ថ្នាក់ដឹកនាំខេត្តចុះពិនិត្យសកម្មភាពរៀន និងបង្រៀនពីចម្ងាយតាមប្រព័ន្ធអេឡិចត្រូនិច
- សៀមរាប
ខេត្តសៀមរាប ៖ នាថ្ងៃពុធ ១២រោច ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៧ ខែមិថុនា…
ខេត្តសៀមរាប ៖ នាថ្ងៃពុធ ១២រោច ខែជេស្ឋ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៧ ខែមិថុនា ឆ្នាំ២០២០ លោក ពៅ ពិសិដ្ឋ អភិបាលរងខេត្ត តំណាងលោក ទៀ សីហា អភិបាល នៃគណៈអភិបាលខេត្តសៀមរាប អញ្ជើញចុះពិនិត្យសកម្មភាពការរៀន និងបង្រៀនពីចម្ងាយ តាមប្រព័ន្ធអេឡិចត្រូនិក (Online) នៅវិទ្យាល័យអង្គរ ខេត្តសៀមរាប។
លោក ពៅ ពិសិដ្ឋ អភិបាលរងខេត្ត ការចុះពិនិត្យសកម្មភាពរៀន និងបង្រៀនពីចម្ងាយតាមប្រព័ន្ធអេឡិចត្រូនិចនៅ វិទ្យាល័យអង្គរខេត្តសៀមរាបនេះ ដើម្បីធានាបានថាកម្មវិធីអប់រំនៅតែអាចប្រព្រឹត្តទៅដោយរលូន ទោះ បីសាលាកំពុងត្រូវបានបិទជាបណ្ដោះអាសន្នក្នុងស្ថានភាពអន្តរកាលដែលបង្កដោយជំងឺកូវីដ-១៩ ក៏ដោយ។ ក្នុងកិច្ចប្រជុំសាមញ្ញលើកទី១៣ លោកអភិបាលខេត្តសង្កត់ធ្ងន់ផងដែរចំពោះបញ្ហាអប់រំ ព្រមទាំងបានណែនាំដល់មន្ទីរអប់រំយុវជន និងកីឡាខេត្ត ត្រូវចាត់មន្ត្រីពិនិត្យតាមដានក្នុងការ បង្រៀនតាមរយៈប្រព័ន្ធ Online ជាប្រចាំ ដើម្បីទប់ស្កាត់ការធ្លាក់ចុះគុណភាពនៃការសិក្សា។
សូមជម្រាបថា ខណៈដែលក្រសួងអប់រំយុវជន និងកីឡា បានបិទសាលាជាបណ្ដោះអាសន្នក្រសួង បានប្រឹងប្រែងអស់ពីលទ្ធភាពក្នុងការលើកកម្ពស់គុណភាពអប់រំពីចម្ងាយ និងតាមប្រព័ន្ធ អេឡិចត្រូនិច ផលិតនូវមាតិកាឌីជីថលចាក់ផ្សាយទាំងតាមប្រព័ន្ធអ៊ីនធឺណិត និងនៅលើកញ្ចក់ ទូរទស្សន៍ ផ្ដល់ភាពអំណោយផលដល់សិស្សទាំងនៅទីក្រុង និងជនបទ ដើម្បីធានាបានថាកម្មវិធី អប់រំប្រព្រឹត្តទៅប្រកបដោយសមធម៌ និងបរិយាបន្ន។ ទន្ទឹមនឹងការប្រឹងប្រែងរបស់ក្រសួងអប់រំក្រោម ការចង្អុលបង្ហាញដោយរាជរដ្ឋាភិបាលកម្ពុជាក៏មានការចូលរួមគាំទ្រពីសំណាក់ដៃគូស្ថាប័នពាក់ព័ន្ធ នានាផងដែរ៕ ដោយ ៖ ច័ន្ទ រស្មី
ចែករំលែកព័តមាននេះ