រាជធានីភ្នំពេញ ៖ រដ្ឋលេខាធិការដ្ឋានអាកាសចរស៊ីវិលបានប្រគល់វិញ្ញាបនបត្រផែនការមេសាងសង់អាកាសយានដ្ឋានអន្តរជាតិសៀមរាប ដល់ក្រុមហ៊ុន Angkor International Airport Investment ដែលពិធិនេះបានធ្វើឡើងកាលពី ថ្ងៃទី…
រាជធានីភ្នំពេញ ៖ រដ្ឋលេខាធិការដ្ឋានអាកាសចរស៊ីវិលបានប្រគល់វិញ្ញាបនបត្រផែនការមេសាងសង់អាកាសយានដ្ឋានអន្តរជាតិសៀមរាប ដល់ក្រុមហ៊ុន Angkor International Airport Investment ដែលពិធិនេះបានធ្វើឡើងកាលពី ថ្ងៃទី ១៩ ខែមិថុនា ដោយលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ធ្វើការប្រគល់វិញ្ញាបនបត្រផែនការមេនេះ ដល់លោក លូ វី (Lu Wei) ប្រធានក្រុមប្រឹក្សាភិបាលនៃក្រុមហ៊ុន Angkor International Airport Investment។
តាមការលើកឡើងរបស់ លោក ស៊ីន ចាន់សិរីវត្ថា អ្នកនាំពាក្យលេខាធិការដ្ឋានអាកាសចរណ៍ស៊ីវិល នៅថ្ងៃទី ២១ ខែមិថុនា នេះឲ្យដឹងថា «វាជាវិញ្ញាបនបត្រទទួលស្គាល់កម្រិតបច្ចេកទេស។ នាពេលខាងមុខឆាប់ៗនេះ រាជរដ្ឋាភិបាលនឹងធ្វើការ អនុម័តលើផែនការមេនេះ ជាផ្លូវការ បន្ទាប់ពីទទួលបានវិញ្ញាបនបត្របច្ចេកទេសនេះ»។
លោក ចាន់សិរីវត្ថា បានបន្តថា «ការអនុម័តជាផ្លូវការនេះនឹង ធ្វើឡើងក្នុងការចុះអត្ថលេខាបីភាគី រួមមានទីស្តីការគណៈរដ្ឋមន្ត្រី វិនិយោគិនចិន និងរដ្ឋលេខាធិការដ្ឋានអាកាសចរស៊ីវិល»។
ការទទួលស្គាល់កម្រិតបច្ចេកទេស គឺជាការតម្រង់ទិសពី ទីស្តីការគណៈរដ្ឋមន្ត្រី ដែលរដ្ឋលេខាធិការដ្ឋានអាកាសចរស៊ីវិល គ្រាន់តែផ្តល់នូវការ ការទទួលស្គាល់កម្រិតបច្ចេកទេសប៉ុណ្ណោះ បន្ទាប់មកទីស្តីការគណៈរដ្ឋមន្ត្រីដែលតម្រង់ទិសនោះ គឺគាត់នឹងយកទៅដាក់ជូនរាជរដ្ឋាភិបាលបន្តពិនិត្យ។
សូមជម្រាបផងដែរ ថាផែនការមេនេះ ជាការបង្ហាញផ្លូវ សម្រាប់ការអវិវឌ្ឍន៍ ទៅតាមលំដាប់លំដោយ ដែលស្របតាមតម្រូវការអភិវឌ្ឍន៍ជាក់ស្តែង។
លោក ចាន់សិរីវត្ថា បានបន្ថែមថា «ជាធម្មតាផែនការមេ ត្រូវការទទួលស្គាល់ពីស្ថានប័នមានសមត្ថកិច្ច ដូចជាខាងរដ្ឋលេខាធិការដ្ឋានអាកាសចរស៊ីវិល អាជ្ញាធរសមត្ថកិច្ច និងក្រសួងដែលពាក់ព័ន្ធ ហើយវាជាផែនទីបង្ហាញផ្លូវ ថាតើអាកាសយានត្រូវសង់កន្លែងណា របៀបនៃការសាងសង់ តាមដំណាក់កាលនីមួយៗ ពីឆ្នាំណាដល់ឆ្នាំណា ហើយត្រូវប្រើថវិកាប៉ុន្មាន។ ហើយវាជាផែនការ ដែលបង្ហាញផ្លូវវិនិយោគ សូម្បីតែទីក្រុងភ្នំពេញ ក៏ត្រូវមានផែនការមេនេះដែរ។ វានឹងបង្ហាញផ្លូវឱ្យយើងថាត្រូវធ្វើការងារអ្វីមុន ត្រូវធ្វើអ្វីខ្លះនៅពេលនេះ ដោយប្រើប្រាស់រយៈពេល បីដំណាក់កាល ទី១ ប្រើរយៈពេលខ្លី ទី២ ប្រើរយៈពេលមធ្យម និងទី៣ ប្រើរយៈពេលវែង»។
ពេលបច្ចុប្បន្ននេះ ក្រុមហ៊ុន បានកំពុងចាប់ផ្តើមដំណើរការ សាងសង់អាកាសយានដ្ឋានអន្តរជាតិសៀមរាបថ្មី។ ចំពោះដំណើរការសាងសង់ក្រុមហ៊ុន បានសហការយ៉ាងជិតស្និត ជាមួយក្រុមការងារបច្ចេកទេសរបស់រដ្ឋលេខាធិការដ្ឋានអាកាសចរស៊ីវិល ដោយផ្តោតសំខាន់ទៅនឹងការបំពាក់ឧបករណ៍បច្ចេកទេស និងរចនាបទអាកាសយានដ្ឋាន។
គួរបញ្ជាក់ផងដែរថា ព្រលានយន្តហោះអន្តរជាតិសៀមរាបថ្មីនេះ នឹងចំណាយទុនវិនិយោគប្រមាណ ៩០០ លានដុល្លារ សាងសង់លើផ្ទៃដីប្រមាណ ៧០០ ហិកតា រួមជាមួយនឹងផ្ទៃដីនៃតំបន់សេដ្ឋកិច្ចពិសេសចំនួន១០០០ហិកតា ៕ (កែសម្រួលដោយ ៖ បុប្ផា)
ចែករំលែកព័តមាននេះ