រាជធានីភ្នំពេញ ៖ ផ្តើមសាងសង់កាលពីថ្ងៃទី ១១ ខែវិច្ចិកា ឆ្នាំ២០១៨ នៅពេលនេះអគារគណបក្សប្រជាជនកម្ពុជា ដែលស្ថិតនៅកណ្តាលរាជធានៅភ្នំពេញ បានបញ្ចប់ការសាងសង់ជាស្ថាពរហើយ។ សម្តេចវិបុលសេនាភក្តី…
រាជធានីភ្នំពេញ ៖ ផ្តើមសាងសង់កាលពីថ្ងៃទី ១១ ខែវិច្ចិកា ឆ្នាំ២០១៨ នៅពេលនេះអគារគណបក្សប្រជាជនកម្ពុជា ដែលស្ថិតនៅកណ្តាលរាជធានៅភ្នំពេញ បានបញ្ចប់ការសាងសង់ជាស្ថាពរហើយ។ សម្តេចវិបុលសេនាភក្តី សាយ ឈុំ អនុប្រធានគណបក្សប្រជាជនកម្ពុជា នៅព្រឹកនៅថ្ងៃទី ២១ ខែមិថុនា ឆ្នាំ២០២០ បានអញ្ជើញទទួលសំណង់អគារប្រវត្តិសាស្ត្រនេះពីក្រុមងវិស្វករសាងសង់។
អគារថ្មីរបស់គណបក្សប្រជាជនកម្ពុជា បានសាងសង់ឡើងរំលេចដោយក្បូរក្បាច់រចនាបថខ្មែរដ៏ល្អវិចិត្រ ដែលមានការបញ្ចូលគ្នារចនាបថបីសម័យកាលរបស់ខ្មែរ គឺរចនាបថប្រាសាទអង្គរវត្ត រចនាបថបន្ទាយស្រី និងរចនាបថកណ្ដាល។
សំណង់អគារស្កឹមស្កៃនេះ បានសង់លើផ្ទៃដីទីតាំងអគារគណបក្សចាស់ ដែលមានទំហំដីប្រមាណ ១,៦ហិកតា ដែលមានកម្ពស់៥ជាន់។ ទំហំសំណង់អាគារគឺប្រមាណ ៥០,០០០ម៉ែត្រក្រឡា មានបណ្ដោយ១៥០ម៉ែត្រ ទទឹង៧៤ ម៉ែត្រ កម្ពស់អគារគិតអំពីទីលានមហាជនខាងមុខរហូតទៅដល់កំពូលពេជ្រ មានកម្ពស់៤៨ម៉ែត្រ។ ជាន់ផ្ទាល់ដីមានចំណតរថយន្តជាង៥០០ចំណត និងទីធ្លាមុខអគារសម្រាប់មហាជនយើងអាចចតរថយន្តបាន៣០០គ្រឿង។ នៅជាន់លើគឺមានសាលសម្រាប់ប្រជុំជាលក្ខណៈមហាជន ឬក៏មិទ្ទិញបានចំនួនប្រមាណជា១ម៉ឺននាក់។
សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ធ្លាប់បានលើកឡើងថា វត្តមានអគារដ៏ធំស្កឹមស្កៃរបស់គណបក្សប្រជាជានកម្ពុជានេះ បង្ហាញឱ្យឃើញពីភាពរឹងមាំ និងជានិមិត្តរូបនៃការរួបរួម សាមគ្គីភាព និងភាពរុងរឿងដ៏អស្ចារ្យរបស់គណបក្ស ដែលជាបង្អែកមិនអាចខ្វះបានសម្រាប់ជាតិ និងប្រជាជនកម្ពុជាតាំងពីអតីតកាល បច្ចុប្បន្ន និងទៅអនាគតកាល។
លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា បានប្រាប់កោះសន្តិភាពថាថវិកាកសាងអគារជាប្រវត្តិសាស្ត្រនេះ បានពីការបរិច្ចាគរបស់សមាជិកគណបក្សប្រជាជនកម្ពុជាទាំងអស់។ លោកថា ថវិកាសាងសង់ទីស្នាក់ការគណបក្សប្រជាជនកម្ពុជា ជាថវិកាស្អាតស្អំ។ មន្ត្រីនៅមិនទាន់ដឹងថា ទីស្នាក់ថ្មីនេះ នឹងត្រូវសម្ពោធ ជាផ្លូវការពេលនោះទេ៕ (កែសម្រួលដោយ ៖ បុប្ផា)
ចែករំលែកព័តមាននេះ