ខេត្តពោធិ៍សាត់ ៖ កាលពីថ្ងៃទី១៣ ធ្នូ ២០១៤ សមត្ថកិច្ចចម្រុះមួយក្រុមរួមមានរដ្ឋបាលព្រៃឈើសុរិយោដី អាវុធហត្ថ នគរបាល យោធា និងអាជ្ញាធរមូលដ្ឋាន ដឹកនាំដោយលោកហេង សុភាណាអភិបាលស្រុកវាលវែង ដោយមានការចូលរួមពីលោកឆៃ សារ៉ាន់ នាយខណ្ឌរដ្ឋបាលព្រៃឈើពោធិ៍សាត់ បានចុះបង្ក្រាបក្រុមជនពនេចរមកពីក្នុង និងក្រៅខេត្តមួយចំនួនដែលធ្វើសកម្មភាពកាប់ឈើខុសច្បាប់ និងកាប់ទន្ទ្រានដីព្រៃរបស់រដ្ឋនៅចំណុចបឹងរំលេច ស្ថិតក្នុងភូមិសាស្ត្រភូមិសំឡាញ ឃុំក្រពើពីរ ស្រុកវាលវែង។
ក្រុមពនេចរទាំងនោះបានលួចកាប់ឈើក្នុងតំបន់ហាមឃាត់ដើម្បីយកទៅលក់ឲ្យឈ្មួញទុច្ចរិត និងបានកាប់រានទន្ទ្រានដីព្រៃរបស់រដ្ឋដើម្បីយកធ្វើជាកម្មសិទ្ធិរបស់ខ្លួនដោយគ្មានខ្លាចរអាអ្វីទាំងអស់ ទោះបីជាអាជ្ញាធរ និងមន្ត្រីជំនាញហាមឃាត់ និងផ្សព្វផ្សាយឲ្យយល់ដឹងអំពីច្បាប់យ៉ាងណាក៏ដោយ។
នៅពេលឃើញសមត្ថកិច្ចចុះទៅដល់ពួកគេមួយចំនួនបាននាំគ្នារត់ពួន និងមួយចំនួនទៀតគេចខ្លួនបាត់តែម្ដងបន្សល់ទុកនូវសម្ភារមួយចំនួនមានម៉ាស៊ីនរណាយន្តចំនួន០៤គ្រឿង, អាវុធស្វ័យប្រវត្តិធុនAKស្វាយបត់មួយដើមមានគ្រាប់១៩គ្រាប់, អាវុធកែច្នៃ(កាំភ្លើងខ្យល់បាញ់គ្រាប់កង់)មួយដើម, កាំបិតវែងឆ្ការព្រៃចំនួន០៦ និងដឹងចំនួន០២ទៀត បានត្រូវសមត្ថកិច្ចរឹបអូសយកមករក្សាទុកដើម្បីកសាងសំណុំរឿងបញ្ជូនទៅតុលាការ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ