រាជធានីភ្នំពេញ ៖ តារាកំប្លែងស្រីដ៏មានប្រជាប្រិយភាពដែលតែងតែធ្វើឱ្យមហាជនផ្ទុះសំណើចនៅលើឆាកនានា គឺអ្នកនាង ខ្ញុង ដែលមានឈ្មោះពេញថា ស្រេង សុកាន់ដា និងស្វាមី នាយកៃដ…
រាជធានីភ្នំពេញ ៖ តារាកំប្លែងស្រីដ៏មានប្រជាប្រិយភាពដែលតែងតែធ្វើឱ្យមហាជនផ្ទុះសំណើចនៅលើឆាកនានា គឺអ្នកនាង ខ្ញុង ដែលមានឈ្មោះពេញថា ស្រេង សុកាន់ដា និងស្វាមី នាយកៃដ បាននិងកំពុងធ្វើឱ្យអ្នកគាំទ្រព្រួយបារម្ភជាខ្លាំងទៅលើការសម្រេចិត្តសម្រាលកូនមុនថ្ងៃកំណត់ ។
មកទល់ពេលនេះ ខ្ញុង និងស្វាមី នាយកៃដ កំពុងតែសម្រាកនៅក្នុងមន្ទីរពេទ្យមួយកន្លែង ដើម្បីត្រៀមសម្រាលកូនទី២ របស់នាង ដោយបានធ្វើឱ្យមហាជនដែលតែងតែគាំទ្រកើតការងឿងឆ្ងល់យ៉ាងខ្លាំងថា មូលហេតុអ្វីទៅបានជាតារាកំប្លែងពូកែវោហារសព្ទរូបនេះ សម្រេចចិត្តសម្រាលកូនមុនខែភ្លាមៗ ទាំងដែលពេលនេះកំពុងតែពពោះ៨ខែ ។
រីឯមូលហេតុដែលនាំឱ្យតារាកំប្លែងរូបនេះ សម្រេចចិត្តបែបនេះ ពីព្រោះតែនាងរវល់ និងមមាញឹកនឹងការងារខ្លាំងពេក ទាំងការងារសិល្បៈ និងការងាររកស៊ីផងដែរនោះ ទើបធ្វើឱ្យនាងគ្មានពេលវេលាគ្រប់គ្រាន់សម្រាប់ថែរក្សាសុខភាពឱ្យបានត្រឹមត្រូវនៅកំឡុងពេលកំពុងតែពពោះបែបនេះ ។ នេះបើយាងតាមការបង្ហោះសារមួយយ៉ាងខ្លីតាមរយៈបណ្តាញសង្គមហ្វេសប៊ុករបស់ ខ្ញុង កាលពីម្សិលមិញនេះដោយបានសរសេរថា « ខុសមកពីម៉ាក់ ធ្វើការច្រើន ធ្វើការធ្ងន់ គិតច្រើន មែនទេ បានក្លាយទៅជាចឹង រឹងមាំឡើងណាកូន» ។
ទោះជាយ៉ាងណាក៏ដោយ ក៏មានអ្នកជូនពរ និងលើកទឹកចិត្ត ព្រមទាំងផ្តល់ជាកម្លាំងចិត្តដល់រូបនាងផងដែរ ពីសំណាក់មហាជនយ៉ាងច្រើន និងរង់ចាំមើលសមាជិកថ្មីរបស់នាង និងស្វាមី ហើយមកដល់ត្រឹមព្រឹកថ្ងៃទី ១៩ ខែមិថុនា ឆ្នាំ២០២០ នេះ នៅមិនទាន់មានដំណឹងអ្វីបន្ថែមទៀតពីការសម្រាលកូនរបស់អ្នកនាង ខ្ញុង នៅឡើយទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ