ខេត្តបន្ទាយមានជ័យ ៖ យោងតាមគេហទំព័រ និងកាសែតក្នុងស្រុកថៃមួយបានចេញផ្សាយថា ពលករខ្មែរចំនួន១៤នាក់ត្រូវបានតម្រួតថៃចាប់នៅចំណុចផ្លូវ៣៣៩៥ រវៀងស្រុកវ៉ាថាណាណាក់ខន និងស្រុកតាប្រាយ៉ា ខេត្តស្រះកែវ កាលពីរសៀលថ្ងៃទី១៦ មិថុនា លើរថយន្តថៃ១គ្រឿង ។
ពលករទាំង១៤នាក់ខាងលើ គេមិនទាន់ស្គាល់អត្តសញ្ញាណនៅឡើយទេ ក្នុងនោះ ប្រុស១៣នាក់ និងស្រីម្នាក់ ហើយក៏មិនដឹងថា លួចឆ្លងដែនតាមច្រករបៀងណានោះទេ ចំណែករថយន្ដដែលដឹកពលករខ្មែរនិងអ្នកបើកបរត្រូវសមត្ថកិច្ចថៃឃាត់និងចាប់ខ្លួនផងដែរ។
ករណីពលករលួចឆ្លងដែនខុសច្បាប់តាមច្រករបៀងនេះ គឺកើតមានជាញឹកញាប់មកហើយ បើទោះជាព្រំដែនត្រូវបានភាគីថៃបិទ ដើម្បីបង្ការទប់ស្កាត់ការរីករាលដាលមេរោគកូវីត១៩ ហើយប្រមុខក្រសួងមហាផ្ទៃដាក់បទបញ្ជាឲ្យកម្លាំងជួរមុខរួមគ្នាទប់ស្កាត់រាល់បទល្មើសឆ្លងដែនខុសច្បាប់ក៏ដោយ ។
គេគិតថា បើក្រុមការងារប្រចាំនៅទីតាំងទទួលពលករបញ្ជូនពីថៃតាមកិច្ចព្រមព្រៀងនៃខេត្តបន្ទាយមានជ័យនិងស្រះកែវ(ច្រករបៀងអូរបីជាន់)សាកសួរលម្អិត ពលករដែលថៃបញ្ជូនត្រឡប់មកវិញអាចនឹងដឹងថាពួកគេ(ពលករ)ឆ្លងព្រំដែនតាមច្រកណាឬចំណុចណា និងអាចឈានទៅចាប់បានទាំងអ្នកពាក់ព័ន្ធ(មេខ្យល់)ខ្លះជាក់ជាមិនខាន ព្រោះក្រុមពលករមិនអាចដើរពីស្រុកកំណើតទៅដល់ដីថៃដោយខ្លួនពួកគេផ្ទាល់នោះទេ។ មតិចម្ងល់ជាច្រើនលើកឡើងថា ហេតុអ្វីសម័យកូវីដ១៩ គេរឹតបណ្តឹងតាមព្រំដែននៃប្រទេសទាំង២ បែរជាមានពលករលួចឆ្លងដែនចូលទៅដល់ដីថៃបាន? (កែសម្រួលដោយ ៖ ធីតា)
ចែករំលែកព័តមាននេះ