រាជធានីភ្នំពេញ ៖ អ្នកសិល្បៈពហុជំនាញដែលថ្មីៗនេះ ហាក់មានយីអ៊ុនមិនសូវល្អ ត្រូវប្រកាសលក់ឡៃឡុងសំអាងការ និងមុខជំនួញមួយចំនួនផ្សេងទៀតមិនសមប្រកបក្តី តែអ្នកនាង ខាត់ សុឃឹម បានប្រកាសធ្វើរឿងសប្បុរសធម៌ដ៏គួរអោយកោតសរសើរមួយ បើទោះបីជាស្ថានភាពសេដ្ឋកិច្ចរបស់អ្នកនាងមិនហូរហៀរដូចពេលមុនៗ ឬក៏អាចនិយាយបានថា ចំណូលរបស់អ្នកនាងនាពេលបច្ចុប្បន្ននេះ កំពុងតែដុនដាបខ្លាំងក៏ដោយ ។
កាលពីថ្ងៃទី១៦ ខែមេសា ឆ្នាំ២០២០ កន្លងទៅនេះ សិល្បការិនីពហុជំនាញរូបនេះបានប្រកាសបញ្ចុះតម្លៃបន្ទប់ជួលស្នាក់នៅរបស់ខ្លួន មកតម្លៃមួយថោកសមរម្យសម្រាប់បងប្អូនស្នាក់នៅ ដោយស្ថានភាពជំងឺកូវីដ-១៩ មានសភាពមិនទាន់ល្អប្រសើរ ។ នេះបើយាងតាមការបង្ហោះរបស់តាមរយៈហ្វេសប៊ុកអ្នកនាង ខាត់ សុឃឹម ។
សូមរម្លឹកថា នាពេលថ្មីកន្លងទៅនេះ សង្កេតឃើញថា ស្ថានភាពគ្រួសាររបស់តារាចម្រៀងអាយៃ ភ្លេងការ និងសម្អាងការ រូបនេះមានសភាពធ្លាក់ចុះជាខ្លាំង ដោយសារតែបាត់ចំណូលស្ទើរតែទាំងស្រុងពីសិល្បៈ និងបានប្រកាសលក់នូវរបស់ឡៃឡុងភ្នួងការ នៅពេលជីវភាពកំពុងតែខ្វះខាតខ្លាំង ។ ប៉ុន្តែទោះជាយ៉ាងណាក្តី អ្នកនាង ខាត់ សុឃឹម នៅតែបន្តធ្វើរឿងសប្បុរសដដែល ទៅលើការបញ្ចះតម្លៃផ្ទះជួលរបស់ខ្លួន នាពេលបច្ចុប្បន្ននេះ បើទោះជាកំពុងតែត្រូវការលុយ ក្នុងការចំណាយផ្សេងៗ ។
ទង្វើសប្បុរសមួយនេះបានបង្ហាញអោយមហាជនឃើញពីទឹកចិត្តដ៏ប្រពៃរបស់តារាចម្រៀងពូកែវោហារសព្ទរូបនេះយ៉ាងខ្លាំង ពីព្រោះតែអ្នកនាងបានយល់ច្បាស់ពីភាពលំបាករបស់បងប្អូន សិស្សានុសិស្ស ជាពិសេសកម្មករ កម្មការី នៅស្ថានភាពប្រទេសកំពុងតែជួបវិបាកសេដ្ឋកិច្ចដូចគ្នា ។
គួរបញ្ជាក់ផងដែរថា បន្ទប់ជួលរបស់អ្នកនាង ខាត់ សុឃឹម មានរហូតដល់៣៦បន្ទប់ ដោយមានទីតាំងស្ថិតនៅម្ដុំលូប្រាំ ក្នុងខណ្ឌមានជ័យ រាជធានីភ្នំពេញ ៕
ចែករំលែកព័តមាននេះ