍ ជំនាញព័ត៌មានវិទ្យា និងបច្ចេកវិទ្យាគមនាគមន៍ ក៏ដូចជាជំនាញដទៃទៀត»។
លោក វ៉ាន់ដេត បានបន្តថា ការពង្រឹងសមត្ថភាពនេះ គឺស្របតាមបរិបទនៃការវិវឌ្ឍន៍បច្ចេកវិទ្យា ក្នុងគោលដៅស្វែងរកការងារបានល្អ និងបានចំណូលខ្ពស់ សម្រាប់ជួយលើកកម្ពស់ជីវភាពផ្ទាល់ខ្លួន និងក្រុមគ្រួសារ ជាពិសេស គឺជាការចូលរួមចំណែកលើកស្ទួយ និងការអភិវឌ្ឍប្រទេសជាតិ។
លោក បានបន្ថែមថា ចំពោះសិស្សនិស្សិត ដែលបានបញ្ចប់ការសិក្សា ឬកំពុងបំពេញការងារក្នុងវិស័យសាធារណៈ និងវិស័យឯកជន សូមបន្តយកចិត្តទុកដាក់បង្កើនការយល់ដឹងជាមូលដ្ឋានផ្នែក បច្ចេកវិទ្យាគមនាគមន៍ និងផ្នែកព័ត៌មានវិទ្យា ដើម្បីអាចយកទៅប្រើប្រាស់បាន ក្នុងជីវភាពរស់នៅប្រចាំថ្ងៃ ក៏ដូចជាការងាររបស់ខ្លួនប្រកបដោយប្រសិទ្ធភាព៕ (កែសម្រួលដោយ ៖ ធីតា)
ចែករំលែកព័តមាននេះ