ខេត្តបន្ទាយមានជ័យ ៖ ទីតាំងសង្ស័យលក់ផលិតផលស៊ីសា និងបារីអេឡិចត្រូនិកចំនួន២កន្លែង នៅក្នុងសង្កាត់ប៉ោយប៉ែត ក្រុងប៉ោយប៉ែត ត្រូវបាននគរបាលជំនាញមកពីក្រសួងមហាផ្ទៃសហការជាមួយនគរបាលក្រុងប៉ោយប៉ែត ដឹកនាំដោយលោកមាស ចន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ…
ខេត្តបន្ទាយមានជ័យ ៖ ទីតាំងសង្ស័យលក់ផលិតផលស៊ីសា និងបារីអេឡិចត្រូនិកចំនួន២កន្លែង នៅក្នុងសង្កាត់ប៉ោយប៉ែត ក្រុងប៉ោយប៉ែត ត្រូវបាននគរបាលជំនាញមកពីក្រសួងមហាផ្ទៃសហការជាមួយនគរបាលក្រុងប៉ោយប៉ែត ដឹកនាំដោយលោកមាស ចន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ បានចុះធ្វើការត្រួតពិនិត្យកាលពីរសៀលថ្ងៃទី១៧ មិថុនា ២០២០។
ករណីចុះពិនិត្យទីតាំងខាងលើនេះ សមត្ថកិច្ចបានដកហូតសម្ភារជាវត្ថុតាងជាច្រើនមុខដើម្បីយកទៅពិនិត្យថាតើមានពាក់ព័ន្ធនឹងផលិតផលហាមឃាត់ ឬយ៉ាងណា ។ ទោះបីជាយ៉ាងណា សមត្ថកិច្ចមិនបានប្រាប់លម្អិត និងបញ្ជាក់ពីឈ្មោះមុខទំនិញដែលសង្ស័យទាំងនោះទេ។
តាមប្រភពពីនគរបាលម្នាក់មិនប្រាប់អត្តសញ្ញាណដែលស្ថិតនៅទីតាំងចុះពិនិត្យផ្ទាល់មួយកន្លែងមុខសាលាបឋមសិក្សាព្រហ្មនិមិត្ត ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត បានប្រាប់ឱ្យដឹងថា ការចុះពិនិត្យទីតាំងខាងលើនាថ្ងៃនេះ គឺពិនិត្យករណីលក់ផលិតផលស៊ីសានិងបារីអេឡិចត្រូនិកដែលអាជ្ញាធរគ្រឿងញៀនបានចេញសេចក្តីណែនាំតាំងពីឆ្នាំ២០១៤ ឈប់ឲ្យប្រើផលិតផលទាំងនេះ ព្រោះអាចប្រើច្របូកច្របល់ជាមួយគ្រឿងញៀន ធ្វើឲ្យសមត្ថកិច្ចពិបាកស្រាវជ្រាវ និងបង្ក្រាប។
តាមប្រភពដដែលបានបន្តថា ការចុះពិនិត្យនៅថ្ងៃនេះគឺធ្វើឡើង២ទីតាំងក្នុងក្រុងប៉ោយប៉ែត ដឹកនាំដោយលោកមាស ចន្ទពិសិដ្ឋ ព្រះរាជអាជ្ញាអមសាលាដំបូងខេត្តតែម្តង ។
តាមប្រភពពីសមត្ថកិច្ចម្នាក់ទៀតបានឱ្យដឹងថា ក្រុមការងារមកពីក្រសួងមហាផ្ទៃគឺគណៈកម្មការប្រយុទ្ធប្រឆាំងផលិតផលក្លែងក្លាយរបស់ក្រសួងមហាផ្ទៃ៕ (កែសម្រួលដោយ ៖ ធីតា)
ចែករំលែកព័តមាននេះ