ការបើកបរឬធ្វើដំណើរនៅពេលយប់អាចរាប់ថា ជាការផ្សងនឹងគ្រោះថ្នាក់ខ្លះដែរ ពិសេសនៅលើស្ថានភាពផ្លូវដែលពុំមានភ្លើងបំភ្លឺតាមចិញ្ចើមផ្លូវ ពោលគឺងងឹតស្លុបតែម្តង ស្របពេលដែលអ្នកបញ្ជាយានខ្វះបទពិសោធក៏ដូចជាស្គាល់ភូមិសាស្ត្រមិនច្បាស់នោះ ។
ខាងក្រោមនេះ គឺជាបច្ចេកទេសខ្លះៗដើម្បីទទួលបានសុវត្ថិភាពក្នុងការបើកបរលើស្ថានភាពផ្លូវបែបនេះ ៖
១-កុំភ័យតក់ស្លុតឬខ្លាចរអាឱ្យសោះ ដាក់អារម្មណ៍ថា ការបើកបររថយន្តពេលយប់មិនមានអ្វីគួរឱ្យខ្លាចជាងពេលថ្ងៃទ្បើយ ដូចនេះគ្រាន់តែរក្សាភាពវាងវៃបន្តិចទៅគឺបានហើយ ។
២-បើកភ្លើងមុខនោះអ្នកអាចមើលឃើញពីទិសដៅ ដែលខ្លួនបម្រុងនឹងសំដៅឆ្ពោះទៅដូច្នេះចូរប្រើប្រាស់វាឱ្យបានទៀងទាត់ ហើយប្រើតែភ្លើងហ្វាទៅបានហើយនៅពេលដែលអ្នកត្រូវការមើលឃើញបានឆ្ងាយពីផ្នែកខាងមុខ ។ ប៉ុន្តែសូមចងចាំថា ជានិច្ចកាលត្រូវតែទម្លាក់វាមកភ្លើងកូតវិញ ពេលណាមានរថយន្តដទៃមកពីមុខអ្នក ឬក៏នៅពេលរថយន្តខាងមុខប្រើហ្វាដែរ ។
៣-លៃលកឆ្លើយតបឱ្យបានសមគួរជាមួយនឹងរថយន្តដែលបើកបញ្ច្រាសទិស ។ នៅពេលរថយន្តដទៃកំពុងបោះពួយសំដៅមករកអ្នកចូររក្សាក្រសែភ្នែកងាកចេញតាមដែលអាចធ្វើទៅបាន ធ្វើបែបនេះនឹងការពារអ្នកពីភាពស្រវាំងភ្នែកដោយភ្លើងរថយន្តខាងមុខ ។
៤-រក្សាក្រសែភ្នែកផ្តោតលើគំនូសសញ្ញាលើដងផ្លូវ ។ ភ្លើងមុខរបស់រថយន្តនឹងមិនបំភ្លឺច្បាស់បានឆ្ងាយពីគោលដៅខាងមុខទ្បើយ ដូច្នេះចាំបាច់ត្រូវប្រុងប្រយ័ត្នជានិច្ចពីទីតាំងដែលអ្នកស្ថិតនៅនឹងគំនូសសញ្ញា ។ សម្លឹងទៅមុខមើលពីតម្រុយនៃឧបសគ្គដែលនឹងកើតមានឧទាហរណ៍ការជាន់ហ្វ្រាំងរបស់រថយន្តខាងមុខ ពីព្រោះចំណុចនេះអាចបង្ហាញពីជ្រុងមួយនៃគ្រោះថ្នាក់នៅខាងមុខ ។
៥-ប្រសិនបើមើលមិនច្បាស់ឬមានការសង្ស័យក្នុងចិត្តអ្វីជាឧបសគ្គខាងមុខ ចូរបង្អន់ល្បឿនរថយន្តភ្លាម ។ ពីព្រោះវាអាចផ្តល់ឱកាសដល់អ្នកកាន់តែច្រើនសម្រាប់ឆ្លើយតបទៅនឹងហេតុការណ៍គ្រោះថ្នាក់នោះ ។ ចូរប្រុងប្រយ័ត្ននិងមិនត្រូវបើកយឺតពេកទេ វានឹងអាចបណ្តាលឱ្យកើតមានគ្រោះថ្នាក់ដល់អ្នកប្រើប្រាស់ផ្លូវដទៃ ។
៦-រក្សាការបើកនិងប្រើប្រាស់គន្លងផ្លូវឱ្យច្បាស់ ។ កុំព្យាយាមធ្វើឱ្យរំខានតាមរយៈកត្តាផ្សេងៗនៅជុំវិញអ្នក ការធ្វើដូច្នេះវានឹងអូសបន្លាយពេលវេលានៃការប្រតិកម្មតបរបស់អ្នកចំពោះហេតុការណ៍ណាមួយ ៕
ចែករំលែកព័តមាននេះ