ខេត្តបាត់ដំបង ៖ បើពិនិត្យលើសកម្មភាពនៃអំពើចោរកម្ម ដែលបាននិងកំពុងកើតឡើងស្ទើររាល់ថ្ងៃ នៅក្នុងខេត្តបាត់ដំបងនាបច្ចុប្បន្ននេះ វាហាក់ដូចជាមិនធ្ងន់ធ្ងរឬធំដុំប៉ុន្មានទេ តែវាបានរុកឆ្កៀលមិនឲ្យសមត្ថកិច្ចដេកបានសុខ ឬបាននៅទំនេរខ្លះឡើយ ហើយក៏បង្កឲ្យមានបញ្ហាអសន្តិសុខនៅក្នុងមូដ្ឋានរំខានដល់ការរស់នៅរបស់ប្រជាពលរដ្ឋស្ទើរទាំងយប់ទាំងថ្ងៃ…
ខេត្តបាត់ដំបង ៖ បើពិនិត្យលើសកម្មភាពនៃអំពើចោរកម្ម ដែលបាននិងកំពុងកើតឡើងស្ទើររាល់ថ្ងៃ នៅក្នុងខេត្តបាត់ដំបងនាបច្ចុប្បន្ននេះ វាហាក់ដូចជាមិនធ្ងន់ធ្ងរឬធំដុំប៉ុន្មានទេ តែវាបានរុកឆ្កៀលមិនឲ្យសមត្ថកិច្ចដេកបានសុខ ឬបាននៅទំនេរខ្លះឡើយ ហើយក៏បង្កឲ្យមានបញ្ហាអសន្តិសុខនៅក្នុងមូដ្ឋានរំខានដល់ការរស់នៅរបស់ប្រជាពលរដ្ឋស្ទើរទាំងយប់ទាំងថ្ងៃ តែបើសមត្ថកិច្ចធ្វើព្រងើយកន្តើយ អំពើចោរកម្មកំប៉ិកកំប៉ុកនេះ អាចនឹងពង្រីកខ្លួនកាន់តែធំឡើងៗ រហូតសមត្ថកិច្ចមិនអាចគ្រប់គ្រងបានឡើយ។
ជាក់ស្ដែង អំពើចោរកម្មដ៏តូចតាចមួយ ដែលផ្ដើមចេញពីការគាស់ទម្លុះទម្លាយបានចូលលួចសម្ភារនៅក្នុងបន្ទប់ នៃស្នាក់ការអង្គការមួយកន្លែង នៅក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ដែលប្រធានអង្គការនេះ បានដឹងនៅព្រឹកថ្ងៃទី១៧ មិថុនា នៅពេលទៅធ្វើការ ។ សមត្ថកិច្ចដែលបានចុះទៅពិនិត្យកន្លែងកើតហេតុបានប្រាប់ឲ្យដឹងថា ទីតាំងកើតហេតុនោះ ជាស្នាក់ការរបស់អង្គការ «អមរា បណ្ដាញការងារស្ត្រីដើម្បីអភិវឌ្ឍន៍» ស្ថិតនៅក្នុងភូមិ សង្កាត់ខាងលើ។
ប្រធាននៃអង្គការនេះ គឺលោក សួស រ៉ាម៉ូ អាយុ៤៩ឆ្នាំ រស់នៅភូមិកំពង់សីម៉ា សង្កាត់វត្តគរ ក្រុងបាត់ដំបង។ សមត្ថកិច្ចបានប្រាប់ថា ជនដែលគេមិនស្គាល់ភិនភាគនោះ បានចូលទៅខាងក្នុង នៃបន្ទប់ធ្វើការរបស់លោកសួស រ៉ាម៉ូ រួចបានលួចយកនូវសម្ភារៈប្រើប្រាសមួយចំនួនដូចជា កុំព្យូទ័រ, LCD, រួមទាំងស្លាកលេខម៉ូតូមួយសន្លឹកផង ដែលមានលេខ បាត់ដំបង !A-2490 និង សម្ភារៈផ្សេងមួយចំនួនទៀត ។
បើតាមអ្នកគ្រង់គ្រង់អង្គការអមរា ដែលសមត្ថកិច្ចបានស្រង់សំដីបាននិយាយថា គាត់បានដឹងថា បាត់បង់សម្ភារនៅក្នុងបន្ទប់ធ្វើការ នៅពេលព្រឹក ពេលគាត់ចូលធ្វើការ ហើយក៏រាយការណ៍ប្ដឹងទៅសមត្ថកិច្ចមូលដ្ឋានតែម្ដង ។ ជុំវិញអំពើចោរកម្មដ៏មមារញឹកដែលបង្កឡើងដោយក្រុមចោរ ដែលភាគច្រើនមិនត្រូវបានគេស្គាល់អត្តសញ្ញាណនេះ ហាក់មិនមានការថមថយខ្លះទេ។
នេះបើតាមការកត់សម្គាល់នូវសកម្មភាពនានា ដែលបានកើតឡើងជាបន្តបន្ទាប់កន្លងទៅនេះ បើទោះជាពេលនេះ ។ បែបទំនងដោយសារតែគ្មានសញ្ញាថមថយនៃបទល្មើសនេះហើយ ទើបនៅក្នុងអង្គភាពស្នងការខេត្តបាត់ដំបង សព្វថ្ងៃនេះ ត្រូវបានក្រសួងមហាផ្ទៃ ប្រកាសតែងតាំងលោកស្នងការរងចំនួន២រូប ដើម្បីក្ដោបក្ដាប់ផែនព្រហ្មទណ្ឌ ។ លោកស្នងការរងទាំង២រូបនោះ មានលោកវរសេនីយ៍ទោ លឹម ពុទ្ធីឡា និង លោកវរសេនីយ៍ទោ ប៉ូវ វណ្ណឌី ។
បេក្ខភាពលោកស្នងការរងទទូលផែនការងារព្រហ្មទណ្ឌទាំង២រូបនេះ សុទ្ធតែជាស្នងការរងដែលទើបតែងតាំងថ្មីជំនួសលោកឧត្តមសេនីយ៍ត្រី ជេត វណ្ណនី អតីតស្នងការរងខេត្ត ដែលត្រូវបានព្រះមហាក្សត្រដាក់ឲ្យចូលនិវត្តន៍កាលពីខែមុននេះ ។ បើទោះជាមានលោកស្នងការរង២រូប តាមក្ដោបបទល្មើសព្រហ្មទណ្ឌមិនឲ្យកំរើកក្ដី តែបទល្មើសនេះ ហាក់មិនទាន់មានសញ្ញាណាមួយ ដែលអាចសន្មត់បានថា វាបានចុះនៅឡើយទេ។
ជាពិសេស បទល្មើស«ឆក់ កាច់សោលួចម៉ូតូ គាស់ទំលុះទម្លាយលំនៅឋានលួចទ្រព្យសម្បត្តិ»។ បើពិនិត្យទៅព្យុសនកម្មនៃបទល្មើសទាំងនេះ ហាក់មានទំហំតូចតាចទេ តែវាបង្កភាពអសន្តិសុខធំដុំបំផុតដល់ការរស់នៅរបស់ពលរដ្ឋ ហើយថែមទាំងធ្វើឲ្យសមត្ថកិច្ចឈឺក្បាលរាល់ថ្ងៃ ។ ដូច្នេះ ដោយផ្អែកទៅលើវត្តមានលោកស្នងការរងរហូតដល់ទៅ២រូប ទទួលផែនព្រហ្មទណ្ឌយ៉ាងណែនពេញក្នុងដៃនាពេលនេះ ទាំងមន្ត្រី ទាំងប្រជាពលរដ្ឋរំពឹងថា បទល្មើសនានា នឹងអាចថយចុះខ្លះជាមិនខាន បើទោះជាពេលនេះគ្មានសញ្ញាថយចុះក្ដី ៕
ចែករំលែកព័តមាននេះ