ខេត្តកំពង់ស្ពឺ ៖ ផ្ទះលោកអ្នកត្រូវការស្អាត ហើយទីសាធារណៈក៏រឹតតែត្រូវការស្អាតទៀត ដែលមិនគួរណានាំគ្នាយកសំរាមពីផ្ទះខ្លួនឯងមកបោះចោលនៅទីសាធារណៈ ដោយមិនគិតពីផលប៉ះពាល់ដល់បរិស្ថាននោះទេ ។ អ្នកចោលសំរាមទាំងនេះ ត្រូវបានក្រុមការងារសាលាក្រុងច្បារមន និងអ្នកយកព័ត៌មានថតរូបបានទាំងមនុស្ស…
ខេត្តកំពង់ស្ពឺ ៖ ផ្ទះលោកអ្នកត្រូវការស្អាត ហើយទីសាធារណៈក៏រឹតតែត្រូវការស្អាតទៀត ដែលមិនគួរណានាំគ្នាយកសំរាមពីផ្ទះខ្លួនឯងមកបោះចោលនៅទីសាធារណៈ ដោយមិនគិតពីផលប៉ះពាល់ដល់បរិស្ថាននោះទេ ។ អ្នកចោលសំរាមទាំងនេះ ត្រូវបានក្រុមការងារសាលាក្រុងច្បារមន និងអ្នកយកព័ត៌មានថតរូបបានទាំងមនុស្ស និងផ្លាកលេខម៉ូតូទៀតផង ។
យោងតាមប្រភពពីមន្ត្រីសាលាក្រុងច្បារមន មួយរូបបានឲ្យដឹងថា ដោយសង្កេតឃើញនៅជិតសួនច្បារវិមានឯករាជ្យ ស្ថិតក្នុងសង្កាត់ស្វាយក្រវាន់ ក្រុងច្បារមន ជិតសាលាខេត្ត ចេះតែមានគំនរសំរាមមិនចេះអស់ បន្ទាប់ពីក្រុមអ្នកប្រមូលសំរាម បានប្រមូលយកទៅបោះចោលអស់នោះ ថ្នាក់ដឹកនាំបានចាត់ឲ្យក្រុមការងារសាលាក្រុង ឃ្លាំចាំមើលក្រុមមនុស្សដែលមិនចេះគិត យកសំរាមយកទៅបោះចោលនៅជិតសាលាក្រុងធ្វើឱ្យបាត់បង់សោភ័ណភាព ជាពិសេសប៉ះពាល់ដល់បរិស្ថានតែម្ដង ។
មន្ត្រីរូបនេះនិយាយថា មនុស្សម្នាក់ៗគួរតែមានគំនិតពិចារណាឲ្យបានជ្រៅជ្រះ ជាពិសេសគឺរឿងសំរាមនេះតែម្ដង ធ្វើជាមនុស្សកុំចាំបាច់តែគេស្ដីគេថា ត្រូវចេះមានសតិសម្បជញ្ញៈត្រិះរិះពិចារណាឲ្យបានត្រឹមត្រូវ ទើបស័ក្តិសមជាមនុស្សរស់នៅក្នុងសង្គមមួយដ៏ថ្លៃថ្នូរ ។
មានការលើកឡើងទៀតថា កុំឃើញគេលួចយកទៅចោលនៅទីសាធារណៈ ហើយយកគំរូអាក្រក់តាមគេ ត្រូវចេះពិចារណាផង ។ ជាមួយនេះ ក៏មានការសំណូមពរទៅដល់ក្រុមមនុស្សដែលតែងតែយកសំរាមទៅចាក់ចោលនៅទីតាំងខាងលើ ដោយមន្ត្រីរូបនេះលើកឡើងថា «សូមអ្នករស់នៅប្រកបដោយការទទួលខុសត្រូវ ចំពោះសំរាមឬកាកសំណល់របស់ខ្លួន កុំចោលតាមទីសាធារណៈបែបនេះបន្តទៀត» ។
មន្ត្រីរូបនេះ ក៏បានសំណូមពរដល់ក្រុមអ្នកដែលតែងតែយកសំរាមទៅបោះចោលនៅជិតសួនច្បារវិមានឯករាជ្យ និងជិតសាលាខេត្តនោះ ត្រូវបញ្ឈប់ជាបន្ទាន់ នូវរាល់ការយកសំរាមពីផ្ទះ ពីកន្លែងអាជីវកម្មរបស់ខ្លួន យកមកចោលនៅទីបរិវេណសួនសាធារណៈ និងកន្លែងសាធារណៈផ្សេងៗ ដែលធ្វើឲ្យប៉ះពាល់ដល់បរិស្ថាន និងសោភ័ណភាពទីក្រុង ។
ចាប់ពីថ្ងៃនេះទៅ ក្រុមការងារនឹងនៅឃ្លាំមើលគ្រប់ពេលតែម្ដង បើមានបន្តទៀត រូបភាពនឹងកាន់តែច្បាស់ ព្រោះជាប់ទាំងផ្លាកលេខម៉ូតូរបស់អ្នកដែលចោលសំរាមផ្តេសផ្តាស ។
បើថ្ងៃក្រោយក្រុមការងារបានឃើញជាក់ស្ដែង នៅពេលយកសំរាមទៅបោះចោលនៅកន្លែងខាងលើទៀតនោះ នឹងថតរូបភាពអ្នកដែលយកសំរាមទៅបោះចោលទាំងនេះឱ្យច្បាស់ ហើយធ្វើការផ្សព្វផ្សាយជាសាធារណៈឲ្យមហាជនដែលស្រឡាញ់បរិស្ថានបានឃើញមុខមាត់ពិតរបស់ក្រុមមនុស្សដែលតែងតែយកសំរាមទៅបោះចោលនេះ ៕
ចែករំលែកព័តមាននេះ