ខេត្តកំពត ៖ វិនិយោគិនចិនគ្រោងបង្កើតរោងចក្រកែច្នៃអំបិលនៅខេត្តកំពត-កែប ដើម្បីបំពេញតម្រូវការទាំងទីផ្សារអំបិលក្នុងស្រុក និងការនាំចេញ ។ នេះ បើតាមលោក ប៊ុន បារាំង ប្រធានសហគមផលិតអំបិលខេត្តកំពត ។
ប្រធានសហគមផលិតអំបិលខេត្តកំពតបានមានប្រសាសន៍ឲ្យដឹងថា ក្រុមហ៊ុនរបស់ប្រទេសចិនបានត្រៀមចុះសិក្សាពីគម្រោងបង្កើតរោងចក្រនេះហើយ ប៉ុន្តែមិនទាន់ប្រកាសជាសាធារណៈនៅឡើយទេ ដោយរង់ចាំស្ថានភាពជម្ងឺកូវីដ១៩ ស្ងប់ស្ងាត់សិន ។
លោក បារាំង បានបញ្ជាក់ថា «គម្រោងបង្កើតរោងចក្រកែច្នៃអំបិលមានសារៈសំខាន់ ណាស់ ដើម្បីជំរុញការផលិតអំបិលនៅកម្ពុជាឲ្យកាន់តែមានគុណភាពឆ្លើយតបបានតម្រូវការទីផ្សារ ខណៈបច្ចុប្បន្នរោងចក្រផលិតអំបិលនៅខេត្តកំពតមានសភាពចាស់ទ្រុឌទ្រោមផលិតមិនតាមតម្រូវការ» ។ លោកសង្ឃឹម និងជឿជាក់ថា ក្រោយបញ្ចប់កូវីដ១៩ រោងចក្រមួយនេះអាចនឹងមានវត្តមាននៅលើទឹកដីកម្ពុជា ។
លោក បារាំង បានបន្តដូចនេះថា « សព្វថ្ងៃនេះខ្ញុំកំពុងតែទាក់ទងអ្នកវិនិយោគិនចិន ប៉ុន្តែគេរៀបមកសិក្សា ប៉ុន្តែដោយសារជំងឺកូវីដ-១៩គេផ្អាកសិន ។ បើសិនណាមិនមានជំងឺកូវីដហ្នឹងប្រហែលជាគេសិក្សា ហើយដំឡើងរោងចក្រមួយរោងចក្រ ។ រោងចក្រដែលវិនិយោគិនចិនមកសហការ វាជួយការបំលែងអំបិលពីគ្រួសឲ្យទៅជាម៉ត់ដែលអាចប្រើសម្រាប់ហូបបាន ។ ដោយសារអំបិលពេលយកពីស្រែមកជាអំបិលគ្រួស យើងយកមកកែច្នៃអោយជាអំបិលម៉ត់ដាក់ជាកញ្ចប់ៗ ។ យើងសព្វថ្ងៃនេះយើងកំពុងខ្វះខាតរោងចក្រកែច្នៃអំបិលគ្រួសមកជាអំបិលម៉ត់ ទើបយើងកំពុងទំនាក់ទំនងខាងចិនឲ្យគាត់ជួយ» ។ លោកបញ្ជាក់ថា ការផលិតអំបិលក្នុងឆ្នាំ២០២០នេះរំពឹងថា នឹងប្រមូលបានប្រមាណ៨ម៉ឺនតោនលើផ្ទៃដីជាង៤០០០ហិចតា ។
សូមបញ្ជាក់ថា បច្ចុប្បន្នក្រុមផលិតអំបិលមានចំនួន២០០ក្រុមសាមគ្គី ហើយចែកចេញជា៧មណ្ឌល គឺមាននៅក្នុងស្រុកទឹកឈូ ក្រុងកំពត សេះស ស្រុកកំពុងត្រាច និងកែប ។ ក្នុងមួយឆ្នាំកម្ពុជាត្រូវការអំបិលប្រមាណ១០ម៉ឺនតោនសម្រាប់ប្រើប្រាស់ក្នុងស្រុក ៕
ចែករំលែកព័តមាននេះ