រាជធានីភ្នំពេញ ៖ រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានអះអាងថា នឹងប្រមូលយកមតិ ដើម្បីដោះស្រាយស្តាចិញ្ចឹមជ្រូកឡើងវិញ បន្ទាប់ពីប្រឈមជំងឺប៉េសជ្រូកអាហ្វ្រិក និងជំងឺកូវីដ១៩ ។
លោក វេង សាខុន រដ្ឋមន្ត្រីក្រសួងកសិកម្មបានសរសេរលើបណ្តាញសង្គម នៅថ្ងៃទី១៨ ខែមិថុនា ឆ្នាំ២០២០ថា ក្នុងនាមថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ខ្ញុំសូមថ្លែងអំណរគុណយ៉ាងជ្រាលជ្រៅបំផុតចំពោះកសិករជាអ្នកចិញ្ចឹមសត្វ អាជីករកាប់សាច់លក់ និងលក់សាច់ ហើយនិងប្រជាជនជាអ្នកទិញទទួលទានទាំងអស់ ដែលបានចូលរួមផ្តល់ជាយោបល់មកដល់ខ្ញុំស្តីពីតម្លៃសត្វរស់ និងតម្លៃលក់សាច់សត្វនៅលើទីផ្សារនាពេលបច្ចុប្បន្ន ។
លោកបញ្ជាក់ថា ៖«ក្រសួងនឹងប្រមូលមតិយោបល់ទាំងអស់មកពិនិត្យពិចារណា និងដោះស្រាយឲ្យទទួលយកបានទាំងអស់គ្នា ដោយឈរលើស្មារតីទទួលខុសត្រូវខ្ពស់ក្នុងដំណាក់កាលដ៏លំបាកនៃការស្តា ការចិញ្ចឹមសត្វជ្រូក ក្រោយពេលនៃការប្រឈមជម្ងឺប៉េសជ្រូកអាហ្វ្រិកកន្លងមក និងការរីករាលដាលសកលនៃមេរោគកូវីដ១៩ នាពេលបច្ចុប្បន្ន»។
លោកបន្តថា ដោយយោងតាមសេចក្តីរាយការណ៍របស់លោកឧក ញ៉ា ប៊ុត ចាន់ធូ ដែលជាក្រុមហ៊ុននាំជ្រូករស់ពីប្រទេសថៃមកកម្ពុជា ក្នុងចំណោមក្រុមហ៊ុនទាំងប្រាំមួយ ដែលក្រសួងបានផ្តល់លិខិតអនុញ្ញាតឲ្យនាំចូលជ្រូករស់បានឲ្យដឹងថា
តម្លៃជ្រូករស់មកដល់ព្រំដែនកម្ពុជា ថៃ គឺ ៨១បាតថៃ ស្មើនឹង ១០ ៦៥១ រៀល/គក្រ ហើយត្រូវបង់ពន្ធគយនាំចូលចំនួន ៤៤ ២០០ រៀល/ក្បាល ក្នុងទម្ងន់ ៦០ គក្រ គិតនៅថ្ងៃទី១៧ ខែកុម្ភៈ ឆ្នាំ២០២០ ។
ដូច្នេះជ្រូករស់ក្នុងមួយគីឡូក្រាមមានតម្លៃ ១១ ៣៨៧ រៀលទៅហើយ មិនទាន់គិតថ្លៃដឹកជញ្ជូនមកកាន់គោលដៅផង ។
លោកគូសថា កន្លងមកក្រសួងមានភាពអត់ធ្មត់ណាស់ ចំពោះបញ្ហានេះ ប៉ុន្តែក្រសួងនៅតែពិនិត្យឃើញថា នៅតែមានបុគ្គលមួយចំនួន នាពេលថ្មីៗនេះ នៅតែចិញ្ចឹមចិត្តបន្តខិតខំបំផុសយកព័ត៌មានមិនពិតមកចុះផ្សាយថា តម្លៃជ្រូករស់នៅព្រំដែនថៃ មានតម្លៃតែ ៧៧ បាត នាពេលបច្ចុប្បន្ន តែនេះជាតម្លៃកាលជាងពីរសប្តាហ៍កន្លងទៅ ។
លើសពីនេះ គឺគេបានខិតខំបញ្ចេញមតិយ៉ាងងងើល ដោយមិនបានខិតខំស្វែងយល់អ្វីទាំងអស់ដែលបានធ្វើឲ្យប៉ះពាល់មកលើសមត្ថកិច្ចជំនាញមិនគួរអត់អោនឲ្យបាន ៕
ចែករំលែកព័តមាននេះ