រាជធានីភ្នំពេញ ៖ មន្ដ្រីពន្ធនាគារខេត្ដស្វាយរៀង ឱ្យដឹងកាលពីថ្ងៃទី១០ ខែឧសភា ២០១០ ថា ពន្ធនាគារខេត្ដនៅមិនទាន់បានសំរេចសំណើសុំចូលជួបសួរសុខទុក្ខអ្នកទោស២ នាក់នៅថ្ងៃទី១៨ ឧសភា របស់អ្នកតំណាងរាស្ដ្រគណបក្សសម រង្ស៊ី ២៥រូប ថាតើឱ្យចូលជួប ឬអត់នៅឡើយទេ ។យោងតាមលិខិតផ្ញើជូនប្រធានសាលាដំបូងខេត្ដស្វាយរៀង របស់អ្នកតំណាងរាស្ដ្រគណបក្សសមរង្ស៊ី ឱ្យដឹងថា “អ្នកតំណាងរាស្ដ្រចំនួន២៥រូប មានបំណងចូលទៅសួរសុខទុក្ខអ្នកទោសអ្នកស្រី មាស ស្រី អាយុ៣៩ឆ្នាំ និងលោកព្រំ ជា អាយុ៤១ឆ្នាំ ដែលកំពុងជាប់ពន្ធនាគារក្នុងខេត្ដស្វាយរៀង” ។ អ្នកទោសទាំងពីរនាក់ត្រូវបានចោទប្រកាន់ពីបទធ្វើឱ្យខូចខាតដោយចេតនានូវតំរុយបង្គោលព្រំដែន លេខ១៨៥ ។ទោះបីជាយ៉ាងណាក្ដីក្រុមគ្រួសារអ្នកទោសនិយាយថា ពួកគេដូចជាមិនមានជំនឿទៅលើលោកសម រង្ស៊ីទៀតទេ ខណៈដែលពេលនេះ លោកស្ថិតនៅឯបរទេសរួចផុតពីការចាប់ខ្លួន ឬជាប់ពន្ធនាគារចំណែកឯអ្នកភូមិចំនួនពីរនាក់ ត្រូវបានចាប់ខ្លួន និងផ្ដន្ទាទោសជាប់ពន្ធនាគារម្នាក់ៗ១ឆ្នាំ និងចូលរួមបង់ពិន័យចំនួន៥០លានរៀលទៀតផង ។
សាច់ញាតិរបស់អ្នកស្រី មាស ស្រី និងព្រំ ជា អះអាងថាស្ថានភាពអ្នកទាំងពីរកំពុងតែមានជំងឺជាប់ខ្លួនជាប្រចាំ ហើយបើទោះជាមានអ្នកតំណាងរាស្ដ្រមកពីគណបក្សសម រង្ស៊ី បានទៅជួបពួកគេម្ដងម្កាលក្ដី ក៏ពួកគេមិនបានទទួលការធានាណាមួយពីគណបក្សនេះថា ពួកគេអាចរួចផុតពីការជាប់ពន្ធនាគារនោះទេ។ អ្នកស្រីឈឿង សារីម ប្រពន្ធរបស់លោកព្រំ ជា បាននិយាយថា ប្ដីរបស់គាត់ ឈឺជើង បន្ទាប់ពីចូលពន្ធនាគារកាលពីខែ មករា ឆ្នាំ២០០៩ កន្លងទៅ ។ អ្នកស្រី ឈឿង សារីម និយាយថា គាត់តែងតែទៅសួរសុខទុក្ខប្ដីរៀងរាល់សបា្ដហ៍ ។ ប្ដីបាននិយាយប្រាប់អ្នកស្រីថា ជើងរបស់គាត់មានអាការស្ពឹកខ្លាំងដើរលែងចង់រួចហើយ ។ ចំណែកឯអ្នកស្រី មាស ស្រី មានជំងឺបេះដូង។ អ្នកស្រីនិយាយថា អ្នកស្រីមិនបានទទួលដំណឹងណាមួយពីគណបក្សសម រង្ស៊ី អំពីការគ្រោងទៅសួរសុខទុក្ខរបស់ប្រតិភូ គណបក្សនេះទេ ។
យោងតាមលិខិតរបស់គណបក្សសម រង្ស៊ី ចុះថ្ងៃទី៨ ឧសភា ផ្ញើទៅសាលាដំបូងខេត្ដស្វាយរៀងសរសេរថា “សូមជំរាបជូនលោកប្រធានសាលាដំបូងខេត្ដស្វាយរៀង កម្មវត្ថុ សំណើសុំអនុញ្ញាតឱ្យប្រតិភូអ្នកតំណាងរាស្ដ្របក្សសម រង្ស៊ី បានចូលជួបសួរសុខទុក្ខលោក ស្រី មាស ស្រី និងលោកព្រំ ជា ជាប្រជាកសិកររស់នៅភូមិកោះក្បានកណ្ដាល ឃុំសំរោង ស្រុកចន្ទ្រា ខេត្ដស្វាយរៀង នៅថ្ងៃទី ១៨ ឧសភា ឆ្នាំ២០១០ វេលាម៉ោង១០ ព្រឹក”។
យោងតាមបញ្ជីរាយនាមរបស់ប្រតិភូ គណបក្សសម រង្ស៊ី គឺចំនួន២៥រូប ដែលគ្រោងចូលជួបអ្នកទោសទាំងពីរនាក់ប៉ុន្ដែ កាលពីពេលកន្លងទៅពន្ធនាគារអនុញាតឱ្យ តែអ្នកតំណាងរាស្ដ្រ៣ទៅ៤នាក់ប៉ុណ្ណោះចូលជួប ។
អ្នកស្រីមាស ស្រី និងលោកព្រំ ជា ត្រូវបានកាត់ទោសឱ្យជាប់ពន្ធនាគារក្នុងម្នាក់១ឆ្នាំ ចំណែកលោកសម រង្ស៊ី ត្រូវបានកាត់ឱ្យជាប់ពន្ធនាគារចំនួន២ឆ្នាំ និងចូលរួមបង់ពិន័យសរុប៦៣លានរៀល ។
ចែករំលែកព័តមាននេះ