រាជធានីភ្នំពេញ ៖ ក្នុងចំណោមប្រភេទកីឡាទាំង១៧ដែលកម្ពុជាប្រកាសជាផ្លូវការធ្វើជាវិញ្ញាសាសម្រាប់ស៊ីហ្គេម២០២៣ នៅពេលបានធ្វើជាម្ចាស់ផ្ទះលើកដំបូងនោះ មានតែកីឡាល្បុក្កតោ និងអុកចត្រង្គប៉ុណ្ណោះ ដែលកម្ពុជារំពឹងដណ្ដើមបានមេដាយច្រើនជាងគេ ដោយសារកីឡាទាំងពីរប្រភេទនេះ គឺជាកីឡាថ្មីនៅក្នុងព្រឹត្តិការណ៍ស៊ីហ្គេម ហើយជាកីឡាប្រចាំជាតិរបស់កម្ពុជា ដែលមានតែកម្ពុជាគឺជាអ្នកឯកទេស ។ យ៉ាងណាមិញ កម្ពុជាក៏បានបង្កើនយុទ្ធសាស្ត្រត្រៀមទុកជាមុនផងដែរ ដោយមិនមែនសំអាងថាគឺជាកីឡាដែលត្រូវឯកទេសរបស់ខ្លួន ហើយក៏ប្រហែសនោះទេ។
យោងតាមការប្រកាសរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍កម្ពុជា (CAMSOC) ឱ្យដឹងថា បន្ទាប់ពីសម្រេចកំណត់យកកីឡាប្រចាំជាតិគឺល្បុក្កតោ និងអុកចត្រង្គ
បណ្ដាប្រទេសមួយចំនួននៅអាស៊ាន ក៏បានមកហ្វឹកហាត់ពីប្រភេទកីឡានេះដែរ ដោយខ្លះបញ្ជូនកីឡាករ-កីឡាការិនីមកហ្វឹកហាត់ ហើយប្រទេសខ្លះទៀត ក៏បានស្នើអ្នកឯកទេសពីកម្ពុជា ឱ្យទៅហ្វឹកហាត់ដល់ប្រទេសទាំងនោះដោយផ្ទាល់ផងដែរ ។ មានការបញ្ជាក់ថា កីឡាករនៃប្រទេសមួយចំនួនដែលសម្ងំហ្វឹកហាត់ល្បុក្កតោ និងអុកចត្រង្គ ក៏ក្រេបជញ្ជក់ចំណេះជំនាញបានល្អមិនចាញ់កម្ពុជា ដែលជាម្ចាស់កីឡានោះដែរ ដោយសារកីឡាករដែលប្រទេសទាំងនោះបញ្ជូនមកហ្វឹកហាត់ ឬឱ្យហ្វឹកហាត់ ក៏សុទ្ធតែជាអ្នកឯកទេសក្បាច់គុនដែលស្រដៀងនឹងល្បុក្កតោ និងអុកចត្រង្គ ពោលគឺអុកអន្តរជាតិផងដែរ ។
ដូច្នេះហើយទើបកីឡាករកម្ពុជាមិនអាចប្រហែសថា នេះជាជំនាញរបស់ខ្លួនហើយក៏មើលស្រាលគូប្រកួតនោះទេ ។ យ៉ាងណាក៏ដោយគេនៅតែមើលឃើញថា កីឡាទាំងពីរនឹងមានឱកាសដណ្ដើមមេដាយមាស និងមេដាយសំខាន់ៗបានច្រើន ដោយសារតែហេតុផលថា ក្នុងចំណោមកីឡាករល្បុក្កតោ និងអុកចត្រង្គ កម្ពុជាសុទ្ធតែជម្រើសយកធនធានល្អៗ ខ្លាំងៗរបស់ខ្លួនឱ្យប្រកួត ។
ប្រភពពីសហព័ន្ធទាំងពីរបានអះអាងថា មកទល់ពេលនេះ ធនធានខ្លាំងៗរបស់កីឡាករ ល្បុក្កតោ និងអុកចត្រង្គ ត្រូវបានបង្វឹកយ៉ាងយកចិត្តទុកដាក់ ដោយធនធានទាំងនោះក៏មានថវិកាឧបត្ថម្ភច្បាស់លាស់ ដើម្បីជំរុញកម្លាំងចិត្ត។
ម្យ៉ាងវិញ្ញាសាល្បុក្កតោ និងអុកចត្រង្គ តាមការសន្និដ្ឋានបណ្ដាប្រទេសនៅអាស៊ាន ដែលបានបញ្ជូនកីឡាករមកហ្វឹកហាត់ និងស្នើឱ្យអ្នកជំនាញពីកម្ពុជាទៅបង្វឹក គឺមានតែចំនួនតិចប្រទេសប៉ុណ្ណោះ ខណៈដែលវិញ្ញាសាទាំងពីរត្រូវគេប៉ាន់ស្មានថា ប្រទេសទាំង១១នឹងមិនដាក់កីឡាករឱ្យប្រកួតគ្រប់ប្រទេស ហើយបើមានក៏អាចថាគ្រាន់តែដាក់បង្គ្រប់កិច្ច ដែលនៅតែអាទិភាពសម្រាប់កម្ពុជា ។ ម្យ៉ាង ការបង្កើតវិញ្ញាសា និងលក្ខន្តិកៈ ក៏សុទ្ធតែសម្របតាមជំនាញរបស់កីឡាកម្ពុជា ដែលនៅតែកីឡាករកម្ពុជាមានប្រៀបជាង ។ លោកនៅតែរំពឹងថាកីឡាប្រចាំជាតិរបស់កម្ពុជាចំនួន២ គឺល្បុក្កតោ និងអុកចត្រង្គ នឹងលេចធ្លោនៅស៊ីហ្គេម ឆ្នាំ២០២៣ ដោយសារតែហេតុផលខាងលើ។
លោក វ៉ាត់ ចំរើន អគ្គលេខាធិការ CAMSOC ថ្លែងថា ការធ្វើជាម្ចាស់ផ្ទះស៊ីហ្គេម ម្ចាស់ផ្ទះមានសិទ្ធិដាក់ប្រភេទកីឡាដែលមានសក្ដានុពលជាងគេ ជាពិសេសគឺកីឡាប្រចាំជាតិរបស់ខ្លួន ទើបលោកយល់ថា ការដាក់កីឡាល្បុក្កតោ និងកីឡាអុកចត្រង្គ គឺអ្វីដែលកម្ពុជារំពឹងច្រើន សម្រាប់វិស័យមួយនេះ ។ អគ្គលេខាធិការCAMSOC រូបនេះបន្ថែមថា ក្រៅពីកីឡា សក្តានុពលទាំង១៧ប្រភេទខាងលើ ក៏មានប្រភេទកីឡាត្រៀមដាក់បញ្ចូល និង បម្រុងដាក់បញ្ចូលជាច្រើនទៀតផងដែរ ដោយគ្រាន់តែកម្ពុជាកំពុងពិចារណាថា ជ្រើសយកកីឡាណាបន្ថែមទៀត ដើម្បីឱ្យកីឡាករកម្ពុជាអាចមានឱកាសដណ្ដើមយកមេដាយ ។
លោកអះអាងថា ទាំងប្រភេទកីឡាត្រៀមដាក់បញ្ចូល និងបម្រុងដាក់បញ្ចូល សុទ្ធតែអាចមានលទ្ធភាព ក្នុងការដាក់បញ្ចូលក្នុងព្រឹត្តិការណ៍កីឡាស៊ីហ្គេមឆ្នាំ២០២៣ បើកីឡាទាំងនេះ អាចមានសក្តានុពលគ្រប់គ្រាន់ក្នុងការដណ្តើមមេដាយ ។ លោកថា ចំណាត់ថ្នាក់ទី១ ជាក្រុមដែលត្រូវ ដាក់ចូល (មាន១៧ប្រភេទ), ចំណាត់ថ្នាក់ទី២ ជាក្រុមដែលត្រៀមដាក់បញ្ចូល(មាន១៥ប្រភេទ)និងចំណាត់ថ្នាក់ទី៣ជាក្រុមបម្រុងដាក់ចូល(មាន១៣ប្រភេទ) ។
លោកថា កីឡាទាំង១៧ប្រភេទដែលត្រូវដាក់បញ្ចូលក្នុងព្រឹត្តិការណ៍ កីឡាស៊ីហ្គេមឆ្នាំ២០២៣ទាំងនោះរួមមាន អត្តពលកម្ម, ហែលទឹក, ប៉េតង់, ជឺជិតស៊ូ, តេក្វាន់ដូWTF, ម៉ូតូទឹក, វ៉ូវីណាម, ប្រដាល់គុនខ្មែរ, ល្បុក្កតោ, អុកចត្រង្គ, ចំបាប់, តេក្វាន់ដូ ITF, សូហ្វតិន្នី ស, ប្រដាល់សកល, វាយកូនបាល់, និងសីដក់់ (ឈិនឡូន)ជាដើម ។ មកទល់ពេលនេះ កីឡាករម្នាក់ៗកាន់តែបង្កើនការត្រៀមខ្លួន។
ដោយឡែកសម្រាប់កីឡាដែលស្ថិតក្នុងការត្រៀមដាក់បញ្ចូលរួមមាន កីឡាករវាយសី, កា រ៉ាតេ, គុនដាវ, ប្រណាំងកង់, វាយកូនឃ្លីលើតុ,ទ្រីយ៉ាត្លុង, ទូកក្តោង, កាយសម្ព័ន្ធ, ជិះសេះ,បាល់បោះ, បាល់ទះ, យូដូ, រាំ, វាយកូនគោល និងទូកកានូ និង រូវីង ។ កីឡាបម្រុង ដាក់បញ្ចូលរួមមាន កីឡាអេឡិចត្រូនិក (E-Sport), លើកទម្ងន់, វូ ស៊ូ, សូរិនហ្សីកាំប៉ូ, អុកចិន, បញ្ច សីលា, បាញ់ធ្នូ, បាញ់កាំភ្លើង, ហុកគី, ប៊ីយ៉ា និងស្នូកឃ័រ, បាល់ឱប, បេស្បលនិងកីឡា ឡើងភ្នំ ៕ (កែសម្រួលដោយ ៖ បុប្ផា)
ចែករំលែកព័តមាននេះ