តាមប្រភពព័ត៌មាន CNN បានឱ្យដឹងថា ការសិក្សាថ្មីមួយដែលត្រូវបានចេញផ្សាយកាលពីថ្ងៃព្រហស្បតិ៍ នៅក្នុង JAMA Oncology បានបង្ហា្ថញថា ការអង្គុយច្រើនពេកអាចបង្កើនហានិភ័យឱ្យកើតមហារីក។
លោកស្រីវេជ្ជបណ្ឌិត Susan Gilchrist សាស្ត្រាចារ្យរងផ្នែកការពារជម្ងឺមហារីកនៅមជ្ឈមណ្ឌលជំងឺមហារីក MD Anderson នៃសាកលវិទ្យាល័យ Texas បាននិយាយថា៖ «នេះគឺជាការស្រាវជ្រាវដំបូងដែលបង្ហាញពីការផ្សាភ្ជាប់គ្នាយ៉ាងរឹងមាំ រវាងការមិនធ្វើចលនា និងការបាត់បង់ជីវិត ដោយសារជំងឺមហារីក»។
លោកស្រីបានបន្ថែមថា៖ «ទោះជាយ៉ាងណាក៏ដោយ យើងអាចកាត់បន្ថយអត្រាកើតមហារីក ដោយការជំនួសការអង្គុយ ជាមួយនឹងការធ្វើលំហាត់ប្រាណស្រាលៗ រយៈពេល៣០នាទី»។
លោកស្រីវេជ្ជបណ្ឌិត បាននិយាយនៅក្នុងសេចក្តីថ្លែងការណ៍មួយថា៖ «ការស្រាវជ្រាវរបស់យើង បានធ្វើឱ្យការលើកឡើងមកថា យើងគួរតែអង្គុយឱ្យតិចជាមុន ហើយធ្វើចលនាឱ្យបានច្រើន កាន់តែមានភាពជាក់លាក់បន្ថែម»។
ការសិក្សាបានស្នើឱ្យមនុស្សប្រហែល ៨,០០០ នាក់ពាក់ឧបករណ៍តាមដាន អំឡុងពេលភ្ញាក់ពីដំណេករបស់ពួកគេរយៈពេល៧ថ្ងៃជាប់ៗគ្នា ក្នុងរយៈពេលចន្លោះឆ្នាំ ២០០៩ និង ២០១៣។ គ្មាននរណាម្នាក់មានជំងឺមហារីក នៅពេលចាប់ផ្តើមនៃការស្រាវជ្រាវនោះទេ។
អ្នកចូលរួមទាំងអស់ គឺជាផ្នែកមួយនៃការស្រាវជ្រាវវែង ដែលមានឈ្មោះថា REGARDS។ គេបានជ្រើសរើសមនុស្សពេញវ័យជនជាតិអាមេរិកាំងជាង ៣០,០០០នាក់ ដែលមានអាយុលើសពី ៤៥ឆ្នាំ ចន្លោះពីឆ្នាំ ២០០៣ ដល់ ២០០៧។ វាត្រូវបានឧបត្ថម្ភដោយវិទ្យាស្ថានសុខភាពជាតិសហរដ្ឋអាមេរិក។
បន្ទាប់ពីការតាមដានអស់រយៈពេល៥ឆ្នាំ អ្នកស្រាវជ្រាវបានរកឃើញថា មនុស្សដែលអង្គុយច្រើនបំផុតមានហានិភ័យខ្ពស់ នៃការស្លាប់ដោយសារជំងឺមហារីក បើប្រៀបធៀបទៅនឹងមនុស្សដែលឧស្សាហ៍កម្រើក និងធ្វើចលនា៕ ដកស្រង់ចេញពីវេបសាយ ៖ edition (កែសម្រួលដោយ ៖ បុប្ផា)
ចែករំលែកព័តមាននេះ