ជាទូទៅ ក្រុមគ្រួសារដែលមានទ្រព្យសម្បត្តិស្តុកស្តម្ភចូលចិត្តចំណាយពេលវិស្សមកាលនៅបរទេសជាមួយកូនៗពេលដែលកូនៗមានពេលសម្រាកពីការសិក្សា ។ ប៉ុន្តែក្នុងឆ្នាំនេះពួកគេមិនអាចធ្វើបែបនេះបានឡើយព្រោះតែការផ្ទុះជំងឺកូវីដ ១៩ ជុំវិញពិភពលោក ។
សម្រាប់ក្រុមគ្រួសារមួយចំនួន វាមានន័យថា ការធ្វើដំណើរកម្សាន្តក្នុងប្រទេស ឬសម្រាកនៅផ្ទះដ៏ស្កឹមស្កៃរបស់ខ្លួន ។ ប៉ុន្តែសម្រាប់ក្រុមគ្រួសារផ្សេងទៀតដែលមានស្តុកស្តម្ភ ពួកគេរកបានជម្រើសថ្មីមួយដើម្បីចាយវាយហើយ ។
ក្រុមហ៊ុន Embark Beyond បានចាប់ផ្តើមកញ្ចប់បោះជំរុំថ្មីមួយសម្រាប់អ្នកមានដែលបានអញ្ជើញក្រុមគ្រួសារមកស្នាក់នៅ ហែលទឹក លេងកីឡា និងចូលរួមសកម្មភាពផ្សេងៗទៀតក្នុងតម្លៃ ១៥ម៉ឺនដុល្លារក្នុងមួយសប្តាហ៍ ។ ក្រុមហ៊ុនថែមទាំងផ្តល់សេវាកម្មមើលថែក្មេងៗថែមទៀត មានន័យថាឪពុកម្តាយអាចឆ្លៀតឱកាសលំហែកាយបានដែរ ។
កម្មវិធីខាងលើមានសកម្មភាពជាច្រើនសម្រាប់ក្មេងៗកម្សាន្ត និងថែមទាំងមានទីប្រឹក្សាឯកជនដែលនៅកំដរក្មេងៗខណៈដែលឪពុកម្តាយអាចធ្វើការ ឬសម្រាក ។
ទីតាំងបោះជំរុំទាំងនេះមានទីតាំងជុំវិញសហរដ្ឋអាមេរិក និងប្រទេសម៉ិកស៊ិក ប៉ុន្តែអ្នកស្នាក់នៅមិនចាំបាច់នៅផ្ទះឈើក្នុងព្រៃទេ ។ ផ្ទុយមកវិញ វាជារីសតថ្លៃៗដែលមានទីធ្លាធំ និងទេសភាពដ៏ទាក់ទាញ។ តម្លៃចូលរួមមានចាប់ពី ៨,៥០០ដុល្លារ ទៅ ១៥ម៉ឺនដុល្លារក្នុងមួយសប្តាហ៍ ។
យោងទៅតាមការផ្សព្វផ្សាយរបស់ក្រុមហ៊ុនបានឲ្យដឹងថា កម្មវិធីដែលផ្តល់ជូនអនុញ្ញាតឲ្យមនុស្សនៅឈ្លាតពីគ្នា ហើយការស្នាក់នៅ ទទួលទានអាហារ និងសកម្មភាពផ្សេងៗក៏មានភាពឯកជនដែរ។
ពេលដែលក្រុមគ្រួសារកក់កម្មវិធីទាំងនេះ ពួកគេនឹងជួបជាមួយនឹងប្រធានកន្លែងបោះជំរុំលើអ៊ីនធើណេតដើម្បីពិភាក្សាពីសកម្មភាពប្រចាំថ្ងៃដែលពួកគេចង់ចូលរួម ។ សកម្មភាពដែលមានផ្តល់ជូនមានភាពខុសៗគ្នាទៅតាមទីតាំងបោះជំរុំ ប៉ុន្តែវារួមមានការឡើងភ្នំ កីឡា ជិះទូក បាញ់ធ្នូ ចាប់ត្រី និងល្បែងកម្សាន្តផ្សេងៗទៀត ៕
ចែករំលែកព័តមាននេះ