ខេត្តបន្ទាយមានជ័យ ៖ សត្វគ្រាលខ្យងរាប់ពាន់ក្បាល បានចុះរកស៊ីចំណីនៅទំនប់អាងអូរខៃដន នៅពេលដែលមន្ត្រីជំនាញសុំឱ្យអាជ្ញាធរ មានសមត្ថកិច្ច សូមចូលរួមថែរក្សា និងការពារទុកឱ្យអាចក្លាយជាតំបន់ទេសចរណ៍។
បើតាមប្រជាពលរដ្ឋរស់នៅតំបន់អាងអូរខៃដន បានប្រាប់ថា សត្វគ្រាលខ្យង ទាំងហ្វូងរាប់ពាន់ក្បាលបានចុះរកស៊ីចំណីនៅចំណុចទំនប់អាងអូរខៃដន នៅពេលទឹកគោគរាគរយៈពេលជាងមួយសប្តាហ៍មកហើយ ហើយក៏ឃើញមានបងប្អូនប្រជាពលរដ្ឋដែលក្បែរទីនោះបាននាំគ្នាទៅមើលកំសាន្ត ព្រោះមិនដែលឃើញហ្វូងសត្វនេះ ចុះរកចំណីទីនោះឡើយ។
ស្របពេលនោះមន្ត្រីជំនាញក៏បានសំណូមពរដល់អាជ្ញាធរ និងមន្ត្រីមានសមត្ថកិច្ចត្រូវចូលរួមការពារ និងថែរក្សាហ្វូងសត្វគ្រាលខ្យង មិនត្រូវឱ្យមានអ្នកមកបរបាញ់សត្វទាំងនេះនោះទេ ហើយហ្វូងសត្វនេះមករកចំណីនៅទំនប់អាងអូរខៃនដន បានទាក់ទាញប្រជាពលរដ្ឋនាំគ្នាមកមើលលេងកំសាន្ត និងអាចទាក់ទាញភ្ញៀវទេសចរណ៍ផងដែរនាថ្ងៃអនាគត។
មន្ត្រីជំនាញបានបញ្ជាក់ថា ហ្វូងសត្វគ្រាលខ្យងនេះ បើសិនជាតំបន់មានចំណីដូចនៅទំនប់ អាងអូរខៃដន ដែលកំពុងរីងទឹក គឺហ្វូងសត្វមករកចំណីទាំងហ្វូង បើគ្មានអ្នកបរបាញ់ទេនោះ ហ្វូងសត្វនេះនឹងចុះរកស៊ីចំណីរហូត ដូច្នេះសូមចូលរួមការពារថែរក្សាហ្វូងសត្វគ្រាលខ្យងទាំងអស់គ្នា មិនត្រូវបរបាញ់ឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ