ខេត្តបាត់ដំបង ៖ បុរសភេទទី៣ម្នាក់ ត្រូវជនសង្ស័យប្រើកូនកាំបិតចាក់ត្រូវជាច្រើនកន្លែង បណ្ដាលឱ្យរងរបួសធ្ងន់ កាលពីវេលាម៉ោង២ និង៣០នាទីរំលងអធ្រាត្រឈានចូលថ្ងៃទី១៧ មិថុនា ស្ថិតនៅក្នុងបន្ទប់ជួល ស្ថិតក្នុងភូមិកម្មករ…
ខេត្តបាត់ដំបង ៖ បុរសភេទទី៣ម្នាក់ ត្រូវជនសង្ស័យប្រើកូនកាំបិតចាក់ត្រូវជាច្រើនកន្លែង បណ្ដាលឱ្យរងរបួសធ្ងន់ កាលពីវេលាម៉ោង២ និង៣០នាទីរំលងអធ្រាត្រឈានចូលថ្ងៃទី១៧ មិថុនា ស្ថិតនៅក្នុងបន្ទប់ជួល ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ដែលគេសង្ស័យជាអំពើប៉ុនប៉ងប្លន់យកម៉ូតូ តែមិនបានសម្រច។
ប្រភពនៅកន្លែងកើតហេតុបានឲ្យដឹងថា ជនរងគ្រោះឈ្មោះនឿន រ៉ាឌី ហៅលូ ភេទទី៣ អាយុ៣១ឆ្នាំ រស់នៅភូមិនរា ឃុំនរា ស្រុកសង្កែ តែបានមកស្នាក់នៅបន្ទប់ជួលត្រង់ចំណុចខាងលើ។ ប្រភពដដែលបានប្រាប់ថា ហេតុការណ៍នោះបានកើតឡើង ក្រោយជនរងគ្រោះវិលត្រឡប់មកពីកម្មវិធីខួបកំណើតប្អូនវិញ ដោយមានដឹកបុរសដែលគេមិនស្គាល់អត្តសញ្ញាណម្នាក់មកជាមួយផង។
ស្ត្រីម្នាក់ដែលនៅក្បែរបន្ទប់ជួលបាននិយាយដែរថា ពេលដែលជនរងគ្រោះដឹកមនុស្សម្នាក់ចូលក្នុងបន្ទប់ គេមិនឮឈ្មោះប្រកែកគ្នាទេ តែបន្តិចក្រោយមក ស្រាប់តែគេឮសម្លេងជនរងគ្រោះស្រែកឱ្យគេជួយ ដែលបង្កឲ្យមានការភ្ញាក់ផ្អើល ។ សាក្សីរូបបានបញ្ជាក់ថា អ្នកនៅក្បែរៗនោះ បានបើកទ្វាររត់ទៅជួយ ស្រាប់ តែឃើញជនរងគ្រោះបើកទ្វាររត់ចេញក្រៅ ទាំងឈាមជោកជាំពេញខ្លួននិងនៅលើឥដ្ឋការ៉ូ។ ស្របពេលនោះ គេឃើញបុរសម្នាក់បានស្ទុះរត់ចេញពីបន្ទប់គេចខ្លួនបាត់ទាំងយប់ភ្លាមៗដែរ។
ប្អូនប្រុសជនរងគ្រោះឈ្មោះ នឿន កក្កដា អាយុ២៦ឆ្នាំ បាននិយាយដែរថា នៅយប់កើតហេតុនោះ បងប្រុសខ្លួន (ជនរងគ្រោះ) បានទៅចូលរួមខួបកំណើតខ្លួន ដែលធ្វើនៅម្ដុំបូរីរំចេក តែពេលចប់កម្មវិធីគាត់ត្រឡប់មកបន្ទប់វិញតែម្នាក់ឯងទេ។ ប៉ុន្តែពេលកើតហេតុ បែរជាឮថា គាត់ដឹកមនុស្សប្រុសទៅបន្ទប់ជួល និងបង្កឱ្យមានរឿងបែបនេះ។
នឿន កក្កដា បានបញ្ជាក់ថា បងប្រុសខ្លួនត្រូវជនដៃដល់ចាក់ត្រូវពោះចំនួន៣កន្លែង នឹងត្រូវចំស្មារចំនួន២កន្លែងទៀត បណ្ដាលឱ្យរងរបួសធ្ងន់ រហូតដល់ពេលនេះបងប្រុសខ្លូននៅស្តូកស្ដូកក្នុងមន្ទីរពេទ្យនៅឡើយ។ ខ្លួនសង្ស័យថា ជនដៃដល់បានប្រើកូនកាំបិតចាក់ទៅលើបងប្រុសខ្លួនក្នុងបំណងសម្លាប់ រួចប្លន់យកម៉ូតូម៉ាកឃ្លិកស៊េរីឆ្នាំ២០១៩របស់បងប្រុសខ្លួនតែម្ដង តែមិនបានសម្រេច។
នៅកន្លែងកើតហេតុ គេឃើញសមត្ថកិច្ចបានចុះទៅពិនិត្យស្លាកស្នាមនៅក្នុងបន្ទប់ជួល ដែលមានឈាមពាសពេញតាំងពីក្នុងបន្ទប់រហូតមកដល់ខាងក្រៅ។ សមត្ថកិច្ចបានរកឃើញកូនកាំបិតតូច១ និង ឃើញសម្លៀកបំពាក់រប៉ាត់រប៉ាយពេញក្នុងបន្ទប់ ដែលគេសន្និដ្ឋានថា ទំនងជនរងគ្រោះនិងជនដៃដល់ប្រតាយប្រតបគ្នា មុនពេលជនរងគ្រោះរត់ចេញក្រៅស្រែកឲ្យគេជួយ ។
សមត្ថកិច្ចបាននិយាយថា ពេលនេះយើងមិនទាន់អាចសន្និដ្ឋានបានទេ ដរាបណាជនរងគ្រោះនៅសន្លប់មិនអាចនិយាយបាន ដូច្នេះយើងត្រូវរងចាំជនរងគ្រោះដឹងខ្លួនសិន។ ទោះយ៉ាងណាពេលនេះមន្ត្រីជំនាញកំពុងតាមស្រាវជ្រាវមុខសញ្ញាជនដៃដល់តាមរយៈសាក្សីនានា នឹងកាមេរ៉ាសុវត្ថិភាពដែលគេបំពាក់នៅតាមដងផ្លូវចេញចូលទៅកន្លែងកើតហេតុ ៕
ចែករំលែកព័តមាននេះ