រាជធានីភ្នំពេញ ៖ ព្រឹត្តិការណ៍ កែប សំអាត កែប (Kep Kep Clean) លើកទី២ នៅខេត្តកែបនឹងចាប់ផ្តើមធ្វើសកម្មភាពនៅព្រឹកថ្ងៃទី១៣ ធ្នូ ក្រោមគំនិតផ្តួចផ្តើមពីអង្គការមូលនិធិទឹកចិត្តទាំងបី ដើម្បីបង្កើនសោភ័ណភាព និងភាពទាក់ទាញ
រាជធានីភ្នំពេញ ៖ ព្រឹត្តិការណ៍ កែប សំអាត កែប (Kep Kep Clean) លើកទី២ នៅខេត្តកែបនឹងចាប់ផ្តើមធ្វើសកម្មភាពនៅព្រឹកថ្ងៃទី១៣ ធ្នូ ក្រោមគំនិតផ្តួចផ្តើមពីអង្គការមូលនិធិទឹកចិត្តទាំងបី ដើម្បីបង្កើនសោភ័ណភាព និងភាពទាក់ទាញ ធ្វើឱ្យភ្ញៀវទេសចរចូលមកទស្សនាកម្សាន្តតំបន់ខេត្តកែបកាន់តែច្រើនឡើងថែមទៀត ។
ដោយធ្លាប់មានបទពិសោធន៍ និងទទួលបានជោគជ័យក្នុងការរៀបចំកម្មវិធី Kep Kep Clean លើកទី១ កាលពីឆ្នាំ ២០១៣កន្លងទៅនោះ អង្គការមូលនិធិទឹកចិត្តទាំង៣ បានសហការជាមួយសហព័ន្ធកីឡាវាយកូនបាល់កម្ពុជា រៀបចំគម្រោងនេះជាលើកទី២ ដើម្បីបំផុសស្រទាប់យុវជន ក៏ដូចជាមហាជនទូទាំងប្រទេសឱ្យចូលរួមលើកកម្ពស់សុខភាព និងការថែទាំបរិស្ថានឱ្យមានសោភ័ណភាពកាន់តែស្រស់ស្អាតដើម្បីទាក់ទាញភ្ញៀវទេសចរ ។
ថ្លែងក្នុងសន្និសីទសារព័ត៌មានកាលពីល្ងាចថ្ងៃទី៩ ធ្នូ កញ្ញា Hisae Arai អតីតបវរកញ្ញាជបុ៉នឆ្នាំ២០១១ ដែលជាអគ្គនាយកប្រតិបត្តិអង្គការមូលនិធិទឹកចិត្តទាំង៣ និងជាឯកអគ្គរាជទូតសុច្ឆន្ទៈសហព័ន្ធកីឡាវាយកូនបាល់កម្ពុជាផងនោះ បានលើកឡើងថា នេះគឺជាសកម្មភាពគំរូដ៏ល្អមួយដែលមនុស្សគ្រប់គ្នាចូលរួមអនុវត្តដើម្បីយល់ដឹងអំពីការថែរក្សាទីក្រុងស្អាត និងអភិវឌ្ឍន៍វិស័យទេសចរណ៍ប្រទេសកម្ពុជាឱ្យមានសក្តានុពលថែមមួយកម្រិតទៀត ជាពិសេសគឺការកែលម្អបរិស្ថានខេត្តកែបតែម្តង ។ អតីតបវរកញ្ញាជបុ៉នរូបនេះបានបន្តថា ក្នុងកម្មវិធីនេះ តាមគម្រោងនឹងមានប្រជាពលរដ្ឋ និងយុវជនប្រមាណ២.០០០នាក់ចូលរួមសម្អាតសំរាមនៅក្រុងកែប និងតំបន់ឆ្នេរដើម្បីបង្កើនសោភ័ណភាពនៅទីនោះឱ្យកាន់តែមានបរិស្ថានល្អស្អាត។ កញ្ញា Hisae Arai បានបញ្ជាក់ថា ដើម្បីផ្សារភ្ជាប់ទំនាក់ទំនងល្អរវាងប្រទេសកម្ពុជា-ជបុ៉ន នៅក្នុងកម្មវិធី Kep Kep Clean នោះ យើងក៏នឹងមានរៀបចំកម្មវិធីបង្ហោះខ្លែងមិត្តភាព ដែលក្នុងឱកាសនោះបវរកញ្ញាឯកជបុ៉នឆ្នាំ២០១៤ ក៏ចូលរួមដែរ ។
លោកទេព រិទ្ធីវិទ្ធ នាយកប្រតិបត្តិអង្គការមូលនិធិទឹកចិត្តទាំង៣ និងជាអគ្គលេខាធិការសហព័ន្ធកីឡាវាយកូនបាល់កម្ពុជា បានបញ្ជាក់ថា ក្នុងយុទ្ធនាការលើកទី២នេះ យើងនឹងសម្អាតខេត្តកែបលើទំហំដីប្រមាណ១៥គីឡូម៉ែត្រការ៉េឯណោះ ក្នុងនោះក៏មានការចូលរួមពីសំណាក់ថ្នាក់ដឹកនាំធំៗដូចជា លោកកែន សត្ថា អភិបាលខេត្តកែប និងលោកចម ប្រសិទ្ធ ប្រធានសហព័ន្ធកីឡាវាយកូនបាល់កម្ពុជាផងដែរ ។
លោកឃីត ស៊ីពីន នាយករដ្ឋបាលអង្គការមូលនិធិទឹកចិត្តទាំង៣ ក៏បានបញ្ជាក់ផងដែរថា ក្រៅពីប្រជាពលរដ្ឋ និងមន្ត្រីសំខាន់ៗដែលមានវត្តមាននោះ ក៏មានការចូលរួមពីកីឡាករវាយកូនបាល់កម្ពុជាល្បីៗ និងអ្នកវាយកូនបាល់វ័យក្មេងនៅខេត្តកែប ក៏នឹងចូលរួមក្នុងការរើសសំរាមនៅខេត្តកែបនោះដែរ ៕
ចែករំលែកព័តមាននេះ