ខេត្តព្រះវិហារ ៖ ខណៈមនុស្សមួយចំនួនមានកម្លាំងពេញរាងកាយបែរជាដើរសុំលុយតាមដងផ្លូវមួយចំនួននៅក្រុងភ្នំពេញ យើងក្រឡេកទៅមើលបងប្អូនមួយក្រុមនៅខេត្តព្រះវិហារវិញបាននឹងកំពុងប្រកបរបរសុចរិត ទោះប្រើកម្លាំងកាយខ្លាំងក្លាយ៉ាងណាក៏ដោយ ។
ជាក់ស្តែងក្រុមបងប្អូនដែលមានវ័យក្មេងរង្វង់២០ ឆ្នាំស្តើង ដោយសារតែកត្តាជីវភាពត្រូវរកប្រាក់កម្រៃ ដើម្បីចិញ្ចឹមជីវិត បងប្អូនប្រជាពលរដ្ឋជាច្រើននាក់ ដែលរស់នៅតំបន់ភ្នំត្បែងមានជ័យ បានប្រើកម្លាំងកាយធ្វើការ ដោយការលីស៊ីម៉ង់ត៍ សែងម៉ូតូ ឬមនុស្សពីក្រោមឡើងទៅលើកំពូលភ្នំ ដែលមានកម្ពស់ខ្ពស់ ឃើញហើយពិតជាទប់ទឹកភ្នែកសឹងតែមិនបាន ។
បើតាមការឲ្យដឹងពីព្រះតេជគុណ ស៊ី សំណាង ដែលគង់នៅវត្តឧណ្ណាលោម ក្នុងរាជធានីភ្នំពេញ បានមានថេរដីកាថា ក្នុងនាមព្រះអង្គជាសហការីអនុគណស្រុកសង្គមថ្មី បានទៅទស្សនកិច្ច និងត្រួតពិនិត្យមើលសាងសង់វត្តដំបូកខ្មៅ ដែលស្ថិតនៅលើភ្នំត្បែងក៏បានប្រទះឃើញបងប្អូនជាច្រើននាក់ធ្វើការលីស៊ីម៉ង់ត៍ ខ្លះសែងម៉ូតូ និងខ្លះទៀតសែងមនុស្សឡើងទៅលើកំពូលភ្នំ ។
ព្រះអង្គបានមានថេរដីកាបន្តថា នៅពេលដែលសួរនាំបងប្អូនទាំងនោះបានឲ្យដឹងថា ពួកគាត់ជាប្រជាពលរដ្ឋរស់នៅតំបន់នោះដោយឆ្លៀតពេលទំនេរពីការសិក្សា និងការងារផ្សេងៗ បាននាំគ្នាប្រើកម្លាំងពលកម្មដោយលីស៊ីម៉ង់ត៍ពីក្រោមឡើងទៅលើកំពូលភ្នំ ដើម្បីបានប្រាក់កម្រៃសម្រាប់ចិញ្ចឹមជីវភាពគ្រួសារ ដោយការលីស៊ីម៉ង់ត៍ក្នុងមួយជើងទទួលបានកម្រៃ២ម៉ឺនរៀល ហើយក្នុងមួយថ្ងៃលីបាន២ជើង សរុបបាន៤ម៉ឺនរៀល ។
បើតាមព្រះអង្គចំពោះការសែងម៉ូតូទៅលើកំពូលភ្នំវិញ ត្រូវបានប្រើកម្លាំងមនុស្ស៤នាក់ ដោយការសែងម៉ូតូ១គ្រឿង គឺទទួលបានប្រាក់២០ម៉ឺនរៀល ហើយពេលចែកគ្នាទៅបានម្នាក់៥ម៉ឺនរៀល ។ ក្រៅពីការលីស៊ីម៉ង់ត៍ សែងម៉ូតូ ឬរបស់ផ្សេងៗក៏នៅមានការសែងមនុស្សឡើងទៅលើកំពូលភ្នំផងដែរ សម្រាប់ភ្ញៀវទេសចរដែលគាត់គ្មានកម្លាំងសម្រាប់ឡើងទៅដោយការសែងមនុស្ស គឺត្រូវបានប្រើកម្លាំងមនុស្ស៤នាក់ដូចគ្នា ហើយប្រាក់កម្រៃដែលទទួលបានវិញ ខ្លះឲ្យ២០ម៉ឺនរៀល ខ្លះឲ្យ២៥ម៉ឺនរៀល ហើយខ្លះទៀតឲ្យ៣០ម៉ឺនរៀល ទៅតាមអ្នកដែលមានចិត្តទូលាយ ។
ព្រះតេជគុណ ស៊ី សំណាង មានថេរដីកាបន្តថា ព្រះអង្គបានប្រើពេលជាង៣ម៉ោងទើបឡើងទៅដល់កំពូលភ្នំ ហើយការឡើងទៅលើកំពូលភ្នំត្បែង គឺមាន២ដំណាក់កាល
ដោយដំណាក់កាលទី១ យើងត្រូវដើរចម្ងាយផ្លូវជាង១គីឡូកន្លះ ហើយដំណាក់កាលទី២ គឺត្រូវឡើងកាំជណ្តើរជាង១ពាន់កាំ និងត្រូវឡើងបន្ត២៥៣កាំទៀត ទើបទៅដល់វត្តដំបូកខ្មៅ ។ ព្រះអង្គបានបន្ថែមទៀតថា វត្តដំបូកខ្មៅនេះមានព្រះសង្ឃគង់នៅ៤នាក់ យាយជី តាជី៧នាក់ និងមានបងប្អូនប្រជាពលរដ្ឋរស់នៅចំនួន៧គ្រួសារ ស្ថិតនៅលើកំពូលភ្នំត្បែង ក្នុងស្រុកត្បែងមានជ័យ និងស្រុកសង្គមថ្មី ខេត្តព្រះវិហារ ដោយសារមានព្រំប្រទល់ជាប់គ្នា ។
ព្រះតេជគុណ ស៊ី សំណាង មានថេរដីកាបញ្ជាក់ថា នៅទីនោះមិនសូវមានអ្នកលក់ដូរច្រើននោះទេ គឺមានតែ២ ឬ៣តូបប៉ុណ្ណោះ ហើយប្រសិនបើបងប្អូនភ្ញៀវទេសចរ ឬពុទ្ធិបរិស័ទចង់ទៅកាន់វត្តដំបូលខ្មៅ គួរត្រៀមម្ហូបអាហារដោយខ្លួនឯង ទើបជាការងាយស្រួល ៕
ចែករំលែកព័តមាននេះ