សម្រាប់អាជីវករភាគច្រើន ការផ្តល់ផលិតផល ឬសេវាកម្មហ្វ្រីៗប្រហែលជាមិនសមហេតុសមផលបន្តិចសោះឡើយ ។ ប៉ុន្តែប្រសិនបើពួកគេយល់ដឹងពីយុទ្ធសាស្ត្រមួយចំនួននោះ ពួកគេអាចនឹងទទួលបានអត្ថប្រយោជន៍ជាច្រើនពីការចែកផលិតផល និងសេវាកម្មរបស់ខ្លួនដោយឥតគិតថ្លៃ ។ ខាងក្រោមគឺជាផលចំណេញមួយចំនួនដែលអាជីវករអាចទទួលបានពីយុទ្ធសាស្ត្រនេះ ៖
១. អ្នកទទួលបានអាសយដ្ឋានទំនាក់ទំនងរបស់អតិថិជន
អាជីវករជាច្រើនសុខចិត្តប្តូរផលិតផល និងសេវាកម្មរបស់ខ្លួនជាមួយនឹងអាសយដ្ឋានទំនាក់ទំនងរបស់អតិថិជនដូចជាអ៊ីមែល ឬលេខទូរស័ព្ទជាដើម ព្រោះអាសយដ្ឋាននេះមានសារៈសំខាន់ណាស់សម្រាប់ការផ្សព្វផ្សាយទំនិញនៅថ្ងៃមុខ ហើយអតិថិជនដែលមិនទាន់ទិញពីអ្នកនៅថ្ងៃនេះនៅតែអាចទិញពីអ្នកនៅថ្ងៃក្រោយ ។
២. អ្នកជួយឲ្យអ្នកដទៃយល់ដឹងបន្ថែមពីផលិតផល ឬសេវាកម្មរបស់អ្នក
អ្នកផ្គត់ផ្គង់សេវាកម្មមួយចំនួនយល់ពីចំណុចនេះច្បាស់លាស់ ព្រោះមុនពេលអតិថិជនអាចសម្រេចចិត្តប្រើសេវារបស់អ្នកពិតប្រាកដនោះ ពួកគេត្រូវយល់ដឹងថាសេវាកម្មរបស់អ្នកល្អប៉ុនណាជាមុនសិន ។ យុទ្ធសាស្ត្រនេះកាន់តែសំខាន់ទៀតសម្រាប់សេវាកម្មថ្មីៗដែលមិនធ្លាប់មានលើទីផ្សារក្នុងប្រទេសពីមុនមក ដូចជាសេវាគិតគូរប្រាក់តាមទូរស័ព្ទពេលដែលទើបចូលមកកម្ពុជាដំបូងជាដើម ។
៣. ជួយផ្សព្វផ្សាយអាជីវកម្មរបស់អ្នក
ការចែកផលិតផលហ្វ្រីៗជាវិធីងាយក្នុងការទាក់ទាញអតិថិជន ជាពិសេសលើប្រព័ន្ធសង្គម ព្រោះមនុស្សងាយនឹងចុច Like ណាស់ តែមិនងាយចុច Unlike វិញទេ ។ ក្រៅពីនេះហើយ ការចែកផលិតផលមួយអាចជំរុញឲ្យអតិថិជនចាប់អារម្មណ៍ និងទិញផលិតផលមួយផ្សេងទៀតពីអ្នក ។
៤. ជួយប្រមូលមតិយោបល់ពីអតិថិជន
ប្រសិនបើអ្នកមិនទាន់ច្បាស់ចិត្តលើផលិតផលថ្មីមួយ ឬអ្នកចង់ស្តាប់មតិយោបល់របស់អតិថិជនរបស់អ្នកជាមុនសិនមុននឹងវិនិយោគច្រើនលើផលិតផលទាំងនោះ អតិថិជនដែលគាំទ្រអ្នកជាយូរមកហើយអាចជាមនុស្សល្អជាងគេក្នុងការផ្តល់យោបល់ឲ្យអ្នក ៕
ចែករំលែកព័តមាននេះ