រាជធានីភ្នំពេញ ៖ បន្ទាប់ពីពើបប្រទៈនឹងបណ្តឹងបរិហារកេរ្តិ៍ជាសាធារណៈដែលជំទាវវ័យក្មេងមួយរូបបានប្តឹងទារជំងឺចិត្តពីតារាចម្រៀងម៉េង កែវពេជ្ជតា ត្រឹម១០០ រៀលមិនទាន់បាត់ក្តៅផងនោះ ពេលនេះ អ្នកនាងម៉េង កែវពេជ្ជតា ត្រូវរងបណ្តឹងថ្មីមួយទៀតប្តឹងពីបទ…
រាជធានីភ្នំពេញ ៖ បន្ទាប់ពីពើបប្រទៈនឹងបណ្តឹងបរិហារកេរ្តិ៍ជាសាធារណៈដែលជំទាវវ័យក្មេងមួយរូបបានប្តឹងទារជំងឺចិត្តពីតារាចម្រៀងម៉េង កែវពេជ្ជតា ត្រឹម១០០ រៀលមិនទាន់បាត់ក្តៅផងនោះ ពេលនេះ អ្នកនាងម៉េង កែវពេជ្ជតា ត្រូវរងបណ្តឹងថ្មីមួយទៀតប្តឹងពីបទ «បរិហារកេរ្តិ៍ជាសាធារណៈនិងបទញុះញង់អោយមានការរើសអើង» ។
សម្រាប់បណ្តឹងថ្មីនេះ គឺដើមបណ្តឹងគឺលោកជំទាវ ហ៊ុន ស៊ីណាត ប្អូនស្រីបង្កើតរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានដាក់ចូលទៅ ព្រះរាជអាជ្ញាអមសាលាដំបូងរាជធានីភ្នំពេញ នាថ្ងៃទី ១៦ មិថុនា ឆ្នាំ២០២០ ដោយចោទប្រកាន់តារាចម្រៀងស្រីរូបនេះ ចំនួន២បទល្មើស គឺបទ«បរិហារកេរ្តិ៍ជាសាធារណៈនិងបទញុះញង់អោយមានការរើសអើង» ព្រមទាំងទារជំងឺចិត្តតាមច្បាប់កំណត់ផងដែរ ។
យោងតាមពាក្យបណ្តឹងលោកជំទាវ ហ៊ុន ស៊ីណាត បានលើកឡើងថា ទង្វើរបស់តារាចម្រៀង ម៉េង កែវពេជ្ជតា គឺ ជាការប្រមាថនិងធ្វើអោយប៉ះពាល់យ៉ាងធ្ងន់ធ្ងរដល់កិត្តិយសរបស់លោកស្រី ជាពិសេសធ្វើអោយសាធារណជន មានការភ័ន្តច្រឡំ ចោទប្រកាន់មកលើលោកស្រី អោយមានការរើសអើងក្នុងសង្គម ដូច្នេះលោកជំទាវ ហ៊ុន ស៊ីណាត សំណូមពរអោយតុលាការ ផ្តន្ទាទោសតារាចម្រៀង ម៉េង កែវពេជ្ជតា និងបក្ខពួកទៅតាមច្បាប់ និងសុំទាមទារសំណងជំងឺចិត្តតាមច្បាប់កំណត់ ។
ជុំវិញរឿងរ៉ាវដែលនាំឲ្យលោកជំទាវ ហ៊ុន ស៊ីណាត សម្រេចដាក់ពាក្យប្តឹងអ្នកនាងម៉េង កែវពេជ្ជតា គឺពាក់ព័ន្ធនឹងសម្តីរបស់តារាចម្រៀងស្រីដែលបានលើកឡើងកាលពីថ្ងៃទី ៣០ ឧសភាឆ្នាំ២០២០ ដែលនាងបានបង្ហោះក្នុងគណនីហ្វេសប៊ុករបស់អ្នកនាងដោយបានពោលថា៖ ១- មនុស្សចាស់អីអញ្ចឹង ?ជួយគិតមើល! អាក្មេងនេះជាក្មេងពាលតែងតែជេរបញ្ជោរប្រមាថថ្នាក់ដឹកនាំ និងរដ្ឋាភិបាលខ្មែរកប់ៗមាត់ តែបែរជាមីងជំទាវនេះ សេពគប់ជាមួយទៅវិញតើព្រោះអ្វី ? ក្បត់? ឬប្រយោជន៍អាថ៌កំបាំងណាមួយ? ឬក្រែងមីងជំទាវនេះជាដៃគូមីង ហ៊ុន ស៊ីណាត ? តើរឿងនេះមីងជំទាវ ស៊ីណាត លោកដឹងទេ ?
និងចំណុចទី ២- សូមបញ្ជាក់៖ មិនមែនខ្ញុំតបជាមួយពួកក្បត់នេះទេ តែខ្ញុំកំពុងប្រមូលអ្វីជាការបំពានរបស់ពួកគេមកលើខ្ញុំ ដើម្បីទុកជាភស្តុតាង ព្រោះមុននេះ ជំទាវស៊ីណាត បានសុំអោយខ្ញុំលើកលែងហើយ អោយខ្ញុំឈប់និយាយបានន័យថា គាត់មិនចង់មានរឿងដូច្នេះ បើគាត់អ្នកសុំតែបែរជាគូរកនគាត់គឺយាយបូរីនេះ បែរជាខំស៊ែតែរឿងអាក្រក់ចោទ និងសំអុយឈ្មោះខ្ញុំមកផុសដូច្នេះ បានន័យថាគាត់បំពានសំដីជំទាវ ស៊ីណាត ។
សូមបងប្អូនជ្រាប និងកុំបន្ទោសថាខ្ញុំមិនព្រមចប់» ។ គិតត្រឹមម៉ោង ៣និង ៣០នាទីរសៀលថ្ងៃទី១៦ មិថុនា នេះគេពុំទាន់ឃើញអ្នកនាង ម៉េង កែវពេជ្ជតា មានប្រតិកម្មបែបណានៅឡើយ ចំពោះបណ្តឹងទី ២ ដែលដាក់ដោយលោកជំទាវហ៊ុន ស៊ីណាត ។
តែកាលពីថ្ងៃទី១២ ខែមិថុនា កន្លងទៅតារាចម្រៀងចាស់វស្សា ម៉េង កែវពេជ្ជតាបានថ្លែងប្រាប់ទៅអ្នកគាំទ្ររបស់នាងថាតាមរយៈវីដេអូ live ថា ពាក្យបណ្តឹង «បរិហារកេរ្តិ៍ជាសាធារណៈ» ប្រឆាំងរូបអ្នកនាង ដែលម្ចាស់បណ្តឹងគឺជាជំទាវវ័យក្មេង រស់ សោភ័ណ្ឌ ដែលជាភរិយាលោក មួង ឃីម អតីតប្តីរបស់ម៉េង កែវពេជ្ជតាថា ត្រឹមសំណងទាមទារ១០០ រៀលនោះដែលជំទាវ រស់ សោភ័ណ្ឌ ទាមទារ គឺអត់មានបញ្ហាចោទចំពោះអ្នកនាងឡើយ ។ ក៏ប៉ុន្តែអ្នកនាងបានបញ្ជាក់ថា ចំពោះការទាមទារឲ្យអ្នកនាង «សុំទោសជាសាសាធារណៈ» នោះគឺដេកចាំទៅ ទោះ១០ជាតិទៅមុខទៀត ក៏គ្មានពេជ្ជតា សុំទោសដែរ ៕
ចែករំលែកព័តមាននេះ