ខេត្តបាត់ដំបង ៖ បុរសជាភ្ញៀវម្នាក់ ត្រូវបានម្លាំងជំនាញនៃអធិការដ្ឋាននគរបាលស្រុកមោងឬស្សី ធ្វើការឃាត់ខ្លួនវេលាម៉ោង១០និង៣៦នាទីព្រឹកនៅថ្ងៃទី១៨ មិថុនា ២០២០នេះ ក្រោយពីទទួលបានពាក្យបណ្តឹងពីម្តាយ និងនារីជនរងគ្រោះ ដែលបានប្តឹងចោទប្រកាន់ពីបទប្រទូស្តកេរ្តិ៍ខ្មាស់…
ខេត្តបាត់ដំបង ៖ បុរសជាភ្ញៀវម្នាក់ ត្រូវបានម្លាំងជំនាញនៃអធិការដ្ឋាននគរបាលស្រុកមោងឬស្សី ធ្វើការឃាត់ខ្លួនវេលាម៉ោង១០និង៣៦នាទីព្រឹកនៅថ្ងៃទី១៨ មិថុនា ២០២០នេះ ក្រោយពីទទួលបានពាក្យបណ្តឹងពីម្តាយ និងនារីជនរងគ្រោះ ដែលបានប្តឹងចោទប្រកាន់ពីបទប្រទូស្តកេរ្តិ៍ខ្មាស់ ទៅលើកូនស្រីម្ចាស់ហាង ដែលជាអនីតិជន ។
ហេតុការណ៍ប្រទូស្តកេរ្តិ៍ខ្មាស់លើកូនស្រីម្ចាស់នេះ បានកើតឡើងកាលពីវេលាម៉ោង២០និង៣០នាទីយប់ ថ្ងៃទី១៧ ខែមិថុនា ឆ្នាំ២០២០ នៅចំណុចអាហារដ្ឋានយីហោ Happy88 (ហេបភី៨៨) ស្ថិតក្នុងក្រុមទី០១ ភូមិរ៉ា ឃុំមោង ស្រុកមោងឬស្សី ខេត្តបាត់ដំបង ។
សមត្ថកិច្ចបានអោយដឹងថា ជនសង្ស័យមានឈ្មោះ សុង ប៊ុនលឿន ហៅចិន ភេទប្រុស អាយុ៣០ឆ្នាំ រស់នៅភូមិដុបក្រសាំង ឃុំព្រៃតូច ស្រុកមោងឬស្សី ខេត្តបាត់ដំបង ។ ចំណែកឯនារីរងគ្រោះឈ្មោះ ឌ.ណ.ល.ហ អាយុ១៥ឆ្នាំ ជាកូនបង្កើតរបស់ម្ចាស់ អាហារដ្ឋានយីហោ Happy 88 ។
សមត្ថកិច្ច បានបន្តថា ការឃាត់ខ្លួនជនសង្ស័យនេះ ក្រោយពីទទួលពាក្យបណ្តឹងពីក្រុមគ្រួសារ និងនារីរងគ្រោះ និងដោយមានការអនុញ្ញាតពីលោក នួន សាន ព្រះរាជអាជ្ញាអមសាលាដំបូងខេត្តបាត់ដំបង ផងដែរ ។
បើតាមសម្តីរបស់នារីរងគ្រោះ បានរៀបរាប់ប្រាប់សមត្ថកិច្ចថា មុនពេលកើតហេតុ ជនសង្ស័យខាងលើបានមកផឹកស៊ីនៅហាង(ហេបភី៨៨) លុះក្រោយមកទំនងជាស្រវឹង នៅពេលឃើញរូបនាងដើរកាត់តុផឹកស៊ីនោះ ជនសង្ស័យបានស្ទុះទៅអូសដៃនាងចូលក្នុងបន្ទប់ទឹក រួចធ្វើសកម្មភាពចាប់ឱបថើបតែម្ដង នាងក៍ស្រែកផ្អើលឲ្យគេជួយ ទើបជនសង្ស័យ លែងដៃពីនាងវិញ ។ ក្រោយកើតហេតុ រូបនាង និងក្រុមគ្រួសារ ក៏បានទៅដាក់ពាក្យបណ្ដឹងនៅអធិការដ្ឋាននគរបាលស្រុកមោងឫស្សីផងដែរ លុះព្រឹកឡើងទើបសមត្ថកិច្ចឃាត់ខ្លួនជនសង្ស័យតែម្តង ។
ដោយឡែក ជនសង្ស័យក៏បានសារភាពនៅចំពោះមុខសមត្ថកិច្ចដែរថា ខ្លួនពិតជាបានប្រព្រឹត្ត ដូចការចោទប្រកាន់មែន ដោយសារតែខ្លួនស្រវឹងស្រា ។
បច្ចុប្បន្ន សមត្ថកិច្ចបានកសាងសំណុំរឿងបញ្ជូនជនសង្ស័យទៅសាលាដំបូងខេត្ត ដើម្បីចាត់ការតាមផ្លូវច្បាប់ ដោយលោកព្រះរាជអាជ្ញាចោទប្រកាន់ពីបទប្រទូស្តកេរ្តិ៍ខ្មាស់ ៕
ចែករំលែកព័តមាននេះ